Deadly Hit-and-Run: ହିଟ୍ ଆଣ୍ଡ୍ ରନ୍ ଦୁର୍ଘଟଣା: ୬ ବର୍ଷର ବାଳକର ମୃତ୍ୟୁ, ନାବାଳକ ଡ୍ରାଇଭର ଅଟକ

ଫେବ୍ରୁଆରୀ ୧୨ ତାରିଖ ସନ୍ଧ୍ୟାରେ ଏକ ମର୍ମନ୍ତୁଦ ହିଟ୍-ଆଣ୍ଡ-ରନ୍ ଦୁର୍ଘଟଣା ଘଟିଥିଲା । ଯେଉଁଥିରେ ଜଣେ ୬ ବର୍ଷୀୟ ବାଳକ ଦୀକ୍ଷିତ ପଟେଲଙ୍କ ମୃତ୍ୟୁ ହୋଇଥିଲା ଏବଂ ଅନ୍ୟ ପାଞ୍ଚ ଜଣ ଆହତ ହୋଇଥିଲେ। ଘଟଣାଟି ହନୁମାନ ମନ୍ଦିର ନିକଟରେ ଘଟିଥିଲା। ପୋଲିସ ନାବାଳକ ଡ୍ରାଇଭରକୁ ଅଟକ ରଖିଛି।ସେ ଦ୍ୱାଦଶ ଶ୍ରେଣୀର ଜଣେ ଛାତ୍ର ।

ପୋଲିସର ସୂଚନା ଅନୁଯାୟୀ, ଲକ୍ଷ୍ନୌର ବାନ୍ଥରା ଅଞ୍ଚଳରେ ଅଭିଯୁକ୍ତ ଛାତ୍ର ଜଣକ ସ୍କୁଲ ଛୁଟି ପରେ ଫେରୁଥିଲା ଏବଂ ବନ୍ଧୁଙ୍କ ମାରୁତି ସ୍ୱିଫ୍ଟ ଡିଜାୟାର କାର ଚଲାଉଥିଲା। ସେହି କାରରେ ଜଣେ ସହପାଠୀ ମଧ୍ୟ ଥିଲେ। ସେ ପୂର୍ବରୁ ଅନ୍ୟ ତିନି ଜଣ ସହପାଠୀଙ୍କୁ ଛାଡ଼ି ଘରକୁ ଫେରୁଥିଲା। 

ପୋଲିସ ପଚରାଉଚରା ସମୟରେ ଡ୍ରାଇଭର ପ୍ରକାଶ କରିଛି ଯେ ରାସ୍ତାରେ ଟାୟାର ଫାଟିଯିବାରୁ କାରଟି ହଠାତ୍ ନିୟନ୍ତ୍ରଣ ହରାଇଥିଲା। କାରଟି ପ୍ରଥମେ ଫୁଟପାଥରେ ଛିଡା ହୋଇଥିବା ଏକ ଅଟୋ-ରିକ୍ସାକୁ ଧକ୍କା ଦେଇଥିଲା ଏବଂ ପରେ ଫୁଟପାଥରେ ଚାଲୁଥିବା ପଥଚାରୀଙ୍କ ଉପରେ ଚଢ଼ିଯାଇଥିଲା।

ଦୀକ୍ଷିତଙ୍କ ମୁଣ୍ଡରେ ଗୁରୁତର ଆଘାତ ଲାଗିଥିଲା ଏବଂ ସେ ହସ୍ପିଟାଲରେ ମୃତ୍ୟୁବରଣ କରିଥିଲେ। ତାଙ୍କ ମାଆ ଏବଂ ଜେଜେମା ମଧ୍ୟ ଆହତ ହୋଇଥିଲେ। ୧୨ ବର୍ଷୀୟ ଅରମାନ ଏବଂ ୪୨ ବର୍ଷୀୟ ଅବଧ ବିହାରୀ ମଧ୍ୟ ଆହତ ହୋଇଥିଲେ।

କାରଣ ଖୋଜୁଛି ପୋଲିସ୍ 

ଦୁର୍ଘଟଣା ପରେ ଡ୍ରାଇଭର ଘଟଣାସ୍ଥଳରୁ ଖସିଯିବାକୁ ଚେଷ୍ଟା କରିଥିଲା ।  କିନ୍ତୁ ପୋଲିସ ତାକୁ ଏବଂ ତା ସାଥୀଙ୍କୁ ତୁରନ୍ତ ଧରିଥିଲା। କାରଟିକୁ ଜବତ କରାଯାଇଛି ଏବଂ ବେପରୁଆ ଗାଡି ଚାଳନା ସମେତ ବିଭିନ୍ନ ଧାରା ଅନୁଯାୟୀ ଥାନାରେ ଏକ କେସ୍ ରୁଜୁ କରାଯାଇଛି।

ଡ୍ରାଇଭର କହିଛି ଯେ ଟାୟାର ଫାଟିଯିବାରୁ ଦୁର୍ଘଟଣା ଘଟିଛି। କାରଟି ତା ବନ୍ଧୁଙ୍କର ଥିଲା। ପୋଲିସ କହିଛି ଯେ ଆମେ ଡ୍ରାଇଭରକୁ ଅଟକ ରଖିଛୁ ଏବଂ ଗାଡ଼ିକୁ ଜବତ କରିଛୁ।
ପୋଲିସ ଏହି ଘଟଣାର ଅଧିକ ତଦନ୍ତ କରୁଛି ଏବଂ ଜାଣିବାକୁ ଚେଷ୍ଟା କରୁଛି ଯେ ଡ୍ରାଇଭର ଦ୍ରୁତ ଗତିରେ ଗାଡି ଚଳାଉଥିଲେ ନା ଦୁର୍ଘଟଣାର ଅନ୍ୟ କୌଣସି କାରଣ ଥିଲା।