Auramine Dye in Roasted Chana: ଭଜା ବୁଟ ଖାଉଥିଲେ ସାବଧାନ! ହୋଇପାରେ କ୍ୟାନ୍ସର... ଆସିଲା ସାଂଘାତିକ ତଥ୍ୟ

ଆମେ ଭଜା ବୁଟକୁ ଏକ ସ୍ୱାସ୍ଥ୍ୟକର ଖାଦ୍ୟ ଭାବି ଖାଇଥାଉ । ମେଳା ହେଉ କି ଦୋକାନ ବଜାର, ସବୁଠି ବିକ୍ରି ହୋଇଥାଏ ଏହି ବୁଟ ଭଜା । ଯଦି ଆପଣ ବି ବଜାରରେ ମିଳୁଥିବା ଏହି ଭଜା ବୁଟ ଖାଇବାକୁ ପସନ୍ଦ କରନ୍ତି, ତାହେଲେ ହୋଇଯାଆନ୍ତୁ ହୁସିଆର ! ନଚେତ୍‌ ମାରାତ୍ମକ ରୋଗରେ ପଡିବେ ଆପଣ । କାରଣ ଏହି ବୁଟ ଭଜାରେ ମିଶୁଛି ଏମିତି ଏକ କେମିକାଲ ଯାହା କ୍ୟାନ୍ସର ସୃଷ୍ଟି କରେ ।

ଏକ ରିପୋର୍ଟରେ ଦାବି କରାଯାଇଛି ଯେ, ମାର୍କେଟରେ ବିକ୍ରି ହେଉଥିବା ଭଜା ବୁଟରେ 'ଅରାମାଇନ' ନାମକ କେମିକାଲ ମିଶାଯାଉଛି । ଅରାମାଇନ କପଡା ଓ ଲେଦରକୁ ରଙ୍ଗ ଦେବାରେ ବ୍ୟବହୃତ ହୁଏ । ଏହା ମଣିଷ ଶରୀର ପାଇଁ ଖୁବ୍ ହାନିକାରକ । ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ମଧ୍ୟ ଏହି କେମିକାଲକୁ କ୍ୟାନ୍ସସର ସୃଷ୍ଟିକାରୀ ବୋଲି କହିଛି ।

ଭଜା ବୁଟରେ ଚମକ ବଢାଇବାକୁ ଅରାମାଇନ ବ୍ୟବହାର କରାଯାଉଛି । ଏହି କେମିକାଲ ହଳଦୀର ରଙ୍ଗ ଭଳି । ବୁଟ ଭଜା ଯିବା ପରେ ସେଥିରେ ଅରାମାଇନ ଗୁଣ୍ଡକୁ ପାଣିରେ ମିଶାଇ ବୁଟରେ ଢଳାଯାଉଛି । ଏହା ଦ୍ୱାରା ବୁଟ ଦେଖିବାକୁ ସୁନ୍ଦର, ସତେଜ ଲାଗୁଛି ଓ ଖାଇବାକୁ ବି କୁରକୁରା ଲାଗୁଛି । ତେଣୁ ନିୟମିତ ଏହି ଭଜା ବୁଟକୁ ଖାଇବା ଦ୍ୱାରା କ୍ୟାନ୍ସର ଭଳି ମାରାତ୍ମକ ରୋଗ ହୋଇପାରେ ବୋଲି କୁହାଯାଉଛି ।

ଶିବସେନା ସାଂସଦ ପ୍ରିୟଙ୍କା ଚତୁର୍ବେଦୀ ଏହି ଗମ୍ଭୀର ଅପମିଶ୍ରଣ ପ୍ରସଙ୍ଗ ଉଠାଇଛନ୍ତି । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେପି ନଡ୍ଡାଙ୍କୁ ଚିଠି ଲେଖି ଏ ଦିଗରେ କଡା କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଏହା କେବଳ ଖାଦ୍ୟ ନିରାପତ୍ତା ଆଇନର ଉଲ୍ଲଙ୍ଘନ ନୁହେଁ, ବରଂ ଭାରତର କୋଟି କୋଟି ଲୋକଙ୍କ ସ୍ୱାସ୍ଥ୍ୟ ଓ ଜୀବନ ପ୍ରତି ବିପଦ ବୋଲି କହିଛନ୍ତି ପ୍ରିୟଙ୍କା ।

କିଛି ଦିନ ତଳେ ଜଣେ ଯୁବକ ମଧ୍ୟ ଏକ ଭିଡିଓ ସେୟାର କରି ଭଜା ବୁଟରେ ଅପମିଶ୍ରଣ ବିଷୟରେ କହିଥିଲେ । ବଜାରରେ ମିଳୁଥିବା କେମିକାଲ ମିଶ୍ରିତ ଭଜା ବୁଟ ଓ ଘରେ ତିଆରି ଭଜା ବୁଟ ଦେଖାଇ ସେଥିରେ ପାର୍ଥକ୍ୟ ସାମ୍ନାକୁ ଆଣିଥିଲେ । ବଜାରରେ ମିଳୁଥିବା ବୁଟ ଚମକଦାର ଓ ସହଜରେ ଭାଙ୍ଗି ଯାଉଥିବା ବେଳେ ଅପମିଶ୍ରଣ ନ ହୋଇଥିବା ବୁଟ ଆକାରରେ ଛୋଟ ଓ ଟାଣ ଅଟେ । ଏହି ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ ହୋଇଥିଲା ।