ଜମି ବିକ୍ରିରେ ବାଧକ ସାଜିବନି ଲେ-ଆଉଟ୍ ଆପ୍ରୁଭାଲ

ଜମିରୁ ଖଣ୍ଡେ ବିକି ନିଜ ଜରୁରୀ ଚାହିଦା ପୂରଣ ଲାଗି ଚାହୁଁଥିବା ଜମି ମାଲିକଙ୍କ ଲାଗି ଖୁସି ଖବର। ଏଣିକି ସେମାନଙ୍କ ଜମି ବିକ୍ରିରେ ବାଧକ ସାଜିବନି ଲେ’ ଆଉଟ୍ ଆପ୍ରୁଭାଲ୍। ସରଳ ହୋଇଛି ପାର୍ଟ ପ୍ଲଟ୍ ବିକ୍ରି ନିୟମ। ସଂଶୋଧନ ହେଲା ଓଡ଼ିଶା ଉନ୍ନୟନ ପ୍ରାଧିକରଣ (ପ୍ଲାନିଂ ଆଣ୍ଡ ବିଲ୍ଡିଂ ଷ୍ଟାଣ୍ଡାର୍ଡସ) ରୁଲ୍ ସ। ଫଳରେ ବିନା କୌଣସି ଅନୁମୋଦନରେ ନିଜ ବଡ଼ ରାଜସ୍ବ ଜମିରୁ ଫାଳେ ବିକିପାରିବେ ଜମି ମାଲିକ। ହେଲେ ମାତ୍ର ଥରକ ପାଇଁ। ତାହା ପୁଣି ସର୍ବାଧିକ ୫୦୦ ବର୍ଗ ମିଟର। ତେବେ ରିଅଲ ଇଷ୍ଟେଟ୍ ଉଦ୍ଦେଶ୍ୟରେ ବ୍ୟବହାର ହୋଇପାରିବିନି ଏହି ପାର୍ଟ ପ୍ଲଟ୍। ନିକଟରେ ODA (ପ୍ଲାନିଂ ଆଣ୍ଡ ବିଲ୍ଡିଂ ଷ୍ଟାଣ୍ଡାର୍ଡସ) ଦ୍ବିତୀୟ ସଂଶୋଧନ ନିୟମ ୨୦୨୫ ନେଇ ଗେଜେଟ୍ ବିଜ୍ଞପ୍ତି ପ୍ରକାଶ କରି ପାର୍ଟ ପ୍ଲଟ୍ ବିକ୍ରି ନିୟମକୁ ଏମିତି ସରଳ କରିଛି ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ।