Sukhoi jet crashes: ସୁଖୋଇ ଯୁଦ୍ଧ ବିମାନ ଦୁର୍ଘଟଣାଗ୍ରସ୍ତ, ୨ ବାୟୁସେନା ପାଇଲଟ ସହିଦ

ଆସାମ (Assam) ରେ ସୁଖୋଇ-୩୦ ବିମାନ ଦୁର୍ଘଟଣାରେ ସ୍କ୍ୱାଡ୍ରନ୍ ଲିଡର ଅନୁଜ ଏବଂ ଫ୍ଲାଇଟ୍ ଲେଫ୍ଟନାଣ୍ଟ ପୂର୍ବେଶ ଦୁରାଗକରଙ୍କ ମୃତ୍ୟୁ ହୋଇଛି। ଭାରତୀୟ ବାୟୁସେନା ସ୍କ୍ୱାଡ୍ରନ୍ ଲିଡର ଅନୁଜ ଏବଂ ଫ୍ଲାଇଟ୍ ଲେଫ୍ଟନାଣ୍ଟ ପୂର୍ବେଶ ଦୁରାଗକରଙ୍କ ମୃତ୍ୟୁରେ ଗଭୀର ଶୋକ ପ୍ରକାଶ କରିଛି। ସେନା କହିଛି ଯେ ଭାରତୀୟ ବାୟୁସେନା ଶୋକସନ୍ତପ୍ତ ପରିବାର ପ୍ରତି ସମବେଦନା ପ୍ରକାଶ କରୁଛି ଏବଂ ଏହି ଦୁଃଖର ମୁହୂର୍ତ୍ତରେ ସେମାନଙ୍କ ସହିତ ଦୃଢ଼ ଭାବରେ ଠିଆ ହୋଇଛି। 

ଗୁରୁବାର, ଏକ IAF ସୁଖୋଇ Su-30MKI ଲଢ଼ୁଆ ବିମାନ ନିଖୋଜ ହୋଇଯାଇଥିବାର ଖବର ଆସିଥିଲା। ଆସାମର କାର୍ବି ଆଙ୍ଗଲଙ୍ଗ ଜିଲ୍ଲାରେ ଉଡ଼ୁଥିବା ସମୟରେ ସୁଖୋଇ Su-30MKI ରାଡାର ଯୋଗାଯୋଗ ହରାଇଥିଲା। ଗତକାଲି ସନ୍ଧ୍ୟା ପ୍ରାୟ ୭ଟା ୪୫ ମିନିଟରେ ଆସାମ କାର୍ବି ଆଙ୍ଗଲଙ୍ଗ ଜିଲ୍ଲାରେ ଦୁର୍ଘଟଣାଗ୍ରସ୍ତ ହୋଇଥିଲା ସୁଖୋଇ। ଜୋରହାଟରୁ ପ୍ରାୟ ୬୦ କିଲୋମିଟର ଦୂର ଏକ ପାହାଡ଼ ଉପରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ବାୟୁସେନାର ସୂଚନା ଅନୁସାରେ, ବିମାନଟି ଆସମର ଜୋରହାଟ୍ ଏୟାର ବେସରୁ ରୁଟିନ୍ ଟ୍ରେନିଂ ପାଇଁ ଉଡ଼ାଣ ଆରମ୍ଭ କରି ୭ଟା ୪୨ ମିନିଟରେ ରାଡାର୍ ସମ୍ପର୍କରୁ ବିଚ୍ଛିନ୍ନ ହୋଇଯାଇଥିଲା।

ସୁଖୋଇ ବିମାନ ଦୁର୍ଘଟଣାରେ ପାଇଲଟଙ୍କ ମୃତ୍ୟୁ ପାଇଁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଦୁଃଖ ପ୍ରକାଶ କରି କହିଛନ୍ତି, "ସ୍କ୍ୱାଡ୍ରନ୍ ଲିଡର ଅନୁଜ ଏବଂ ଫ୍ଲାଇଟ୍ ଲେଫ୍ଟନାଣ୍ଟ ପୂର୍ବେଶ ଦୁରାଗକରଙ୍କ ମୃତ୍ୟୁରେ ମୁଁ ଗଭୀର ଦୁଃଖିତ। ଆମେ ସର୍ବଦା ଗର୍ବ ଏବଂ କୃତଜ୍ଞତାର ସହିତ ସେମାନଙ୍କ ସାହସ ଏବଂ ଦେଶ ପ୍ରତି ସେବାକୁ ମନେ ରଖିବୁ। ଶୋକସନ୍ତପ୍ତ ପରିବାର ପ୍ରତି ମୋର ସମବେଦନା। ଏହି ଦୁଃଖର ମୁହୂର୍ତ୍ତରେ ସମଗ୍ର ଦେଶ ସେମାନଙ୍କ ସହିତ ଦୃଢ଼ ଭାବରେ ଠିଆ ହୋଇଛି।"

ସୂଚନାଯୋଗ୍ୟ, ସୁଖୋଇ-30 MKI ଭାରତୀୟ ବାୟୁସେନାର ଏକ ଆଧୁନିକ ଲଢ଼ୁଆ ବିମାନ (Fighter Jet) ଏବଂ ଏହା ଭାରତର ସାମଗ୍ରିକ ବାୟୁ ପ୍ରତିରକ୍ଷା କ୍ଷମତାର ଏକ ଗୁରୁତ୍ୱପୂର୍ଣ୍ଣ ଅଂଶ। ଅଗଷ୍ଟ ୨୦୧୯ରେ, ସୁଖୋଇ-30 MKI ଏକ ନିୟମିତ ତାଲିମ ମିଶନ ସମୟରେ ଆସାମର ତେଜପୁର ନିକଟରେ ଏକ ଧାନ କ୍ଷେତରେ ଦୁର୍ଘଟଣାଗ୍ରସ୍ତ ହୋଇଥିଲା। ଉଭୟ ପାଇଲଟ୍ ସୁରକ୍ଷିତ ଭାବରେ ବାହାରକୁ ବାହାରି ଆସିଥିଲେ ଏବଂ ପରେ ସେମାନଙ୍କୁ ଉଦ୍ଧାର କରାଯାଇଥିଲା। ପୂର୍ବରୁ, ମେ ୨୦୧୫ରେ, ଆଉ ଏକ ସୁଖୋଇ-30 MKI ବିମାନ ଉଡ଼ାଣ ଆରମ୍ଭ ହେବାର କିଛି ସମୟ ପରେ ତେଜପୁର ବାୟୁସେନା ଘାଟିରୁ ପ୍ରାୟ ୩୬ କିଲୋମିଟର ଦକ୍ଷିଣରେ ଦୁର୍ଘଟଣାଗ୍ରସ୍ତ (Fighter Jet Crash) ହୋଇଥିଲା, ଦୁର୍ଘଟଣା ପୂର୍ବରୁ ଉଭୟ ପାଇଲଟ୍ ସୁରକ୍ଷିତ ଭାବରେ ବାହାରକୁ ବାହାରି ଆସିଥିଲେ। ଏହି ଯୁଦ୍ଧ ବିମାନ ରୁଷ ଦ୍ବାରା ନିର୍ମିତ।