ଆମାଜନ ସିଇଓ ପଦ ଛାଡ଼ିବେ ଜେଫ୍ ବେଜୋସ୍ : ଦାୟିତ୍ୱ ଗ୍ରହଣ କରିବେ ଆଣ୍ଡି ଜେସି

ବିଶ୍ୱର ସର୍ବବୃହତ ଇ-କମର୍ସ କମ୍ପାନୀ ଆମାଜନର ସିଇଓ ଜେଫ ବେଜୋସ ଖୁବ ଶୀଘ୍ର ପଦରୁ ଇସ୍ତଫା ଦେବେ । ନିଜ ପଦ ଛାଡିବା ପାଇଁ ସେ ତାରିଖ ଘୋଷଣା କରି ସାରିଛନ୍ତି । ଜେଫ ବେଜୋସ୍ ଜୁଲାଇ ୫ରେ ଆମାଜନର ସିଇଓ ପଦରୁ ଇସ୍ତଫା ଦେବେ। ଏହାପୂର୍ବରୁ ଫେବୃଆରୀରେ କମ୍ପାନୀ ପକ୍ଷରୁ କୁହାଯାଉଥିଲା ବେଜୋସ୍ ବର୍ଷ ଶେଷ ସୁଦ୍ଧା ତାଙ୍କ ପଦ ଛାଡିବେ।

୨୭ ବର୍ଷ ପୂର୍ବେ ଏହି ଦିନ ଆମାଜନ କମ୍ପାନୀ ପ୍ରତିଷ୍ଠା କରାଯାଇଥିଲା । ବେଜୋସଙ୍କ ସ୍ଥାନରେ ଆମାଜନ ୱେବ୍ ସର୍ଭିସର ହେଡ୍ ଆଣ୍ଡି ଜେସି ସିଇଓ ଦାୟିତ୍ୱ ଗ୍ରହଣ କରିବେ।  ଆଣ୍ଡି ଜେସି ୧୯୯୭ ରେ ମାର୍କେଟିଂ ମ୍ୟାନେଜର ଭାବରେ ଆମାଜନରେ ଯୋଗ ଦେଇଥିଲେ । ୨୦୦୩ରେ କମ୍ପାନୀରେ କ୍ଲାଉଡ୍ ସର୍ଭିସେସ୍ ଡିଭିଜନର ପ୍ରତିଷ୍ଠା କରିଥିଲେ । ଏହା ଆମାଜନ ପାଇଁ ସବୁଠାରୁ ଲାଭଜନକ ୟୁନିଟ୍ ମଧ୍ୟରୁ ଗୋଟିଏ ।

ବୁଧବାର ଦିନ ଆମାଜନ ସେୟାର ହୋଲ୍ଡର ବୈଠକରେ ବେଜୋସ କହିଛନ୍ତି, ଏହି ତାରିଖରେ ପଦ ଛାଡ଼ିବା ନିଷ୍ପତ୍ତି ପଛରେ ଏକ ବିଶେଷ କାରଣ ରହିଛି । ଏହି ତାରିଖ ମୋ ପାଇଁ ଭାବନାତ୍ମକ ମହତ୍ତ୍ୱ ବହନ କରେ । ଠିକ୍ ୨୭ ବର୍ଷ ପୂର୍ବେ ୧୯୯୪ ରେ ଆମାଜନ ଏହି ଦିନ ଆରମ୍ଭ ହୋଇଥିଲା । ସିଇଓ ପଦରୁ ଇସ୍ତଫା ଦେବାପରେ ଜେଫ୍ ବେଜୋସ୍ ଆମାଜନର ଏକଜିକ୍ୟୁଟିଭ୍ ଚେୟାମ୍ୟାନ ରୂପେ କାର୍ଯ୍ୟଭାର ସମ୍ଭାଳିବେ । ଏହାସହ ନୂଆ ସାମଗ୍ରୀ ଉପରେ ଧ୍ୟାନ ଦେବେ । ବେଜୋସ୍ ଆର୍ଥ ଫଣ୍ଡ, ବ୍ଲୁ ଅରିଜିନ୍ ସ୍ପେସ୍ ସିପ୍ କମ୍ପାନୀ, ଆମାଜନ୍ ଡେ ୱାନ୍ ଫଣ୍ଡ୍ ଏବଂ ୱାଶିଂଟନ୍ ପୋଷ୍ଟ ଭଳି କମ୍ପାନୀ ଉପରେ ମଧ୍ୟ ଧ୍ୟାନ ଦେବେ ।

୧୯୯୪ରେ ଜେଫ୍ ବେଜୋସ୍ ତାଙ୍କ ଗ୍ୟାରେଜରେ ଏକ ଅନଲାଇନ୍ ବୁକ୍ ଷ୍ଟୋର ଭାବରେ ଆମାଜନ ଆରମ୍ଭ କରିଥିଲେ । ଆଜି ଆମାଜନ ଅନଲାଇନ୍ ଖୁଚୁରା ବ୍ୟବସାୟର ବେତାଜ ବାଦଶାହା ପାଲଟି ଯାଇଛି । ସାରା ବିଶ୍ୱରେ ସମସ୍ତ ପ୍ରକାରର ଉତ୍ପାଦ ବିକ୍ରୟ ଏବଂ ବିତରଣ କରୁଛି କମ୍ପାନୀ । ଆମାଜନ୍ ଖୁଚୁରା ବ୍ୟବସାୟ ବ୍ୟତୀତ କମ୍ପାନୀ ଷ୍ଟ୍ରିମିଂ, ମ୍ୟୁଜିକ୍ ଏବଂ ଟେଲିଭିଜନ୍, କ୍ଲାଉଡ୍ କମ୍ପ୍ୟୁଟିଂ, ରୋବୋଟିକ୍ସ, ଏଇ ଭଳି କ୍ଷେତ୍ରରେ ମଧ୍ୟ କାର୍ଯ୍ୟ କରୁଛି।