ମହାମାରୀରେ ମନ କିଣିନେଲେ ଦୃଷ୍ଟିବାଧିତ ଯୁବତୀ ବୋଡୁ ନାଗା ଲକ୍ଷ୍ମୀ

• ସହାୟତାର ହାତ ବଢ଼ାଇଲେ ଦେଶର ସବୁଠାରୁ ଧନୀ ଯୁବତୀ
• ସୋନୁ ସୁଦ ଫାଉଣ୍ଡେସନକୁ ୧୫୦୦୦ ସହାୟତା ରାଶି ପ୍ରଦାନ କଲେ ଦୃଷ୍ଟିବାଧିତ ଯୁବତୀ
• ସୋନୁ କହିଲେ, ଯନ୍ତ୍ରଣା ଦେଖିବାକୁ ଆଖିର ଆବଶ୍ୟକତା ନାହିଁ

ଭାରତର ସବୁଠାରୁ ଧନୀ ଯୁବତୀ ବୋଡୁ ନାଗା ଲକ୍ଷ୍ମୀ । ସେ ଧନରେ ବଡ଼ ହୋଇ ନାରପାରନ୍ତି, କିନ୍ତୁ ମନରେ ବଡ଼, ବଡ଼ ପଣିଆରେ ବଡ଼, ଦୁଃଖୀଙ୍କୁ ସାହାଯ୍ୟ କରିବାରେ ବଡ଼ । ମହାମାରୀର ମହାସଙ୍କଟ ମଧ୍ୟରେ ହୃଦୟ ଜିତିନେଲେ ଦୃଷ୍ଟିବାଧିତ ଯୁବତୀ । ସଂକ୍ରମଣ ପ୍ରବଣତାରେ ଲୋକଙ୍କ ମସିହା ସାଜିଥିବା ସୋନୁ ସୁଦଙ୍କ ଫାଉଣ୍ଡେସନକୁ ୧୫୦୦୦ ଟଙ୍କା ସହାୟତା ରାଶି ପ୍ରଦାନ କରିଛନ୍ତି । ଆଉ ତାଙ୍କ ଠାରୁ ସହାୟତା ରାଶି ଗ୍ରହଣ କରି ଦୃଷ୍ଟିବାଧିତ ଯୁବତୀଙ୍କ ପ୍ରଶଂସାରେ ଶତମୁଖ ହୋଇଛନ୍ତି ସୋନୁ ସୁଦ୍ ।

ଆନ୍ଧ୍ରପ୍ରଦେଶର ଏକ ଛୋଟ ଗାଁ ପ୍ୱରିକୁଣ୍ଟାପଡ଼ୁର ଝିଅ ବୋଡୁ ନାଗା ଲକ୍ଷ୍ମୀ । ଜନ୍ମରୁ ଦୃ୍‌ଷ୍ଟିବାଧିକ । ହେଲେ ଭିନ୍ନକ୍ଷମ ବୋଲି କେବେ ହାରି ଯାଇନାହାନ୍ତି । ଦୃଢ଼ପ୍ରତ୍ୟୟ ହୋଇ ନିଜେ ନିଜ ଦାୟିତ୍ୱ ନେଉଛନ୍ତି । ଆଉ ସବୁଠାରୁ ବଡ଼ କଥା ହେଲେ ସେ ଜଣେ ସଫଳ ୟୁଟ୍ୟୁବର । ନିଜ ଆଖିରେ ସେ ଦୁନିଆ ଦେଖି ପାରୁନାଆନ୍ତି, ସିନା ଅଦୃଶ୍ୟ ଭାଇରସରେ କବଳିତ ଲୋକଙ୍କ ବ୍ୟଥାକୁ ଭଲରେ ହୃଦୟଙ୍ଗମ କରିପାରୁଛନ୍ତି । ଆଉ ଏଥିପାଇଁ ସେମାନଙ୍କୁ ସାଧ୍ୟମତେ ସହଯୋଗ କରିବାକୁ ସୋନୁ ସୁଦଙ୍କ ଫାଉଣ୍ଡେସନକୁ କିଛି ରାଶି ପ୍ରଦାନ କରିଛନ୍ତି । ତେବେ ଏନେଇ ନିଜେ ଟ୍ୱିଟ କରି ସୂଚନା ଦେଇଛନ୍ତି ଗରିବଙ୍କ ଦେବଦୂତ ସୋନୁ ସୁଦ୍ । ସୋନୁଙ୍କ କାର୍ଯ୍ୟ ଦେଖି ବିଶ୍ୱା ସାରା ଲୋକେ ତାଙ୍କୁ ପ୍ରଶଂସାରେ ପୋତି ପକାଉଥିବା ବେଳେ ସେ ନିଜେ କିନ୍ତୁ ବୋଡୁ ନାଗା ଲକ୍ଷ୍ମୀଙ୍କର ବଡ଼ ପ୍ରଶଂସକ ପାଲଟି ଯାଇଛନ୍ତି ।

ବୋଡୁ ନାଗା ଲକ୍ଷ୍ମୀଙ୍କଙ୍କ ଫଟୋ ସେୟାର କରି ସୋନୁ କହିଛନ୍ତି, ଏହି ଯୁବତୀ ତାଙ୍କ ଫାଉଣ୍ଡେସନକୁ ୧୫୦୦୦ ଟଙ୍କା ଦାନ କରିଛନ୍ତି। ମୋ ପାଇଁ ସେ ଦେଶର ସବୁଠାରୁ ଧନୀ ଯୁବତୀ । ମୋ ମତରେ କାହାର ଯନ୍ତ୍ରଣା ଦେଖିବା ପାଇଁ ଆଖିର ଆବଶ୍ୟକତା ନାହିଁ । କାରଣ ଆଖି ନଥାଇ ମଧ୍ୟ ଲୋକଙ୍କ ଦୁଃଖ, କଷ୍ଟ, ଯନ୍ତ୍ରଣାକୁ ଠିକ ବୁଝି ପାରୁଛନ୍ତି ବୋଡୁ ନାଗା ଲକ୍ଷ୍ମୀ । ଆଉ ସେ ଲୋକଙ୍କୁ ସାହାଯ୍ୟ କରିବାକୁ ତାଙ୍କର ପାଞ୍ଚ ମାସର ଭତ୍ତା ରାଶି ଦାନ କରିଦେଇଛନ୍ତି ।