Hindu Man Burned Alive: ଶୋଇଥିବା ବେଳେ ଜୀଅନ୍ତା ଜାଳିଦେଲେ, ଯୋଜନାବଦ୍ଧ ଭାବେ ଯୁବକଙ୍କୁ ହତ୍ୟା ଅଭିଯୋଗ

ବାଂଲାଦେଶରେ ପୁଣି ଜଣେ ହିନ୍ଦୁ ଯୁବକଙ୍କୁ ହତ୍ୟା କରାଯାଇଛି। ଦୋକାନ ଘରେ ପୂରାଇ ସମ୍ପୂର୍ଣ୍ଣ ଘରକୁ ଜାଳି ଦେଇଛନ୍ତି। ଏପରି ହତ୍ୟା ପରେ ଦେଶରେ ସଂଖ୍ୟାଲଘୁଙ୍କ ସୁରକ୍ଷା ନେଇ ପୁଣି ଚିନ୍ତା ସୃଷ୍ଟି ହୋଇଛି।

ଥମୁନି ନରସଂହାର। ଥମୁନି ହିନ୍ଦୁଙ୍କୁ ନିର୍ଯାତନା। ବାଂଲାଦେଶରେ ବାରମ୍ବାର ହିନ୍ଦୁ ବିରୋଧୀ ହିଂସା ଦେଖାଯାଉଛି। କେତେବେଳେ ଜାଳି ଦେଉଛନ୍ତି ତ କେତେବେଳେ ପିଟିପିଟି ହତ୍ୟା କରୁଛନ୍ତି। ଏପରିକି ଘରେ ପୂରାଇ ସମ୍ପୂର୍ଣ୍ଣ ଘରକୁ ଜାଳି ଦେଉଛନ୍ତି। ଏବେ ପୁଣି ଜଣେ ହିନ୍ଦୁ ଯୁବକଙ୍କୁ ପୋଡି ହତ୍ୟା କରାଯାଇଥିବାର ଖବର ସାମନାକୁ ଆସିଛି। 

ବାଂଲାଦେଶର ନରସିଙ୍ଗଡି ଜିଲ୍ଲାରେ ଏକ ଗ୍ୟାରେଜ ଭିତରେ ଜଣେ ୨୩ ବର୍ଷୀୟ ହିନ୍ଦୁ ଯୁବକଙ୍କୁ ପୋଡ଼ି ହତ୍ୟା କରାଯାଇଛି। ଯାହା ଏକ ଯୋଜନାବଦ୍ଧ ହତ୍ୟା ବୋଲି ଅଭିଯୋଗ ଆଣିଛନ୍ତି ତାଙ୍କ ପରିବାର। ଏପରି ହତ୍ୟା ପରେ ଦେଶରେ ସଂଖ୍ୟାଲଘୁଙ୍କ ସୁରକ୍ଷା ନେଇ ପୁଣି ଚିନ୍ତା ସୃଷ୍ଟି ହୋଇଛି ।

ଚଞ୍ଚଳ ଚନ୍ଦ୍ର ଭୌମିକ ନାମକ ପୀଡିତ ବ୍ୟକ୍ତି ବହୁ ବର୍ଷ ଧରି ଗ୍ୟାରେଜରେ କାମ କରୁଥିଲେ। ସେ ମୂଳତଃ କୁମ୍ଭିଲା ଜିଲ୍ଲାର ଲକ୍ଷ୍ମୀପୁର ଗାଁର। କିନ୍ତୁ ନରସିଙ୍ଗଡିରେ କାମ ପାଇଁ ରହୁଥିଲେ। ଚଞ୍ଚଳ ତାଙ୍କ ପରିବାରର ଏକମାତ୍ର ରୋଜଗାରକ୍ଷମ ଥିଲେ।

ଏହି ଘଟଣାଟି ନରସିଙ୍ଗଡି ଥାନା ସଂଲଗ୍ନ ମସଜିଦ ମାର୍କେଟ୍ ଅଞ୍ଚଳ ନିକଟରେ ଘଟିଛି। ପ୍ରତ୍ୟକ୍ଷଦର୍ଶୀ ଏବଂ ସ୍ଥାନୀୟ ସୂତ୍ର ଅନୁଯାୟୀ, ଶୁକ୍ରବାର ବିଳମ୍ବିତ ରାତିରେ ଚଞ୍ଚଲ ଗ୍ୟାରେଜ ଭିତରେ ଶୋଇଥିବା ସମୟରେ ଆକ୍ରମଣ ହୋଇଥିଲା। ଆକ୍ରମଣକାରୀମାନେ ବାହାରୁ ଦୋକାନର ସଟରରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ, ଯାହା ଫଳରେ ନିଆଁ ଦ୍ରୁତ ଗତିରେ ବ୍ୟାପି ଯାଇଥିଲା।

