Gunmen Massacre: ଭୟଙ୍କର ଆତଙ୍କୀ ହମଲାରେ ଥରି ଉଠିଲା ଦେଶ, ୨୦୦ ମୃତ, ବିପଦରେ ଅନେକ ଜୀବନ

ନାଇଜେରିଆ (Nigeria) ରେ ନରସଂହାର (Massacre)। ଘରେ ପଶି ଖୋଜି ଖୋଜି ମାରିଲେ ଆତଙ୍କୀ। ଯାହାକୁ ପାରିଲେ ତାକୁ ଗୁଳି କଲେ। ଏଭଳି ଭୟଙ୍କର ଆକ୍ରମଣ କରିଛନ୍ତି କୁଖ୍ୟାତ ଆତଙ୍କବାଦୀ ସଂଗଠନ ଇସଲାମିକ ଷ୍ଟେଟ୍ (IS) ଗୋଷ୍ଠୀ ସହ ଜଡିତ ସ୍ଥାନୀୟ ସଶସ୍ତ୍ରଧାରୀ। 

ମଙ୍ଗଳବାର ସନ୍ଧ୍ୟାରେ ପଶ୍ଚିମ ନାଇଜେରିଆର କ୍ୱାରା ରାଜ୍ୟରେ ଏକ ଭୟଙ୍କର ଆକ୍ରମଣ ଘଟିଥିଲା। ୱାରୋ ଏବଂ ନୁକୁ ଦୁଇଟି ଗାଁରେ ଅତି କମରେ ୨୦୦ ଲୋକଙ୍କୁ ହତ୍ୟା କରାଯାଇଛି। ଏହି ଆକ୍ରମଣକୁ ଗତ କିଛି ମାସ ମଧ୍ୟରେ ନାଇଜେରିଆରେ ସବୁଠାରୁ ଭୟଙ୍କର ଆକ୍ରମଣ ବୋଲି କୁହାଯାଉଛି। 

ଆନ୍ତର୍ଜାତୀୟ ଗଣମାଧ୍ୟମର ଏକ ରିପୋର୍ଟ ଅନୁଯାୟୀ, ସ୍ଥାନୀୟ ସାଂସଦ ମହମ୍ମଦ ଉମର ବାୟୋ କହିଛନ୍ତି ଯେ ଲାକୁରାୱା ନାମକ ଏକ ସଶସ୍ତ୍ର ଗୋଷ୍ଠୀ ଏହି ହତ୍ୟାକାଣ୍ଡ ଭିଆଇଛି। ଏହି ଗୋଷ୍ଠୀ ଆତଙ୍କବାଦୀ ସଂଗଠନ ଇସଲାମିକ୍ ଷ୍ଟେଟ୍ ସହିତ ଜଡିତ ବୋଲି କୁହାଯାଉଛି। ଆକ୍ରମଣକାରୀମାନେ ଗାଁଗୁଡ଼ିକରେ ପ୍ରବେଶ କରି ଲୋକମାନଙ୍କୁ ଆଖିବୁଜା ଗୁଳି କରିଥିଲେ। ଯାହାକୁ ସାମନାରେ ପାଇଲେ ଆକ୍ରମଣ କରିଥିଲେ।

ମିଳିଥିବା ସୂଚନା ଅନୁଯାୟୀ, ଆକ୍ରମଣ ହୋଇଥିବା ଅଞ୍ଚଳଗୁଡ଼ିକ ଅତ୍ୟନ୍ତ ଦୁର୍ଗମ। ଏହି ଗାଁଗୁଡ଼ିକୁ ପାଞ୍ଚିବାକୁ ହେଲେ ରାଜ୍ୟ ରାଜଧାନୀରୁ ପ୍ରାୟ ଆଠ ଘଣ୍ଟା ଗାଡ଼ିରେ ଯିବାକୁ ପଡିବ। ଏହା ବ୍ୟତୀତ, ଏହି ଅଞ୍ଚଳଗୁଡ଼ିକ ବେନିନ୍ ସୀମା ନିକଟରେ ଅବସ୍ଥିତ। ଏହି ଅଞ୍ଚଳକୁ ଯୋଗାଯୋଗ କରିବା ଅତ୍ୟନ୍ତ କଷ୍ଟସାଧ୍ୟ ହୋଇଥାଏ। ଦୁର୍ବଳ ସଂଯୋଗୀକରଣ ଯୋଗୁଁ ରିଲିଫ୍ ଏବଂ ଉଦ୍ଧାର କାର୍ଯ୍ୟରେ ଯଥେଷ୍ଟ ବାଧା ସୃଷ୍ଟି ହୁଏ।

କ୍ୱାରା ରାଜ୍ୟର ରାଜ୍ୟପାଳ ଅବଦୁଲ ରହମାନ ଅବଦୁଲ ରଜାକ ଏହି ଆକ୍ରମଣକୁ କଡ଼ା ନିନ୍ଦା କରି ଏହାକୁ ଏକ କାପୁରୁଷତାପୂର୍ଣ୍ଣ କାର୍ଯ୍ୟ ବୋଲି କହିଛନ୍ତି। ରାଜ୍ୟପାଳ କହିଛନ୍ତି, ରାଜ୍ୟରେ ଚାଲିଥିବା ସାମରିକ ଅଭିଯାନ ଯୋଗୁଁ ପ୍ରତିଶୋଧପରାୟଣ ହୋଇ ଏହି ଆକ୍ରମଣ କରାଯାଇଥିଲା। କାରଣ ସୁରକ୍ଷା ବାହିନୀ ଆତଙ୍କବାଦୀ ଗୋଷ୍ଠୀଗୁଡ଼ିକ ଉପରେ କଠୋର କାର୍ଯ୍ୟାନୁଷ୍ଠାନ ଜାରି ରଖିଛନ୍ତି। 

ନାଇଜେରିଆରେ ଅସ୍ଥିରତା ଲାଗି ରହିଛି। ଦେଶର ଉତ୍ତର-ପୂର୍ବ ଭାଗରେ ଦୀର୍ଘ ସମୟ ଧରି ବିଦ୍ରୋହ ଦେଖାଦେଇଛି। ଉତ୍ତର-ପଶ୍ଚିମ ଏବଂ ଉତ୍ତର-କେନ୍ଦ୍ରୀୟ ଅଞ୍ଚଳରେ ଅପହରଣ ଏବଂ ସଶସ୍ତ୍ର ଡକାୟତି ତୀବ୍ର ଭାବରେ ବୃଦ୍ଧି ପାଇଛି। ଏହି ହିଂସାର ପ୍ରଭାବ ସାଧାରଣ ନାଗରିକଙ୍କ ଉପରେ ପଡୁଛି।