Road Accident: ମର୍ମନ୍ତୁଦ ଦୁର୍ଘଟଣା: ଛକି ରହିଥିଲା ଯମ, ଏକ ସଙ୍ଗେ ଚାଲିଗଲା ୪ ଜୀବନ

ବାହାଘର ଯିବା ହେଲା କାଳ I ହସଖୁସିରେ ଘରୁ ବାହାରିଥିବା ବେଳେ ବାଟରେ ଛକି ରହିଥିଲା ଯମ । ଆଖି ପିଛୁଳାକେ ଚାଲିଗଲା ୪ ଜୀବନ ।  ବୋଲେରୋ ଧକ୍କାରେ ଏକସଙ୍ଗେ ଆଖି ବୁଜିଲେ ସ୍ୱାମୀ, ସ୍ତ୍ରୀ, ଭାଇ ଓ ନାତି । ଗତକାଲି ରାତିରେ ବରଗଡ଼ ଜିଲ୍ଲା ଗୋଡଭଗା ନିକଟରେ ଘଟିଛି ଏପରି ଏକ ମର୍ମନ୍ତୁଦ ଦୁର୍ଘଟଣା। 

ଖଇରପାଲିରୁ ୨ଟି ବାଇକ୍ ଯୋଗେ ବିନିକା ଥାନା ଜାମପାଲି ଗାଁକୁ ଫେରୁଥିଲେ ସନ୍ତୋଷ ପଧାନଙ୍କ ପରିବାର। ହେଲେ ବାଟରେ ଜଗିଥିଲା ଯମ I ବରଗଡ଼ ଜିଲ୍ଲା ମେହେନା ଗାଁ ନିକଟରେ ବାଇକକୁ ଧକ୍କା ଦେଇ ଫେରାର ମାରିଲା ବୋଲେରୋ I ଫଳରେ ଗୋଟିଏ ପରିବାରର ୩ ନାବାଳକ ସହ ସ୍ୱାମୀ, ସ୍ତ୍ରୀ ଓ ଭାଇ ୬ ଜଣ ବାଇକ ଉପରୁ ଛିଟିକି ପଡ଼ିଥିଲେ I 

ଘଟଣାସ୍ଥଳରେ ଜାମପାଲି ଗାଁର ୫୫ ବର୍ଷିୟ ସନ୍ତୋଷ ପଧାନ, ୪୮ ବର୍ଷିୟ କହର ପଧାନ, ଦୟାସାଗର ପଧା ଓ ସନ୍ତୋଷଙ୍କ ନାବାଳକ ନାତିଙ୍କ ମୃତ୍ୟୁ ହୋଇଛି। ଦୁଇ ଜଣ ନାତିକୁ ଗୁରୁତର ଅବସ୍ଥାରେ ଉଦ୍ଧାର କରି ବୁର୍ଲା ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଛି I 

ପୋଲିସ୍ ଘଟଣାସ୍ଥଳରେ ପହଞ୍ଚି ତୁରନ୍ତ ଆହତମାନଙ୍କୁ ମେଡିକାଲ ପଠାଇଥିଲା। ଏଥିସହ ପୋଲିସ୍ ତଦନ୍ତ ଆରମ୍ଭ କରିଥିବା ବେଳେ ବୋଲେରୋ ଚାଳକଙ୍କ ପତ୍ତା ପାଇପାରିନି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ପ୍ରବଳ ଉତ୍ତେଜନା ଦେଖାଦେଇଛି।