Husband Killed Wife: ସ୍ତ୍ରୀ ଟଙ୍କାରେ ଅୟସ କରୁଥିଲା, ଡିଭୋର୍ସ ମାଗିବାରୁ ତଣ୍ଟି ଚିପି ମାରିଦେଲା

ପ୍ରଥମେ ଭଲ ପାଇ ବାହାହେଲା, ବାହାଘର ପରେ ଚାକିରି ଛାଡି ସ୍ତ୍ରୀ ଟଙ୍କାରେ ଚଳୁଥିଲା, ଆଉ ଅନୈତିକ ସମ୍ପର୍କ ରଖୁଥିଲା । ସ୍ତ୍ରୀ ଜାଣିବା ପରେ ଛାଡି ଚାଲିଯିବାରୁ ତଣ୍ଟି ଚିପି ମାରିଦେଲା ସ୍ୱାମୀ । ମୃତ ମହିଳାଙ୍କ ନାଁ ଆଶା । ୬ ବର୍ଷ ତଳେ ସେ ବିରୁପାକ୍ଷାକୁ ପ୍ରେମ ବିବାହ କରିଥିଲେ । ଦେଢବର୍ଷ ହେଲା ଦୁହେଁ ବେଙ୍ଗାଲୁରୁର ରାଜରାଜେଶ୍ୱରୀନଗରରେ ଭଡା ଘରେ ରହୁଥିଲେ ।

ସ୍ୱାମୀ ସାଜିଲା ସୈତାନ:

ବାହାଘର ପରଠୁ ଅସଲ ରଙ୍ଗ ଦେଖାଇଥିଲା ବିରୁପାକ୍ଷା । ଆଗଭଳି ଆଶାଙ୍କ ଯତ୍ନ ନେଉନଥିଲା କି ଚାକିରି କରୁନଥିଲା । ସ୍ତ୍ରୀ ରୋଜଗାରରେ ଚଳୁଥିଲା । ଏପରିକି ଅନ୍ୟ ମହିଳାଙ୍କ ସହ ଅବୈଧ ସମ୍ପର୍କ ରଖିଥିଲା । ଏ କଥା ଜଣାପଡିବା ପରେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଫାଟ ସୃଷ୍ଟି ହୋଇଥିଲା । ଦୁହେଁ ଦେଢ ମାସ ହେଲା ଅଲଗା ରହୁଥିଲେ ଏବଂ ଡିଭୋର୍ସ ଫାଇଲ୍ କରିଥିଲେ ।

ହତ୍ୟାକୁ ଆତ୍ମହତ୍ୟାର ରୂପ:

ସ୍ତ୍ରୀଠୁ ପ୍ରତିଶୋଧ ନେବାକୁ ପ୍ଲାନ୍ କରିଥିଲା ଅଭିଯୁକ୍ତ । ଗତ ୧୦ ତାରିଖରେ ଆଶାଙ୍କ ରୁମ୍‌କୁ ଯାଇ ତଣ୍ଟି ଚିପି ହତ୍ୟା କରିଥିଲା । ମର୍ଡରକୁ ଆତ୍ମହତ୍ୟାର ରୂପ ଦେବାକୁ ନିଜ ସାଙ୍ଗ ସହାୟତାରେ ଆଶାଙ୍କ ମୃତଦେହକୁ ଫ୍ୟାନ୍‌ରେ ଝୁଲାଇଦେଇ ଚମ୍ପଟ ମାରିଥିଲା । ପୋଷ୍ଟମର୍ଟମ ରିପୋର୍ଟରୁ ପୋଲିସର ସନ୍ଦେହ ହୋଇଥିଲା । ଏନେଇ ହତ୍ୟାକାରୀ ସ୍ୱାମୀକୁ ପଚରାଉଚରା କରାଯିବା ପରେ ସବୁ ସତ ଓଗାଳିଥିଲା ସେ । କେମିତି ନିଜ ସ୍ତ୍ରୀକୁ ମାରି ଫ୍ୟାନ୍‌ରେ ଝୁଲାଇଥିଲା, ସବୁ ଟିକନିକ୍ ବଖାଣିଥିଲା ।

ବ୍ୟୁରୋ ରିପୋର୍ଟ, ଓଟିଭି