Fake Job Racket Busted: ଝାଡ଼ୁଦାର ଚାକିରି ପ୍ରଲୋଭନ ଦେଖାଇ ଗରିବ ଲୋକଙ୍କୁ ଠକେଇ, ୬୨ ଲକ୍ଷ ଟଙ୍କା ଜବତ

ଝାଡ଼ୁଦାର ଚାକିରି ପାଇଁ ମହାଘୋଟାଲା। ସରକାରୀ ସଂସ୍ଥାରେ ମିଥ୍ୟା ଝାଡ଼ୁଦାର ଚାକିରି ପ୍ରଲୋଭନ ଦେଖାଇ ଲକ୍ଷାଧିକ ଟଙ୍କା ଠକେଇ। ଠକେଇ ଅଭିଯୋଗରେ ବୁର୍ଲା ପୋଲିସ ୨ ଜଣଙ୍କୁ ଗିରଫ କରିଛି। ସେମାନଙ୍କ ନିକଟରୁ ୬୨ ଲକ୍ଷ ଟଙ୍କା ଜବତ କରିଛି। ସମ୍ୱଲପୁର, ବରଗଡ, ବୌଦ୍ଧ ଓ ସୋନପୁର ଜିଲ୍ଲାରୁ ଏମାନେ ଠକେଇ କରିଛନ୍ତି। 

ସରକାରୀ ସଂସ୍ଥାରେ ଝାଡ଼ୁଦାର ଚାକିରି ପ୍ରଲୋଭନ ଦେଖାଇ ଗରିବ ଲୋକଙ୍କ ଠାରୁ ଠକି ନେଇଛନ୍ତି ଲକ୍ଷ ଲକ୍ଷ ଟଙ୍କା। ଏହି ଠକ ଦଳ ବିଭିନ୍ନ ଜିଲ୍ଲାରୁ ପ୍ରାୟ ୨ କୋଟି ଟଙ୍କା ଆଦାୟ କରିଥିବାର ଅଭିଯୋଗ ହୋଇଛି ।  ଏମାନେ ହାତାହାତି ଟଙ୍କା ନେଉଥିଲେ । ଏହି ରାକେଟ୍ ସମ୍ୱଲପୁର, ବରଗଡ, ବୌଦ୍ଧ ଓ ସୋନପୁର ଜିଲ୍ଲାରୁ ଠକେଇ କରିଥିବାର ଜଣାପଡିଛି ।  ଝାଡ଼ୁଦାର ଚାକିରି ଦେବା ନାଁରେ ଜଣକଠାରୁ ୧୨ ହଜାର ଲେଖାଏଁ  ଏମାନେ ଆଦାୟ କରୁଥିଲେ ।

 ଏହି ଘଟଣାରେ ବୁର୍ଲା ଥାନା ପୋଲିସ ଜଣେ ମହିଳାଙ୍କ ସମେତ ୨ଜଣଙ୍କୁ ଗତ ରାତିରେ ଥାନାକୁ ପଚରାଉଚରା ପାଇଁ ଆଣିଥିଲା ।  ତେବେ ବହୁ ସଂଖ୍ୟକ ମହିଳା ଗତ ରାତିରେ ଥାନା ଆଗରେ ଏହାର ପ୍ରତିବାଦ କରିଥିଲେ ।

ମିଥ୍ୟା ଚାକିରି  ପ୍ରଳୋଭନ ପଛରେ ବଡ଼ ରାକେଟ

ଗତ କିଛି ଦିନ ହେଲା ପଶ୍ଚିମ ଓଡିଶାର ବିଭିନ୍ନ ସ୍ଥାନରେ ଝାଡ଼ୁଦାର ଚାକିରି କରାଇଦେବା ନାଁରେ କିଛି ଲୋକ ଜଣକ ଠାରୁ ୧୨ ହଜାର ଟଙ୍କା ଆଦାୟ କରୁଥିଲେ । ଏହି କଥା ଚାରିଆଡେ ଆଲୋଚନା ହେବ। ପରେ ସମ୍ବଲପୁର ମହାନଗର ନିଗମ ପକ୍ଷରୁ ସର୍ବସାଧାରଣଙ୍କ ଉଦ୍ଦେଶ୍ୟରେ ଏକ ସୂଚନା ଜାରି କରାଯାଇଥିଲା । ନକଲି ଚାକିରି ପ୍ରତି ସାବଧାନ ରହିବାକୁ ସୂଚନା ଦିଆଯାଇଥିଲା ।

ଗତକାଲି ଚିପିଲିମା କରଡୋଲା ଅଞ୍ଚଳରେ ମହିଳାମାନଙ୍କର ଏକ ସମାବେଶ ହୋଇଥିଲା । ତେବେ ସେମାନଙ୍କୁ ଠକମାନେ କି ପ୍ରତିଶ୍ରୁତି ଦେଇଥିଲେ ଯେ ସେମାନେ ପୋଲିସର କାର୍ଯ୍ୟାନୁଷ୍ଠାନକୁ ବିରୋଧ କରୁଥିଲେ ।  ଏହି ମହିଳାମାନଙ୍କୁ ପୋଲିସ ବୁଝାସୁଝା କରିଛି । ଆଇନ ଅନୁସାରେ ଠକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ପୋଲିସ କହିଛି । 
ଏହି ଘଟଣାର ତଦନ୍ତ କରି ପୋଲିସ ଦୁଇ ଜଣଙ୍କୁ ଗିରଫ କରିଛି । ସେମାନଙ୍କ ଠାରୁ ନଗଦ ୬୨ ଲକ୍ଷ ଟଙ୍କା ଜବତ କରାଯାଇଛି । ଏହି ଘଟଣାରେ ପୋଲିସ ଅଧିକ ତଦନ୍ତ ଜାରି ରଖିଛି ।