Terror alert in Delhi: ଆତଙ୍କବାଦୀଙ୍କ ନିଶାନାରେ ଦିଲ୍ଲୀ! ‍ବଡ଼ ଆକ୍ରମଣ ନେଇ ଗୁଇନ୍ଦା ସୂଚନା ମିଳିବା ପରେ ହାଇ ଆଲର୍ଟ ଜାରି

ଲାଲକିଲ୍ଲା ଅଞ୍ଚଳ ନିକଟରେ ସମ୍ଭାବ୍ୟ ଆତଙ୍କବାଦୀ ଆକ୍ରମଣର ସୂଚନା ମିଳିବା ପରେ ସୁରକ୍ଷା ଏଜେନ୍ସିଗୁଡ଼ିକ ଦିଲ୍ଲୀରେ ହାଇ ଆଲର୍ଟ ଜାରି କରିଛନ୍ତି। ସୂତ୍ର ଅନୁସାରେ, ଚାନ୍ଦିନୀ ଚୌକର ଏକ ପ୍ରମୁଖ ମନ୍ଦିରକୁ ଟାର୍ଗେଟ କରାଯାଇପାରେ। ଗୁଇନ୍ଦା ସୂଚନା ଅନୁଯାୟୀ ପାକିସ୍ତାନ-ଭିତ୍ତିକ ଆତଙ୍କବାଦୀ ସଂଗଠନ ଲସ୍କର-ଏ-ତୋଏବା ଏକ ଆଇଇଡି ବିସ୍ଫୋରଣ ନେଇ ଯୋଜନା କରୁଛି। ଆତଙ୍କୀ ଗୋଷ୍ଠୀ ଭାରତରେ ଏକ ବଡ଼ ଆକ୍ରମଣ କରିବାକୁ ଚେଷ୍ଟା କରିପାରେ ବୋଲି ଗୁଇନ୍ଦା ସୂଚନା ମିଳିବା ପରେ ଏହି ଆଲର୍ଟ ଜାରି କରାଯାଇଥିବାର ଜାତୀୟ ଗଣମାଧ୍ୟମରେ ପ୍ରକାଶ ପାଇଛି।

ଫେବୃଆରୀ ୬ ତାରିଖରେ ପାକିସ୍ତାନର ଇସଲାମାବାଦର ଏକ ମସଜିଦରେ ହୋଇଥିବା ବିସ୍ଫୋରଣର ପ୍ରତିଶୋଧ ସ୍ୱରୂପ ଏହି ଆକ୍ରମଣ ପାଇଁ ଷଡଯନ୍ତ୍ର ରଚୁଛି ଲସ୍କର-ଏ-ତୋଏବା। ପାକିସ୍ତାନର ରାଜଧାନୀ ଇସଲାମାବାଦରେ ହୋଇଥିବା ଏହି ବିସ୍ଫୋରଣରେ ୩୧ ଜଣ ଲୋକ ପ୍ରାଣ ହରାଇଥିଲେ ଏବଂ ୧୦୦ ରୁ ଅଧିକ ଆହତ ହୋଇଥିଲେ। ସୂତ୍ର ଅନୁଯାୟୀ ଏହି ସଂଗଠନ ପ୍ରତିଶୋଧ ନେବାକୁ ଚାହୁଁଛି ଏବଂ ଜାତୀୟ ରାଜଧାନୀରେ ଏକ ବଡ଼ ଧରଣର ଆତଙ୍କବାଦୀ ଘଟଣା ଘଟାଇବାର ସମ୍ଭାବନା ରହିଛି। ଦିଲ୍ଲୀର ପ୍ରମୁଖ ଧାର୍ମିକ ସ୍ଥଳ ଏବଂ ଅନ୍ୟାନ୍ୟ ସମ୍ବେଦନଶୀଳ ସ୍ଥାନଗୁଡ଼ିକ ନିକଟରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। 

ସୂଚନାଯୋଗ୍ୟ, ୨୦୨୫ ମସିହା ନଭେମ୍ବର ୧୦ ତାରିଖରେ ଦିଲ୍ଲୀର ଲାଲକିଲ୍ଲା ନିକଟରେ ଏକ ଭୟଙ୍କର କାର ବୋମା ବିସ୍ଫୋରଣ ହୋଇଥିଲା। ଯେଉଁଥିରେ ୧୨ ଜଣ ଲୋକ ପ୍ରାଣ ହରାଇଥିଲେ ଏବଂ ପ୍ରାୟ ୨୪ ଜଣ ଆହତ ହୋଇଥିଲେ। ଲାଲକିଲ୍ଲା ମେଟ୍ରୋ ଷ୍ଟେସନ ନିକଟରେ ଏହି ବିସ୍ଫୋରଣ ଘଟିଥିଲା। ବିସ୍ଫୋରକ ଭର୍ତ୍ତି ଏକ କାର ବିସ୍ଫୋରଣ ହୋଇଥିଲା, ଯାହା ଦ୍ୱାରା ନିକଟରେ ଥିବା ଅନେକ ଗାଡିରେ ନିଆଁ ଲାଗିଯାଇଥିଲା।

ତଦନ୍ତ ପରେ ଜଣାପଡିଥିଲା ଯେ, ଗାଡିଟି ଫରିଦାବାଦର ଅଲ୍ ଫଲାହ ବିଶ୍ୱବିଦ୍ୟାଳୟର ଡାକ୍ତର ଉମର ମହମ୍ମଦ, ଯିଏକି ଉମର ଉନ୍ ନବି ନାମରେ ମଧ୍ୟ ଜଣାଶୁଣା ସେ ଚଳାଉଥିଲେ। ସେହି ଦିନ, ଦିଲ୍ଲୀରୁ ପ୍ରାୟ ୫୦ କିଲୋମିଟର ଦୂର ହରିୟାଣାର ଫରିଦାବାଦରେ ଆମୋନିୟମ୍ ନାଇଟ୍ରେଟ୍ ସମେତ ୨,୯୦୦ କିଲୋଗ୍ରାମ ବିସ୍ଫୋରକ ଜବତ କରାଯାଇଥିଲା।

ତଦନ୍ତକାରୀମାନେ ମଡ୍ୟୁଲର ୨ ପ୍ରମୁଖ ସଦସ୍ୟ ଡାକ୍ତର ମୁଜାମ୍ମିଲ ଶକିଲ ଏବଂ ଡାକ୍ତର ଆଦିଲ ରାଥରଙ୍କୁ ଗିରଫ କରିବା ଏବଂ ବିସ୍ଫୋରକ ସାମଗ୍ରୀ ଜବତ କରିବା ପରେ ଉମର ମହମ୍ମଦ ଆତଙ୍କିତ ହୋଇ ଲାଲକିଲ୍ଲା ନିକଟରେ ବିସ୍ଫୋରଣ ଘଟାଇଥିବା ଜଣାପଡିଥିଲା।