Celebration Turns Tragic: ଚାଲିଥାଏ ସେଲିବ୍ରେସନ, ଜୀଅନ୍ତା ଜଳିଗଲେ ମଣିଷ...ନୂଆବର୍ଷରେ ଭୟଙ୍କର ବିସ୍ଫୋରଣ

କାଳ ପାଲଟିଲା ଜିରୋ ନାଇଟ୍‌ ସେଲିବ୍ରେସନ । ଲୋକେ ନାଚଗୀତର ନବବର୍ଷକୁ ସ୍ୱାଗତ କରୁଥିବା ବେଳେ ଥରାଇଦେଲା ପ୍ରଚଣ୍ଡ ବିସ୍ଫୋରଣ । ଦେଖନ୍ତୁ ତା' ପରର ଏ ଲୋମହର୍ଷଣକାରୀ ଚିତ୍ରକୁ । କେମିତି ବିସ୍ଫୋରଣ ପରେ ହୁତୁ ହୁତୁ ହୋଇ ଜଳୁଛି ବାର୍‌ । ସ୍ୱିଜରଲ୍ୟାଣ୍ଡର କ୍ସାନ୍ସ ମୋଣ୍ଟାନା ସହରର ଗୋଟିଏ ବାରରେ ନୂଆବର୍ଷ ପାର୍ଟି ଚାଲିଥିବା ସମୟରେ ଏହି ଅଘଟଣ ଘଟିଛି ।  ବିସ୍ଫୋରଣରେ ଏ ପର୍ଯ୍ୟନ୍ତ ଅତିକମରେ 40 ଜଣଙ୍କର ମୃତ୍ୟୁ ଘଟିଥିବା ବେଳେ ୧୦୦ରୁ ଅଧିକ ଲୋକେ ଆହତ ହୋଇଛନ୍ତି ।

ଲେ କଷ୍ଟେଲାସନ ବାର୍‌ରେ ନୂଆବର୍ଷ ପାର୍ଟି ଚାଲିଥିଲା । ସମୟ ରାତି ପ୍ରାୟ ସାଢେ ୧ଟା ହେବ, ହଠାତ୍ ପ୍ରଚଣ୍ଡ ବିସ୍ପୋରଣରେ ଥରିଯାଇଥିଲା ବାର୍ । ଏହି ସମୟରେ ବାର୍‌ ଭିତରେ ଶତାଧିକ ଲୋକଙ୍କ ଭିଡ ଜମିଥିଲା । ଲୋକେ ନାଚଗୀତରେ ମସଗୁଲ ଥିବାବେଳେ ଘଟିଥିଲା ଧମାକା । କେହି କିଛି ବୁଝିବା ପୂର୍ବରୁ ବିସ୍ଫୋରଣ ପରେ ବାର୍‌ରେ ନିଆଁ ଲାଗିଯାଇଥିଲା । ଫଳରେ ଶତାଧିକ ଲୋକ ବାହାରି ନପାରି ନିଆଁରେ ଜଳିଯାଇଥିଲେ ।  

ପୋଲିସ ସୂଚନା ମୁତାବକ, ବାର୍‌ର ବେସମେଣ୍ଟରେ ବିସ୍ଫୋରଣ ହୋଇଥିଲା । ହେଲେ କିଏ ଏହି ବିସ୍ଫୋରଣ ଘଟାଇଲା ଓ କେତେ ମୃତାହତ ଘଟିଛି ତାହା ଏଯାଏଁ ସ୍ପଷ୍ଟ ହୋଇପାରିନି । ମୃତକଙ୍କ ମଧ୍ୟରେ ଅଧିକାଂଶ ପର୍ଯ୍ୟଟକ ଥିବା ଆଶଙ୍କା କରାଯାଉଛି । ସ୍ଥାନୀୟ କିଛି ଗଣମାଧ୍ୟମରେ ପ୍ରାୟ ୪୦ ଜଣଙ୍କ ମୃତ୍ୟୁ ଘଟିଥିବା ରିପୋର୍ଟ ହୋଇଛି । ସୋସିଆଲ ମିଡିଆରେ ବିସ୍ଫୋରଣର ଅନେକ ଭିଡିଓ ଭାଇରାଲ ହେବାରେ ଲାଗିଛି । ଲୋକମାନେ ନିଆଁ ଲାଗିବା ପରେ ଧାଁଦୌଡ଼ କରୁଥିବା ଏଥିରେ ଦେଖାଯାଉଛି ।