U.S. Announces Nuclear Testing: ପରମାଣୁ ପରୀକ୍ଷଣ କରିବ ଆମେରିକା, ହୋଇଯିବ କି ବିଶ୍ୱଯୁଦ୍ଧ ?

୩୦ ବର୍ଷ ପରେ ଏତିହାସିକ ନିଷ୍ପତ୍ତି ନେବାକୁ ଯାଉଛି ଆମେରିକା। ପୁଣି ପରମାଣୁ ପରୀକ୍ଷଣ କରିବାକୁ ପ୍ରତିରକ୍ଷା ବିଭାଗ ପେଣ୍ଟାଗନକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିର୍ଦ୍ଦେଶ। ବୁଧବାର ଦିନ ସୋସିଆଲ ମିଡିଆରେ ଏକ ପୋଷ୍ଟରେ ଟ୍ରମ୍ପ ଏହି ଘୋଷଣା କରିଛନ୍ତି। ସେ ଲେଖିଛନ୍ତି ଯେ ଅନ୍ୟ ଦେଶମାନଙ୍କ ପରୀକ୍ଷଣକୁ ଦୃଷ୍ଟିରେ ରଖି, ସେ ପ୍ରତିରକ୍ଷା ବିଭାଗକୁ ପରମାଣୁ ଅସ୍ତ୍ର ପରୀକ୍ଷଣ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି।

ଏହି ପ୍ରକ୍ରିୟା ତୁରନ୍ତ ଆରମ୍ଭ ହେବ। ଟ୍ରମ୍ପ ସ୍ୱତନ୍ତ୍ର ଭାବରେ ଋଷ ଏବଂ ଚୀନ୍ ନାମ ନେଇ କହିଛନ୍ତି ଯେ ଋଷ ଦ୍ୱିତୀୟ ଏବଂ ଚୀନ୍ ତୃତୀୟ ସ୍ଥାନରେ ଅଛି, କିନ୍ତୁ ଆଗାମୀ ପାଞ୍ଚ ବର୍ଷ ମଧ୍ୟରେ ସେମାନେ ସମାନ ହୋଇପାରିବେ। 

ଟ୍ରମ୍ପ ତାଙ୍କ ପୋଷ୍ଟରେ ଏହା ମଧ୍ୟ ଦାବି କରିଛନ୍ତି ଯେ ଆମେରିକା ବିଶ୍ୱରେ ସର୍ବାଧିକ ସଂଖ୍ୟକ ପରମାଣୁ ଅସ୍ତ୍ର ରଖିଛି। ତଥାପି, ଅନ୍ତର୍ଜାତୀୟ ତଥ୍ୟ ଏହି ଦାବିକୁ ମିଥ୍ୟା ଦର୍ଶାଉଛି। ଋଷ ପାଖରେ ସର୍ବାଧିକ ସଂଖ୍ୟକ ପରମାଣୁ ଅସ୍ତ୍ର ରହିଛି, ଯାହାର ସଂଖ୍ୟା ୫,୫୦୦ ରୁ ଅଧିକ, ଯେତେବେଳେ ଆମେରିକା ପାଖରେ ପ୍ରାୟ ୫,୦୪୪ ଅଛି।

ଏକ ପୂର୍ଣ୍ଣ ପରମାଣୁ ଅସ୍ତ୍ର ପରୀକ୍ଷଣରେ ଏକ ଜୀବନ୍ତ ପରମାଣୁ ବୋମା ବିସ୍ଫୋରଣ କରାଯାଇ, ଏହାର ବିନାଶକାରୀ ଶକ୍ତି, ବିକିରଣ ପ୍ରଭାବ ଏବଂ ବୈଷୟିକ ଦକ୍ଷତା ମପାଯାଏ। ଏପରି ପରୀକ୍ଷଣ ସାଧାରଣତଃ ଭୂତଳ କିମ୍ବା ଆକାଶରେ କରାଯାଉଥିଲା। ବିକିରଣ ସଂସ୍ପର୍ଶର ବିପଦ ହେତୁ ଏହା ପରିବେଶ ପ୍ରତି ବିପଦ ସୃଷ୍ଟି କରୁଥିଲା। ତେଣୁ ଆମେରିକା ଶେଷ ଥର ପାଇଁ ୧୯୯୨ ମସିହା ସେପ୍ଟେମ୍ବର ୨୩ ତାରିଖରେ ନେଭାଡାରେ ଏକ ପରମାଣୁ ପରୀକ୍ଷଣ କରିଥିଲା। ସେବେଠାରୁ ତତ୍କାଳୀନ ରାଷ୍ଟ୍ରପତି ଜର୍ଜ ବୁଶ ପରମାଣୁ ପରୀକ୍ଷଣ ଉପରେ ସ୍ଥଗିତ ଘୋଷଣା କରିଥିଲେ।

୧୯୯୦ ଦଶକ ପରେ ଋଷ ଏବଂ ଚୀନ୍ ମଧ୍ୟ ଏପରି ପରୀକ୍ଷଣ ବନ୍ଦ କରିଦେଇଥିଲେ। ଏବେ ଟ୍ରମ୍ପ ଏହି ପରୀକ୍ଷଣଗୁଡ଼ିକୁ ପୁନଃଆରମ୍ଭ କରିବାକୁ କହୁଛନ୍ତି। ତେବେ ଟ୍ରମ୍ପଙ୍କ ନିର୍ଦ୍ଦେଶରେ ପ୍ରକୃତ ବିସ୍ଫୋରକ ପରୀକ୍ଷଣ ହେବ ନା ବିସ୍ଫୋରଣ ବିନା ପରମାଣୁ ପ୍ରକ୍ରିୟାର ପରୀକ୍ଷଣ ହେବ ତାହା ଆମେରିକା ପ୍ରତିରକ୍ଷା ବିଭାଗ ଏପର୍ଯ୍ୟନ୍ତ ସ୍ପଷ୍ଟ କରିନାହିଁ। ବିଶେଷଜ୍ଞମାନେ କୁହନ୍ତି ଯେ ଆମେରିକାର ଏହା ଏକ ପୂର୍ଣ୍ଣାଙ୍ଗ ବିସ୍ଫୋରକ ପରୀକ୍ଷଣ ନୁହେଁ, ବରଂ ଏକ ପ୍ରସ୍ତୁତିମୂଳକ ପରୀକ୍ଷଣ, କାରଣ ଆମେରିକା ବ୍ୟାପକ ପରମାଣୁ ପରୀକ୍ଷଣ ନିଷେଧ ଚୁକ୍ତି ବା CTBTରେ ସ୍ୱାକ୍ଷର କରିଛି। 

ତେବେ ଅକ୍ଟୋବର ୨୧ ତାରିଖରେ ଋଷ ଏକ ପରମାଣୁ ଶକ୍ତି ସମ୍ପନ୍ନ କ୍ଷେପଣାସ୍ତ୍ର ପରୀକ୍ଷଣ କରିଥିଲା। ଟ୍ରମ୍ପ ଏହାକୁ ଏକ ଭୁଲ ପଦକ୍ଷେପ ବୋଲି କହିଥିଲେ ଏବଂ ପୁଟିନଙ୍କୁ କ୍ଷେପଣାସ୍ତ୍ର ପରୀକ୍ଷଣ କରିବା ପରିବର୍ତ୍ତେ ଯୁଦ୍ଧ ବନ୍ଦ କରିବାକୁ ଅନୁରୋଧ କରିଥିଲେ। ହେଲେ ଏବେ ସିଏ ନିଜେ ସମାନ କାମ କରିବାକୁ ଯାଉଛନ୍ତି ।