Pakistan Proposes Trump: ପାକିସ୍ତାନ ସେନା ମୁଖ୍ୟ ଆସିମ ମୁନିରଙ୍କ ନୂଆ ପ୍ଲାନ୍ , ଆରବସାଗରରେ ବନ୍ଦର ନିର୍ମାଣ କରିବ ଆମେରିକା !

ପାକିସ୍ତାନ ଆମେରିକାକୂ ଆରବ ସାଗର ତଟରେ ଏକ ନୂଆ ବନ୍ଦର ନିର୍ମାଣ ଓ ପରିଚାଳନା କରିବାର ପ୍ରସ୍ତାବ ଦେଇଛି। ଏହି ଆଶ୍ଚର୍ଯ୍ୟଜନକ ପ୍ରସ୍ତାବ ପାକିସ୍ତାନ ସେନା ମୁଖ୍ୟ ଜେନେରାଲ ଆସିମ ମୁନିରଙ୍କ ପରାମର୍ଶଦାତାଙ୍କ ତରଫରୁ ଆମେରିକାର ଅଧିକାରୀମାନଙ୍କୁ ଦିଆଯାଇଛି। ଏକ ରିପୋର୍ଟ ଅନୁସାରେ, ଏହି ଯୋଜନାରେ ଆମେରିକାର ନିବେଶକମାନଙ୍କ ତରଫରୁ ପାକିସ୍ତାନର ପାସନୀ ସହରରେ ଏକ ଟର୍ମିନାଲ ନିର୍ମାଣ କରାଯିବ। ଆରବ ସାଗରରେ ନିର୍ମିତ ହେବାକୁ ଥିବା ଏହି ବନ୍ଦର ସାହାଯ୍ୟରେ ଗୋଟିଏ ପଟେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଆକର୍ଷିତ କରିବାର ଉଦ୍ୟମ କରାଯାଉଛି, ତେବେ ଅନ୍ୟପଟେ ପାକିସ୍ତାନର ଏହି ପଦକ୍ଷେପ ଚୀନର ରାଷ୍ଟ୍ରପତି ଶି ଜିନପିଙ୍ଗଙ୍କୁ କ୍ଷୁବ୍ଧ କରିପାରେ।

ଏହି ବନ୍ଦର ସାହାଯ୍ୟରେ ୱାଶିଂଟନକୁ ବିଶ୍ୱର ଅତି ସମ୍ବେଦନଶୀଳ ଅଞ୍ଚଳଗୁଡ଼ିକ ମଧ୍ୟରୁ ଗୋଟିଏରେ ପାଦ ରଖିବାରେ ସହାୟତା ମିଳିପାରେ। ସେମାନେ ପାକିସ୍ତାନ ସେନା ମୁଖ୍ୟ ଆସିମ ମୁନିରଙ୍କ ପରାମର୍ଶଦାତାଙ୍କ ତରଫରୁ ପ୍ରସ୍ତୁତ ଏହି ଯୋଜନା ଉପରେ ନଜର ରଖିଛନ୍ତି। ପାସନୀ ଏକ ମାଛଧରା ସହର ଭାବେ ପରିଚିତ। ଆମେରିକା ଏହାକୁ ପାକିସ୍ତାନର ମୂଲ୍ୟବାନ ଖଣିଜ ସମ୍ପଦ ପାଇଁ ଏକ ଟର୍ମିନାଲ ଭାବେ ବିକଶିତ କରିବାକୁ ଯାଉଛି। ତେବେ ଏପର୍ଯ୍ୟନ୍ତ ଏହା ଉପରେ କୌଣସି ଆଧିକାରିକ ମନ୍ତବ୍ୟ ଦିଆଯାଇ ନାହିଁ।

ଚୀନ ଓ ଭାରତ ଉପରେ ପ୍ରଭାବ

ଅନ୍ୟପଟେ ପାସନୀ ଇରାନରୁ ପ୍ରାୟ ୧୬୦ କିଲୋମିଟର ଓ ପାକିସ୍ତାନୀ ସହର ଗ୍ୱାଦରଠାରୁ କିଛି କିଲୋମିଟର ଦୂରରେ ଅବସ୍ଥିତ। ଗ୍ୱାଦରରେ ଚୀନର ସହାୟତାରେ ଏକ ବନ୍ଦର ନିର୍ମିତ ହୋଇଛି। ପାକିସ୍ତାନର ଏହି ବନ୍ଦର ବାଲୁଚିସ୍ତାନର ଗ୍ୱାଦର ଜିଲ୍ଲାର ପାସନୀ ସହରରେ ଅବସ୍ଥିତ ହେବ। ପାସନୀ ଏକପଟେ ଚୀନ ନିର୍ମିତ ଗ୍ୱାଦର ବନ୍ଦରର ନିକଟବର୍ତ୍ତୀ ହୋଇଥିବା ବେଳେ ଅନ୍ୟପଟେ ଇରାନରେ ଭାରତ ଦ୍ୱାରା ବିକଶିତ ଚାବାହାର ବନ୍ଦରରେ ମଧ୍ୟ ନିକଟବର୍ତ୍ତୀ। ଭାରତର ଦୃଷ୍ଟି ମଧ୍ୟ ଏହି ବଡ଼ ଘଟଣାକ୍ରମ ଉପରେ ରହିବ। ଚାବାହାରଠାରୁ ପାସନୀର ଦୂରତା ମାତ୍ର ୩୦୦ କିଲୋମିଟର। ଭାରତ ଏଠାରେ ଶାହିଦ ବେସ୍ତି ଟର୍ମିନାଲ ନିର୍ମାଣ କରୁଛି।

