ଚଳିତ ବର୍ଷ ସରିବ ଅଯୋଧ୍ୟାର ରାମମନ୍ଦିର ନିର୍ମାଣ କାମ, ଅଧିକ କାରିଗରଙ୍କୁ କରାଯିବ ନିୟୋଜିତ

ପୁଣି ତ୍ବରାନ୍ବିତ ହେବ ଅଯୋଧ୍ୟା ରାମ ମନ୍ଦିର ନିର୍ମାଣ କାମ । ଜୋରସୋରରେ କାମ ଆଗେଇବ । ଡିସେମ୍ବର ସୁଦ୍ଧା ନିର୍ମାଣ କାମ ସାରିବାକୁ ଲକ୍ଷ୍ୟ ରଖାଯାଇଛି । ଏଥିପାଇଁ ଅଧିକ କାରିଗର ଓ ଶ୍ରମିକଙ୍କୁ ନିୟୋଜିତ କରାଯିବ । ପଥର କାମରେ ଅଭିଜ୍ଞତା ରଖିଥିବା ରାଜସ୍ଥାନର କଣ୍ଟ୍ରାକ୍ଟର ଓ ଶ୍ରମିକଙ୍କୁ ଯୋଗାଯୋଗ କରାଯାଉଛି । ଏହି ସୂଚନା ଦେଇଛନ୍ତି ରାମ ମନ୍ଦିର ନିର୍ମାଣ ସମିତି ଅଧ୍ୟକ୍ଷ ନୃପେନ୍ଦ୍ର ମିଶ୍ର ।

ସେ କହିଛନ୍ତି, ରାଜସ୍ଥାନର କଣ୍ଟ୍ରାକ୍ଟର ଓ ଶ୍ରମିକମାନେ ଦୂରତା ଯୋଗୁ ଆସିବାକୁ ଅମଙ୍ଗ ହେଉଛନ୍ତି । ସେମାନଙ୍କୁ ଘର ଭଳି ପରିବେଶ ଦେବାକୁ ଉଦ୍ୟମ କରାଯାଉଛି । ସପ୍ତ ମନ୍ଦିର ନିର୍ମାଣ କାମ ସାରି ଅକ୍ଟୋବର ସୁଦ୍ଧା ପ୍ରତିମାଙ୍କୁ ସେଠାକୁ ଅଣାଯିବ । ବର୍ତ୍ତମାନ ସୁଦ୍ଧା ରାମ ମନ୍ଦିରର ପ୍ରଥମ ମହଲା ନିର୍ମାଣ କାମ ୯୦ ପ୍ରତିଶତ ଶେଷ ହୋଇଛି।

ଏବେ ଫୋକସରେ ରହିଛି ଦ୍ବିତୀୟ ମହଲା ଓ ଶିଖର କାମ ସାରିବା । ଡିସେମ୍ବର ୨୪ ତାରିଖ ସୁଦ୍ଧା ନିର୍ମାଣ କାମ ସାରିବାକୁ ଲକ୍ଷ୍ୟ ରଖାଯାଇଛି । ତେବେ ହାତରେ ଆଉ ରହିଲା ମାତ୍ର ୪ ମାସ । ଏହି ସମୟ ଭିତରେ କିଭଳି ନିର୍ମାଣ କାମକୁ କିଭଳି ଶେଷ କରାଯିବ ତା ଉପରେ ଗୁରୁତ୍ବ ଦିଆଯାଉଛି ।