ହୃଦୟବିଦାରକ !! ଟ୍ରକ୍ ଧକ୍କାରେ ମାଆ, ଛୋଟ ଝିଅ ମୃତ

ଜଗତସିଂହପୁର ବାଲିକୁଦାରେ ମର୍ମନ୍ତୁଦ ସଡ଼କ ଦୁର୍ଘଟଣା । ସ୍କୁଟିରେ ଯାଉଥିବା ବେଳେ ମାଆ ଓ ଝିଅଙ୍କୁ ଚାପିଦେଲା ଟ୍ରକ୍ । ଜଗତସିଂହପୁର ବାଲିକୁଦା ଥାନା ଚଷାପଡ଼ା ଛକ ନିକଟରେ ଏହି ଦୁର୍ଘଟଣା ଘଟିଛି । ଘଟଣାସ୍ଥଳରେ ହିଁ ମାଆ ଓ ଝିଅଙ୍କ ମୃତ୍ୟୁ ହୋଇଛି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ପ୍ରବଳ ଉତ୍ତେଜନା ଦେଖାଦେଇଛି । ଲୋକେ ରାସ୍ତାରେ ଟାୟାର ଜାଳି ରାସ୍ତା ଅବରୋଧ କରିଛନ୍ତି । ଘଟଣାକୁ ଦେଖି ପୋଲିସ୍ ଫୋର୍ସ ମୁତୟନ ହୋଇଛନ୍ତି ।

ସୂଚନା ଅନୁସାରେ ତିର୍ତ୍ତୋଲ ଥାନା ମୁଲିସିଂ ଅଞ୍ଚଳର ମୁକ୍ତାର ଖାଁ, ବୋହୂ କଲିମା ବିବି ଏବଂ ଦୁଇ ନାତୁଣୀଙ୍କ ସହିତ ଏଜ ସ୍କୁଟିରେ ମେଡିକାଲ ଯାଉଥିବା ବେଳେ ଚସାପଡ଼ା ନିକଟରେ ଏକ ଟ୍ରକ ତାଙ୍କୁ ଧକ୍କା ଦେଇଥିଲା । ଘଟଣା ସ୍ଥଳରେ କଲିମା ବିବି ଓ ତାଙ୍କ ୬ ମାସର ଝିଅ ଅଲିଆ ଖାତୁନଙ୍କର ମୃତ୍ୟୁ ହୋଇଥିବା ବେଳେ ଶ୍ୱଶୁର ଓ ଅନ୍ୟ ଝିଅ ସାମାନ୍ୟ ଆହତ ହୋଇଛନ୍ତି । ଦୁର୍ଘଟଣା ପରେ ଘଟଣା ସ୍ଥଳରେ ଉତ୍ତେଜନା ପ୍ରକାଶ ପାଇଥିଲା । ଖବର ପାଇ ବାଲିକୁଦା ପୋଲିସ ଘଟଣା ସ୍ଥଳରେ ପହଞ୍ଚି ବୁଝାସୁଝା କରିବା ସହିତ ରେଡ଼କ୍ରସରୁ ମୃତକଙ୍କ ପରିବାରକୁ ୨୦ ହଜ଼ାର ଟଙ୍କା ପ୍ରଦାନ କରାଯାଇଛି ।

ଏବେ ପରିସ୍ଥିତି ଶାନ୍ତ ଥିବା ବେଳେ ଶବ ବ୍ୟବଚ୍ଛେଦ ପାଇଁ ପଠାଇବା ସହିତ ଘଟଣାର ତଦନ୍ତ ଜାରି ରହିଥିବା ବାଲିକୁଦା ଆଇଆଇସି ସଲୀଳ ପ୍ରଧାନ ସୂଚନା ଦେଇଛନ୍ତି ।