Balangir Gang Rape: ନବମ ଛାତ୍ରୀଙ୍କୁ ଗଣଦୁଷ୍କର୍ମ କଲେ ସହପାଠୀ, ଭାଇରଲା ହେଲା ଭିଡିଓ

ଟ୍ୟୁସନରେ ନବମ ଛାତ୍ରୀଙ୍କୁ ଗଣଦୁଷ୍କର୍ମ । ସୈତାନ ପାଲଟିଲେ ସହପାଠୀ ।। ସୋସିଆଲ ମିଡିଆରେ ଘୂରିବୁଲିଛି ଦୁଷ୍କର୍ମର ଭିଡିଓ । ଏମିତି ଏକ ଜଘନ୍ୟ କାଣ୍ଡ ସାମ୍ନାକୁ ଆସିଛି ବଲାଙ୍ଗୀର ଜିଲ୍ଲାରୁ । ଜଣେ ନାବାଳିକା, ଯିଏକି ନବମ ଶ୍ରେଣୀରେ ପଢନ୍ତି ତାଙ୍କୁ ଟ୍ୟୁସନରୁ ଡାକି ନେଇ ଗଣଦୁଷ୍କର୍ମ କରାଯାଇଛି । ପୁଣି ଦୁଷ୍କର୍ମକାରୀ ଆଉ କେହି ନୁହଁନ୍ତି, ବରଂ ତାଙ୍କରି ୫ ଜଣ ସହପାଠୀ । ଯେଉଁମାନେ ତାଙ୍କ ସହ ଏକାଠି ପାଠ ପଢନ୍ତି ।

ସହପାଠୀ ବାହାରିଲେ ସୈତାନ:

ତୁରେକେଲା ଥାନା ଅଞ୍ଚଳରେ ଘଟିଛି ଏହି ଲଜ୍ଜା । ଯାହା ଜଣାପଡିଛି, ଘଟଣାଟି ଡିସେମ୍ବର ୨୫ ତାରିଖର । ସବୁଦିନ ଭଳି ସେଦିନ ନାବାଳିକା ଜଣକ ଟ୍ୟୁସନ ଯାଇଥିଲେ । ସନ୍ଧ୍ୟାରେ ଟ୍ୟୁସନ ସାରି ଚାଲିଯାଇଥିଲେ ଶିକ୍ଷକ । ଏତିକି ବେଳେ ଜଣେ ୨୨ ବର୍ଷର ଯୁବକ ଟ୍ୟୁସନ ଭିତରକୁ ପଶିଥିଲା ଓ ନାବାଳିକାଙ୍କୁ ପାଖରେ ଥିବା ଏକ ନିର୍ମାଣଧୀନ କୋଠା ଭିତରକୁ ଡାକି ନେଇଥିଲା । ସେଠି ଛକି ରହିଥିଲେ ନାବାଳିକାଙ୍କ ଆଉ ୫ ଜଣ ସହପାଠୀ । ସମ୍ପୃକ୍ତ ଯୁବକ ସହ ୫ ଜଣ ସହପାଠୀ ମିଶି ଜଣକ ପରେ ଜଣେ ଝିଅଟିକୁ ଗଣଦୁଷ୍କର୍ମ କରିଥିଲେ । ଏପରିକି ଦୁଷ୍କର୍ମ ବେଳର ଭିଡିଓ କରି ଭାଇରାଲ କରିଥିଲା ଅଭିଯୁକ୍ତ ଯୁବକ । ଯାହାକି ଏବେ ଏ ମୋବାଇଲରୁ ସେ ମୋବାଇଲକୁ ଘୁରି ବୁଲୁଛି  ।

ସେତେବେଳେ ଘଟଣାଟି କୌଣସିମତେ ଚାପି ଦେଇଥିଲେ ଅଭିଯୁକ୍ତ। ହେଲେ ଏହି ଜଘନ୍ୟ କାଣ୍ଡର ଭିଡିଓ ଭାଇରାଲ ହେବା ପରେ ସାମ୍ନାକୁ ଆସିଥିଲା ଘଟଣା । ଏନେଇ ପୀଡିତା ଛାତ୍ରୀଙ୍କ ସମ୍ପର୍କୀୟ ବଲାଙ୍ଗୀର ପୋଲିସରେ ଅଭିଯୋଗ କରିଥିଲେ । ପୋଲିସ ଛାନଭିନରୁ ଜଣାପଡିଛି ଏ ପୂରା ଘଟଣାର ମାଷ୍ଟରମାଇଣ୍ଡ ଥିଲା ସେହି ସାବାଳକ ଜଣକ । ଅନ୍ୟ ୫ ଅଭିଯୁକ୍ତ ସହପାଠୀମାନେ ନାବାଳକ ଏବଂ ସମସ୍ତେ ହାଇସ୍କୁଲରେ ପଢନ୍ତି ।

ଦୁଷ୍କର୍ମ ଭିଡିଓ ଭାଇରାଲ:

ପୀଡିତାଙ୍କ ପରିବାର ଲୋକଙ୍କ ଅଭିଯୋଗ ପରେ ବଲାଙ୍ଗୀର ଏସପି ନିଜେ ଘଟଣାର ତଦନ୍ତ କରିବା ସହ ଦୋଷୀମାନଙ୍କୁ ଅଟକ ରଖିବା ପାଇଁ ନିର୍ଦ୍ଦେଶ ଦେଇଥିଲେ । ପୋଲିସ ସମସ୍ତ  ଅଭିଯୁକ୍ତଙ୍କୁ ପଚରାଉଚରା କରୁଛି । ନାବାଳିକାଙ୍କ ଡାକ୍ତରୀ ମାଇନା କରାଯାଇଛି । ଟ୍ୟୁସନରେ ନାବାଳିକାଙ୍କୁ ଗଣଦୁଷ୍କର୍ମର ଏ ଘଟଣା ଏବେ ସମଗ୍ର ରାଜ୍ୟରେ ଚାଞ୍ଚଲ୍ୟ ଖେଲାଇ ଦେଇଛି ।

ବଲାଙ୍ଗୀରରୁ ଘଟେଶ୍ୱର ମିଶ୍ର ଓ ମନରଞ୍ଜନ ଯୋଶୀଙ୍କ ରିପୋର୍ଟ, ଓଟିଭି