ଖବର ପାଇବା ପରେ ସ୍ଥାନୀୟ ବାସିନ୍ଦାମାନେ ଅଗ୍ନିଶମ ସେବାକୁ ସୂଚନା ଦେଇଥିଲେ। ନରସିଙ୍ଗଡି ଅଗ୍ନିଶମ ସେବାର ଏକ ଟିମ୍ ଘଟଣାସ୍ଥଳରେ ପହଞ୍ଚି ପ୍ରାୟ ଏକ ଘଣ୍ଟାର ପ୍ରୟାସ ପରେ ନିଆଁକୁ ‌ଆୟତ୍ତ କରିଥିଲେ। ନିଆଁ ଲିଭାଇବା ପରେ, ଗ୍ୟାରେଜ ଭିତରୁ ଚଞ୍ଚଲଙ୍କ ପୋଡ଼ିଯାଇଥିବା ମୃତଦେହ ଉଦ୍ଧାର କରାଯାଇଥିଲା।

ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ ପୀଡିତ ବ୍ୟକ୍ତି ଦୀର୍ଘ ସମୟ ଧରି ନିଆଁରେ ଫସି ରହିଥିଲେ। ପରିବାର ଏହି ଘଟଣାକୁ ଏକ "ଯୋଜନାବଦ୍ଧ ହତ୍ୟା" ବୋଲି କହିଛନ୍ତି ଏବଂ ଦାୟୀ ଲୋକଙ୍କୁ ତୁରନ୍ତ ଗିରଫ କରିବା ସହିତ ଯଥାସମ୍ଭବ କଠୋର ଦଣ୍ଡ ଦେବାକୁ ଦାବି କରିଛନ୍ତି। 

ଏହି ହତ୍ୟାକାଣ୍ଡ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି କରିଛି ଏବଂ ସଂଖ୍ୟାଲଘୁ ସୁରକ୍ଷା ପ୍ରତି ପୁଣି ଭୟ ସୃଷ୍ଟି କରିଛି। ପୋଲିସ କହିଛି ଯେ ଘଟଣାସ୍ଥଳରୁ ପ୍ରମାଣ ସଂଗ୍ରହ କରାଯାଇଛି, ସିସିଟିଭି ଫୁଟେଜ୍ ଯାଞ୍ଚ କରାଯାଉଛି ଏବଂ ତଦନ୍ତ କରାଯାଉଛି। ସ୍ଥାନୀୟ ହିନ୍ଦୁ ସମ୍ପ୍ରଦାୟର ନେତାମାନେ ଏହି ନିର୍ମମ ହତ୍ୟାକାଣ୍ଡର ତୀବ୍ର ନିନ୍ଦା କରିଛନ୍ତି ଏବଂ ଦୋଷୀମାନଙ୍କୁ ଶୀଘ୍ର ଚିହ୍ନଟ ଏବଂ ଗିରଫ କରିବା ପାଇଁ ଦାବି କରିଛନ୍ତି। 

ଗତ କିଛି ମାସ ଧରି ବାଂଲାଦେଶରେ ଭାରତ ବିରୋଧୀ ମୌଳବାଦୀ ଛାତ୍ର ନେତା ସରିଫ ଓସମାନ ହାଦିଙ୍କ ମୃତ୍ୟୁ ପରେ ସଂଖ୍ୟାଲଘୁଙ୍କୁ ଟାର୍ଗେଟ କରି ଅନେକ ଆକ୍ରମଣ ହୋଇଛି। ଡିସେମ୍ବର ୧୮ ତାରିଖରେ, ଦୀପୁ ଚନ୍ଦ୍ର ଦାସ ନାମକ ଜଣେ ପୋଷାକ ‍ଫ୍ୟାକ୍ଟ୍ରି କର୍ମଚାରୀଙ୍କୁ ଏକ ଭିଡ଼ ଦ୍ୱାରା ପିଟିପିଟି ହତ୍ୟା କରାଯାଇଥିଲା ଏବଂ ପରେ ପ୍ରଫେଟ୍ ନିନ୍ଦା ଅଭିଯୋଗରେ ତାଙ୍କୁ ପୋଡ଼ି ଦିଆଯାଇଥିଲା। ଏହା ପରେ ଗୋଟିଏ ପରେ ଗୋଟିଏ ହତ୍ୟାକାଣ୍ଡ ନଜର ଆସୁଛି।