ବିଶେଷଜ୍ଞଙ୍କ ମତରେ, ପାକିସ୍ତାନ ଏହା କହି ଆମେରିକାକୁ ଖୁସି କରିବାକୁ ଚେଷ୍ଟା କରିଛି ଯେ ପାସନୀର ଇରାନ ଓ ମଧ୍ୟ ଏସିଆ ସହ ନିକଟତା ଅମେରିକାର ବ୍ୟାପାର ବିକଳ୍ପଗୁଡ଼ିକୁ ବୃଦ୍ଧି କରିବ।  ଏହା ଆରବ ସାଗର ଓ ମଧ୍ୟ ଏସିଆରେ ଅମେରିକୀୟ ପ୍ରଭାବକୁ ମଧ୍ୟ ବୃଦ୍ଧି କରିବ। ରୋଚକ କଥା ହେଉଛି ପାକିସ୍ତାନରେ ଗ୍ୱାଦର ବନ୍ଦର ମଧ୍ୟ ରହିଛି, ଯାହାର ନିର୍ମାଣ ଓ ପରିଚାଳନା ଚୀନ କରୁଛି। ପାସନୀ ଗ୍ୱାଦରଠାରୁ ମାତ୍ର ୧୦୦ କିଲୋମିଟର ଦୂରରେ ଅବସ୍ଥିତ, ଯେଉଁଠାରେ ଚୀନ ବନ୍ଦର ସୁବିଧା ପରିଚାଳନା କରୁଛି।

ଏହା ଦର୍ଶାଉଛି ଯେ ପାକିସ୍ତାନର ଅଧିକାରୀମାନେ ଦକ୍ଷିଣ ଏସିଆରେ ଭୂ-ରାଜନୈତିକ ଉଥଳପୁଥଳର ଲାଭ ଉଠାଇବା ପାଇଁ ଉପାୟ ଖୋଜୁଛନ୍ତି। ମୁନୀରଙ୍କ ଦୁଇ ଅସାମରିକ ପରାମର୍ଶଦାତା ନାମ ନ ପ୍ରକାଶ କରିବା ସର୍ତ୍ତରେ କହିଛନ୍ତି ଯେ ଏହି ପଦକ୍ଷେପ ଉପରେ କିଛି ଆମେରିକୀୟ ଅଧିକାରୀଙ୍କ ସହ ଆଲୋଚନା ହୋଇଛି। ଗତ ମାସର ଶେଷରେ ୱାଇଟ ହାଉସରେ ଟ୍ରମ୍ପଙ୍କ ସହ ବୈଠକ ପୂର୍ବରୁ ମୁନୀରଙ୍କ ସହ ମଧ୍ୟ ଏହା ସେୟାର କରାଯାଇଥିଲା। ତେବେ, ଟ୍ରମ୍ପ ପ୍ରଶାସନର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଆମେରିକୀୟ ରାଷ୍ଟ୍ରପତି ଓ ତାଙ୍କ ପରାମର୍ଶଦାତାମାନେ ଏପରି ପ୍ରସ୍ତାବ ଉପରେ ଆଲୋଚନା କରି ନାହାନ୍ତି।

କେତେ ଲାଭ ହେବ?

ଏହି ଗୁପ୍ତ ଯୋଜନାରେ ପାସନୀ ବନ୍ଦରକୁ ପାକିସ୍ତାନ ଅଞ୍ଚଳରୁ ଖଣିଜ ସମ୍ପଦ ବିଶେଷକରି ତମ୍ବା ଓ ଏଣ୍ଟିମନି, ଯାହା ବ୍ୟାଟେରୀ, ଅଗ୍ନିରୋଧୀ ଓ ମିସାଇଲରେ ଏକ ଗୁରୁତ୍ୱପୂର୍ଣ୍ଣ ଉପାଦାନ ପରିବହନ ପାଇଁ ଏକ ନୂଆ ରେଳମାର୍ଗ ସହ ସଂଯୋଗ କରାଯିବ। ଏକ ବ୍ଲୁପ୍ରିଣ୍ଟରେ ଅନୁମାନ କରାଯାଇଛି ଯେ ଏହି ବନ୍ଦରର ମୂଲ୍ୟ ୧.୨ ବିଲିୟନ ଅମେରିକୀୟ ଡଲାର ହେବ । ଏପରି ସମୟରେ ଯେତେବେଳେ ପାକିସ୍ତାନର ଅର୍ଥନୀତି ଭାଙ୍ଗିଯିବାର ଅବସ୍ଥାରେ ଅଛି, ଆମେରିକୀୟ ନିବେଶକମାନଙ୍କର ବନ୍ଦର ବାହାନାରେ ଦେଶରେ ପ୍ରବେଶ କରିବା ତାହା ପାଇଁ କିଛି ପରିମାଣରେ ଉପକାରୀ ହୋଇପାରେ। ଯେତେବେଳେ ବିଦେଶୀ କମ୍ପାନୀଗୁଡ଼ିକ ଦେଶରୁ ବାହାରୁଛନ୍ତି, ସେତେବେଳେ ଏହି ଖବର ଏକ ସକାରାତ୍ମକ ମାହୋଲ ସୃଷ୍ଟି କରିପାରେ। 

