Jaipur Audi Crash: ୧୫ରୁ ଅଧିକ ଲୋକଙ୍କ ଉପରେ ଚଢିଗଲା ଅଡି; ସିସିଟିଭିରେ ରେକର୍ଡ ଭୟଙ୍କର ଦୃଶ୍ୟ

ଜୟପୁରର ଏକ ଜନଗହଳିପୂର୍ଣ୍ଣ ଅଞ୍ଚଳରେ ଏକ ଦ୍ରୁତଗାମୀ ଅଡି କାର ରାସ୍ତା କଡ଼ରେ ଥିବା ଖାଦ୍ୟ ଦୋକାନଗୁଡ଼ିକରେ ପଶିଯିବାରୁ ଜଣଙ୍କର ମୃତ୍ୟୁ ହୋଇଛି ଏବଂ ଅତି କମରେ ୧୬ ଜଣ ଆହତ ହୋଇଛନ୍ତି। ପତ୍ରକାର କଲୋନି ଥାନା ଅଞ୍ଚଳର ଖାରବାସ ସର୍କଲ ନିକଟରେ ଏହି ଘଟଣା ଘଟିଛି।

ପୋଲିସର କହିବା ଅନୁଯାୟୀ, ଅଡି କାରଟି ଅନ୍ୟ ଏକ ଗାଡ଼ି ସହିତ ରେସ କରୁଥିବା ବେଳେ ଏହା ଏକ ରାସ୍ତା ଡିଭାଇଡରରେ ଧକ୍କା ଦେଇଥିଲା ଏବଂ ରାସ୍ତା କଡ଼ରେ ଥିବା ଖାଦ୍ୟ ଦୋକାନଗୁଡ଼ିକୁ ଧକ୍କା ଦେଇଥିଲା।

ଷ୍ଟେସନ ହାଉସ୍ ଅଫିସର (SHO) ମଦନ କଦୱାସରା କହିଛନ୍ତି ଯେ “କାରଟି ଧକ୍କା ଦେବା ସମୟରେ ଘଟଣାସ୍ଥଳରେ ୫୦ରୁ ଅଧିକ ଲୋକ ଉପସ୍ଥିତ ଥିଲେ। କାରଟି ୧୦ ରୁ ଅଧିକ ଷ୍ଟଲକୁ ଧକ୍କା ଦେଇଥିଲା। ୧୬ ରୁ ଅଧିକ ଲୋକଙ୍କ ଉପରେ ଚଢ଼ିଯାଇଥିଲା ଏବଂ ଶେଷରେ ପ୍ରାୟ ୧୦୦ ମିଟର ଦୂରରେ ଏକ ଗଛରେ ଧକ୍କା ଦେବା ପରେ ଅଟକି ଯାଇଥିଲା। ଧକ୍କା ଯୋଗୁଁ ଆଉ ଏକ କାର ଓଲଟି ପଡ଼ିଥିଲା।“

ମୃତକଙ୍କ ନାମ ରମେଶ ବୈରୱା, ଯିଏକି ଭିଲୱାରାର ବାସିନ୍ଦା। ସେ ଏକ ଖାଦ୍ୟ ଦୋକାନରେ ସହାୟକ ଭାବରେ କାମ କରୁଥିଲେ। ଗୁରୁତର ଅବସ୍ଥାରେ ଚାରି ଜଣଙ୍କୁ ଏସଏମଏସ ହସ୍ପିଟାଲରେ ଭର୍ତ୍ତି କରାଯାଇଛି। ଅନ୍ୟ ଆହତମାନଙ୍କୁ ଜୟପୁରିଆ ହସ୍ପିଟାଲରେ ଭର୍ତ୍ତି କରାଯାଇଛି। ଆହତମାନଙ୍କ ମଧ୍ୟରୁ ତିନି ଜଣଙ୍କୁ ପ୍ରାଥମିକ ଚିକିତ୍ସା ପରେ ଛାଡି ଦିଆଯାଇଛି।

ପୋଲିସ କହିଛି ଯେ ଅଡି ଡ୍ରାଇଭରଙ୍କ ନାମ ଦିନେଶ ରିନୱା, ସେ ଜଣେ ବ୍ୟବସାୟୀ। ସେ ତିନି ମାସ ପୂର୍ବରୁ କାରଟିକୁ କିଣିଥିଲେ। କିନ୍ତୁ ଦୁର୍ଘଟଣା ପରେ ସେ କାର୍‌ଟିକୁ ଛାଡି ଅନ୍ୟ ଦୁଇଜଣଙ୍କ ସହିତ ଘଟଣାସ୍ଥଳରୁ ଫେରାର ହୋଇ ଯାଇଛନ୍ତି।

କାରରେ ଥିବା ଜଣେ ଯାତ୍ରୀଙ୍କୁ ସ୍ଥାନୀୟ ଲୋକମାନେ ଧରି ପୋଲିସକୁ ହସ୍ତାନ୍ତର କରିଥିଲେ। ଅଭିଯୁକ୍ତମାନେ ମଦ୍ୟପାନ କରିଥିବା କୁହାଯାଉଛି। କାରଟିକୁ ଜବତ କରାଯାଇଛି ଏବଂ ସେଥିରୁ ମୋବାଇଲ୍ ଫୋନ୍ ଜବତ କରାଯାଇଛି।