Rajasthan School: ସ୍କୁଲ ଛାତ ଭୁଶୁଡି ୪ ମୃତ, ଅନେକ ଆହତ; ଭଗ୍ନାବଶେଷ ତଳେ ଖୋଜା ଚାଲିଛି ଜୀବନ

ଶୁକ୍ରବାର ସକାଳେ ରାଜସ୍ଥାନର ଝାଲାୱାରରେ ଏକ ପ୍ରାଥମିକ ବିଦ୍ୟାଳୟର ଛାତ ଭୁଶୁଡ଼ି ପଡ଼ିବା ଯୋଗୁଁ ଚାରି ଜଣ ଛାତ୍ରଙ୍କର ମୃତ୍ୟୁ ହୋଇଛି ଏବଂ ଅନ୍ୟୂନ ୧୭ ଜଣ ଆହତ ହୋଇଛନ୍ତି। ପିଲାମାନେ କ୍ଲାସ୍‌ରେ ପଢ଼ୁଥିବା ସମୟରେ ସକାଳ ୮ଟା ୩୦ ବେଳେ ଏହି ଦୁର୍ଘଟଣା ଘଟିଛି।

ପିପ୍ଲୋଦି ପ୍ରାଥମିକ ବିଦ୍ୟାଳୟରେ ଭଗ୍ନାବଶେଷ ତଳେ ଫସି ରହିଥିବା ଛାତ୍ର ଓ ସ୍କୁଲ କର୍ମଚାରୀମାନଙ୍କୁ ଉଦ୍ଧାର କରିବା ପାଇଁ ଉଦ୍ଧାର କାର୍ଯ୍ୟ ଆରମ୍ଭ ହୋଇଛି। ପୋଲିସ, ସ୍ଥାନୀୟ ବାସିନ୍ଦା ଏବଂ ଉଦ୍ଧାରକାରୀ ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି।

ଝାଲାୱାର ପୋଲିସ ଅଧୀକ୍ଷକ ଅମିତ କୁମାର କହିଛନ୍ତି, “ଚାରି ଜଣ ପିଲାଙ୍କର ମୃତ୍ୟୁ ହୋଇଛି ଏବଂ ୧୭ ଜଣ ଆହତ ହୋଇଛନ୍ତି। ଦଶ ଜଣ ପିଲାଙ୍କୁ ଝାଲାୱାରକୁ ପଠାଯାଇଛି, ଯେଉଁମାନଙ୍କ ମଧ୍ୟରୁ ତିନିରୁ ଚାରି ଜଣଙ୍କ ଅବସ୍ଥା ଗୁରୁତର ରହିଛି।”

ଏହାକୁ “ଏକ ଦୁଃଖଦ ଘଟଣା” ବୋଲି ଅଭିହିତ କରି ରାଜସ୍ଥାନର ଶିକ୍ଷା ମନ୍ତ୍ରୀ ମଦନ ଦିଲାୱାର କହିଛନ୍ତି ଯେ ସେ “ଗଭୀର ଭାବେ ଦୁଃଖିତ” ଏବଂ ଏକ ଉଚ୍ଚସ୍ତରୀୟ ତଦନ୍ତର ପ୍ରତିଶ୍ରୁତି ଦେଇଛନ୍ତି। “ଆହତ ପିଲାମାନଙ୍କୁ ହସ୍ପିଟାଲରେ ଚିକିତ୍ସା କରାଯାଉଛି, ଏବଂ ସେମାନଙ୍କ ଚିକିତ୍ସା ଖର୍ଚ୍ଚ ସରକାର ବହନ କରିବେ। ଛାତ କାହିଁକି ଭୁଶୁଡ଼ି ପଡ଼ିଲା ତାହା ନିର୍ଣ୍ଣୟ କରିବା ପାଇଁ ଏକ ଉଚ୍ଚସ୍ତରୀୟ ତଦନ୍ତ କରାଯିବ” ବୋଲି ସେ କହିଛନ୍ତି। ମନ୍ତ୍ରୀ ଜିଲ୍ଲା କଲେକ୍ଟରଙ୍କଠାରୁ ଏକ ବିସ୍ତୃତ ବିବରଣୀ ମାଗିଛନ୍ତି।

ଏହି ଘଟଣାକୁ ନେଇ ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହଲଟ କହିଛନ୍ତି, “ଝାଲାୱାରର ମନୋହରଥାନାରେ ଏକ ସରକାରୀ ବିଦ୍ୟାଳୟର ଛାତ ଭୁଶୁଡ଼ି ପଡ଼ି ଅନେକ ପିଲା ଏବଂ ଶିକ୍ଷକଙ୍କର ମୃତ୍ୟୁ ହୋଇଛି। ମୁଁ ଭଗବାନଙ୍କୁ ପ୍ରାର୍ଥନା କରୁଛି ଯେ ଜୀବନହାନି ନ୍ୟୂନତମ ହେଉ ଏବଂ ଆହତମାନେ ଶୀଘ୍ର ସୁସ୍ଥ ହୁଅନ୍ତୁ।”

ଝାଲାୱାର ଏବଂ ଆଖପାଖ ଅଞ୍ଚଳରେ ଗତ କିଛି ଦିନ ଧରି ଉତ୍ତର ଭାରତରେ ମୌସୁମୀ ଜାରି ରହିଥିବା ବେଳେ ପ୍ରବଳ ବର୍ଷା ହୋଇଛି। ତେଣୁ କାନ୍ଥ ଦୁର୍ବଳ ହୋଇ ଏହି ଅଘଟଣ ଘଟିଥିବା କୁହାଯାଉଛି। ଦୁର୍ଘଟଣା ସମୟରେ ସ୍କୁଲରେ ପ୍ରାୟ ଚାଳିଶ ଜଣ ପିଲା ଏବଂ ଅନେକ ଶିକ୍ଷକ ଥିଲେ। ସେମାନଙ୍କ ମଧ୍ୟରୁ ଅନେକ ଭିତରେ ଫସି ରହିଛନ୍ତି। ସ୍କୁଲ କୋଠାଟି ଜୀର୍ଣ୍ଣ ଅବସ୍ଥାରେ ଥିଲା, ଏ ନେଇ ଜିଲ୍ଲା ପ୍ରଶାସନ ନିକଟରେ ପୂର୍ବରୁ ଅନେକ ଅଭିଯୋଗ କରାଯାଇଥିଲା। କିନ୍ତୁ ତାକୁ ଅଣଦେଖା କରାଯାଉଥିଲା।

ଅଧିକ ପଢନ୍ତୁ: ଲିଫ୍ଟରେ ଫସିଗଲେ ୩ ବିଧାୟକ...୨୦ ମିନିଟ୍ ଯାଏଁ ଶ୍ୱାସରୁଦ୍ଧ