ତାଲିବାନର କାନ୍ଧ ପର୍ଯ୍ୟନ୍ତ ସିଡ଼ି

ଏହାକୁ ଆଫଗାନିସ୍ତାନରେ ଆମେରିକା ନେତୃତ୍ୱାଧୀନ ଯୁଦ୍ଧ ସମୟରେ ତାଲିବାନକୁ ପାକିସ୍ତାନର ସମର୍ଥନ ଯୋଗୁଁ ବିଗିଡ଼ିଥିବା ସମ୍ପର୍କକୁ ପୁନଃସ୍ଥାପନ ଓ ନୂଆ ଭାବେ ପ୍ରତିଷ୍ଠା କରିବାର ଉଦ୍ୟମ ଭାବେ ଦେଖାଯାଉଛି। ଜଣେ ବରିଷ୍ଠ ପାକିସ୍ତାନୀ ସେନା ଅଧିକାରୀ କହିଛନ୍ତି ଯେ ଆସିମ ମୁନିରଙ୍କ ପାଖରେ ‘ସରକାରୀ ଭାବେ କୌଣସି ପରାମର୍ଶଦାତା ନାହାନ୍ତି’। ସେ ଆଗକୁ କହିଛନ୍ତି ଯେ ବନ୍ଦରର ବିଚାର ଆମେରିକୀୟ ବ୍ୟବସାୟୀଙ୍କ ସହ ‘ବ୍ୟକ୍ତିଗତ ଆଲୋଚନା’ରେ ସାମ୍ନାକୁ ଆସିଛି ଏବଂ ଏହାକୁ ‘ଆଧିକାରିକ ମାଧ୍ୟମରେ ଉପସ୍ଥାପନ କରାଯାଇ ନାହିଁ’। ଏହା ମଧ୍ୟ କୁହାଯାଉଛି ଯେ ଏହି ଯୋଜନା ଟ୍ରମ୍ପ ପ୍ରଶାସନ ସହ ତାଳମେଳ ରଖିବା ପାଇଁ ପାକିସ୍ତାନୀ ଅଧିକାରୀମାନଙ୍କ ତରଫରୁ ସାର୍ବଜନୀନ ଓ ବ୍ୟକ୍ତିଗତ ଭାବେ ପ୍ରସ୍ତୁତ କରାଯାଇଥିବା ଅନେକ ବିଚାର ମଧ୍ୟରୁ ଗୋଟିଏ।

ମୁନୀର ଓ ଟ୍ରମ୍ପଙ୍କ ମଧ୍ୟରେ ଉତ୍ତମ ସମ୍ପର୍କ

ରିପୋର୍ଟରେ ଦାବି କରାଯାଇଛି ଯେ ଆସିମ ମୁନିର ଓ ଟ୍ରମ୍ପଙ୍କ ମଧ୍ୟରେ ଏକ ସମ୍ପର୍କ ଗଢ଼ି ଉଠିଛି, ଯାହାକୁ ଅମେରିକୀୟ ଓ ପାକିସ୍ତାନୀ କୂଟନୀତିଜ୍ଞମାନେ ‘ଭାଇଚାରା’ କହୁଛନ୍ତି। ଆମେରିକୀୟ ରାଷ୍ଟ୍ରପତି ମେ’ ମାସରେ ହୋଇଥିବା ଯୁଦ୍ଧବିରାମର ଶ୍ରେୟ ନେଇଥିଲେ। ଯଦିଓ ଭାରତ ଏହାକୁ ସର୍ବଦା ଅସ୍ୱୀକାର କରିଛି। ଭାରତ ମେ’ ମାସରେ ଅପରେସନ ସିନ୍ଦୂର ପରେ ଯୁଦ୍ଧବିରାମରେ ଟ୍ରମ୍ପଙ୍କ ଭାଗୀଦାରୀର ଦାବିକୁ ବାରମ୍ବାର ଖାରଜ କରିଛି, କିନ୍ତୁ ପାକିସ୍ତାନୀ ଅଧିକାରୀମାନେ ସାର୍ବଜନୀନ ଭାବେ ଟ୍ରମ୍ପଙ୍କୁ ଧନ୍ୟବାଦ ଜଣାଇଛନ୍ତି।