Police Bust SI Job Scam: ଟଙ୍କା ଦିଅ ପୋଲିସ ଚାକିରି ନିଅ ! ୧୦୦ରୁ ଅଧିକ ଆଶାୟୀଙ୍କ ସହ କ’ଣ ହୋଇଥିଲା ଡିଲ୍ ?

ବିକ୍ରି ହୋଇଥିଲା କି ପୋଲିସ ଚାକିରି ? ୧୦୦ରୁ ଅଧିକ ଆଶାୟୀଙ୍କ ସହ କ’ଣ ହୋଇଥିଲା ଡିଲ୍ ? କାହିଁକି ଚାକିରି ଆଶାୟୀଙ୍କୁ ସ୍ପେଶାଲ୍ କୋଚିଂ ଦେଉଥିଲା ପରୀକ୍ଷା ପରିଚାଳନା ସଂସ୍ଥା ? ରାଜ୍ୟରେ ମାଳମାଳ ବେକାରୀ, ଚାକିରି ଖଣ୍ଡିଏ ନପାଇ ଯୁବପିଢ଼ି ଚିନ୍ତାରେ ରହୁଛନ୍ତି । ଅନେକ ସମୟରେ ଖୁବ୍ କମ୍ ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇବା ପରେ ଲକ୍ଷ ଲକ୍ଷ ଆଶାୟୀ ଆବେଦନ କରୁଥିବା ଦେଖିବାକୁ ମିଳୁଛି । ଏପରି ସମୟରେ ପୁଣି ଚାକିରିକୁ ନେଇ ଆସିଛି ଚଞ୍ଚକତା ଅଭିଯୋଗ । ବ୍ରହ୍ମପୁରରେ ଚାକିରି ରାକେଟର ପର୍ଦ୍ଦାଫାସ୍ କରିଛି ପୋଲିସ । 

ପୋଲିସ ସବ-ଇନ୍ସପେକ୍ଟର ଚାକିରିରେ ଜାଲିଆତି ପାଇଁ ବଡ଼ ଡିଲ୍ ହୋଇଥିଲା । ଖୋଦ୍ ପରୀକ୍ଷା ପରିଚାଳନା ଦାୟିତ୍ବ ନେଇଥିବା ସଂସ୍ଥା ଆଶାୟୀଙ୍କୁ ସ୍ପେଶାଲ୍ କୋଚିଂ ଦେବାକୁ ନେଉଥିଲା ହାଇଦ୍ରାବାଦ । ୧୦୦ରୁ ଅଧିକ ଆଶାୟୀଙ୍କୁ ହାଇଦ୍ରାବାଦ ନେଇ ସ୍ପେଶାଲ୍ କୋଟିଂ ଦେବାକୁ ପ୍ରୟାସ କରୁଥିଲା । ସେମାନଙ୍କ ପିଛା କରି ପରୀକ୍ଷାର୍ଥୀଙ୍କୁ ଅଟକ ରଖିଛି ବ୍ରହ୍ମପୁର ପୋଲିସ । ଆନ୍ଧ୍ର ପ୍ରଦେଶ ଶ୍ରୀକାକୁଲମରେ ପୋଲିସ ଧରିବା ପରେ ବ୍ରହ୍ମପୁର ଆଣି ପଚରାଉଚୁରା କରୁଥିବା ସୂଚନା ମିଳିଛି । 

 ତେବେ ଚାକିରି ଜାଲିଆତି ପଛରେ କିଏ ସେନେଇ ପୋଲିସ ଛାନଭିନ ଚଳାଇଛି । ହେଲେ ଏଠି ପ୍ରଶ୍ନ ଉଠୁଛି- ପରୀକ୍ଷା ପରିଚାଳନା ଦାୟିତ୍ବ ପାଇଥିବା ସଂସ୍ଥା କିଭଳି ପିଲାଙ୍କୁ ଦେଉଥିଲା ସ୍ପେଶାଲ୍ କୋଚିଂ ? ପୂର୍ବରୁ ବି ଏଭଳି ସ୍ପେଶାଲ କୋଚିଂ ଦେଇନି ତ ସଂପୃକ୍ତ ସଂସ୍ଥା ? କେବେଠାରୁ ଚାଲିଛି ଏଭଳି ଚାକିରି ଜାଲିଆତି ? ଏହା ପଛରେ ଟଙ୍କା କାରବାର ହୋଇନି ତ ? ବିକ୍ରି ହୋଇନି ତ ପୋଲିସ ସବ-ଇନ୍ସପେକ୍ଟର ପଦବୀ ? ଏନେଇ ବିଭିନ୍ନ ଦିଗରୁ ଛାନଭିନ ଚଳାଇଛି ବ୍ରହ୍ମପୁର ପୋଲିସ । ତେବେ ଏନେଇ ପୋଲିସ କିମ୍ବା ସଂପୃକ୍ତ ସଂସ୍ଥା ତରଫରୁ ପ୍ରତିକ୍ରିୟା ମିଳିପାରିନି ।