Mohsin Naqvi Orders: ଭାରତକୁ ଦିଆଯିବ ନାହିଁ ଟ୍ରଫି, ମୋ ଉପସ୍ଥିତିରେ ଟ୍ରଫି ଦିଆଯିବ...ମୋହସିନ୍ ନକଭିଙ୍କ ନିର୍ଦ୍ଦେଶ

ଭାରତକୁ ଦିଆଯିବ ନାହିଁ ଟ୍ରଫି । ମୁଁ ନ କହିବା ଯାଏ କାହାକୁ ଦିଆଯିବ ନାହିଁ ।ମୋ ଉପସ୍ଥିତିରେ ଟ୍ରଫି ଦିଆଯିବ । ଏମିତି କଡା ଜବାବ ଦେଇଛନ୍ତି ଏସିଆନ୍ କ୍ରିକେଟ୍ କାଉନ୍‌ସିଲ୍ ବା ACCର ମୁଖ୍ୟ ମୋହସିନ୍ ନକଭି। ସେପ୍ଟେମ୍ବର ୨୮ରେ ଦୁବାଇରେ ଏସିଆ କପ୍ ଫାଇନାଲରେ ଭାରତ ପାକିସ୍ତାନକୁ ହରାଇଥିଲା। ଏସିଆ କପ୍ ଜିତିବା ପରେ ଭାରତୀୟ ଟିମ୍ ନକଭିଙ୍କଠାରୁ ଟ୍ରଫି ନେବାକୁ ମନା କରିଦେଇଥିଲା। ତା’ପରେ ନକଭି ଏହାକୁ ନେଇଯାଇଥିଲେ, ଆଉ ସେବେଠାରୁ ଏହା ACC କାର୍ଯ୍ୟାଳୟରେ ଅଛି। 

ନକଭିଙ୍କ ନିକଟତର ଏକ ସୂତ୍ର କହିଛି ଯେ "ଆଜି ସୁଦ୍ଧା, ଟ୍ରଫିଟି ଦୁବାଇର ACC କାର୍ଯ୍ୟାଳୟରେ ଅଛି ଏବଂ ନକଭି ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି ଯେ ତାଙ୍କ ଅନୁମତି ଏବଂ ବ୍ୟକ୍ତିଗତ ଉପସ୍ଥିତି ବିନା ଏହାକୁ କାହାକୁ ହସ୍ତାନ୍ତର କରାଯିବ ନାହିଁ। ନକଭି ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି, ସେ କେବଳ ବ୍ୟକ୍ତିଗତ ଭାବେ ଭାରତୀୟ ଟିମ୍ କିମ୍ବା ବିସିସିଆଇକୁ ଟ୍ରଫି ହସ୍ତାନ୍ତର କରିବେ।

ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଚରମ ସୀମାରେ ରହିଛି। ଭାରତ ଏବଂ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ଭିତୟାରେ ଏସିଆ କପ୍ ଖେଳାଯାଇଥିଲା। ଭାରତୀୟ ଖେଳାଳିମାନେ ପୂରା ଟୁର୍ଣ୍ଣାମେଣ୍ଟରେ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇ ନଥିଲେ। ଏହା ବ୍ୟତୀତ, ନକଭି ସୋସିଆଲ ମିଡିଆରେ ରାଜନୈତିକ ବୟାନ ମଧ୍ୟ ଦେଇଥିଲେ।

ନକଭି ପାକିସ୍ତାନ କ୍ରିକେଟ୍ ବୋର୍ଡର ଅଧ୍ୟକ୍ଷ ଏବଂ ତାଙ୍କ ଦେଶର ଗୃହମନ୍ତ୍ରୀ ମଧ୍ୟ। ସେ ଟ୍ରଫି ନେଇ ଚାଲିଯାଇଥିବାରୁ ବିସିସିଆଇ ତାଙ୍କର କଡ଼ା ବିରୋଧ କରିଛି ଏବଂ ଆସନ୍ତା ମାସରେ ଆଇସିସି ବୈଠକରେ ଏହି ପ୍ରସଙ୍ଗ ଉଠାଇବାକୁ ନିଷ୍ପତ୍ତି ନେଇଛି। ନକଭିଙ୍କୁ ନିନ୍ଦା କରିବା ଏବଂ ତାଙ୍କୁ ACC ନିର୍ଦ୍ଦେଶକ ପଦରୁ ବହିଷ୍କାର କରିବା ପାଇଁ କଠୋର କାର୍ଯ୍ୟାନୁଷ୍ଠାନ ନିଆଯାଇପାରେ ବୋଲି କଳ୍ପନାଜଳ୍ପନା ଚାଲିଛି।