ମାଆ ପରି କିଏ ହେବ

କଟକ :  କଥାରେ ଅଛି, ମାଆ ଅଛି ଯାହାର ସବୁ ଅଛି ତାହାର । ଏହାର ଉଦାହରଣ ଦେଖିବାକୁ ମିଳିଛି କଟକ କ୍ୟାନସର ମେଡିକାଲରେ । ନିଜେ ଆଶ୍ରା ଖୋଜୁଥିବା ମାଆ ପରିଣତ ବୟସରେ ବି ଝିଅ ପାଇଁ ସାହାରା ପାଲଟିଛି। ମାନସିକ ରୋଗରେ ପୀଡ଼ିତ ଏକମାତ୍ର ଝିଅକୁ କଟକ କ୍ୟାନସର ହସ୍‌ପିଟାଲକୁ ଆଣି ଚିକିତ୍ସା କରାଉଛନ୍ତି ।

ଅଣ୍ଟା ନଇଁ ଗଲାଣି, ଖଣ୍ଡେ ବାଡ଼ି ହିଁ ଆଶ୍ରା । ଆଖିକୁ ଭଲ ଦିଶୁନି, ପାଟି ବି ଖନି ବାଜିଲାଣି । ହେଲେ ପରିଣତ ବୟସରେ ନିଜ ରୋଗିଣା ଝିଅର ଚିକିତ୍ସା କରାଉଛନ୍ତି ମାଆ । କଟକ କ୍ୟାନସର ହସପିଟାଲର ବାରଣ୍ଡା ପାଲଟିଛି ତାଙ୍କର ଠିକଣା । ଏହି ୯୦ ବର୍ଷିୟା ବୃଦ୍ଧା ଜଣକ ହେଉଛନ୍ତି କେନ୍ଦୁଝର ଅଞ୍ଚଳର ଉର୍ମିଳା ମହାନ୍ତ ।

ପରିବାର କହିଲେ ମାନସିକ ରୋଗରେ ପୀଡ଼ିତ ଏକମାତ୍ର ଝିଅ । ଝିଅର ବାମ ହାତ ପୋଡ଼ିଯାଇଥିବାବେଳେ ଏବେ ଅବସ୍ଥା ସାଂଘାତିକ । ଝିଅର ଚିକିତ୍ସା ପାଇଁ ପ୍ରଥମେ ଘସିପୁରା ମେଡ଼ିକାଲ ଓ ପରେ କଟକ କ୍ୟାନସର ହସପିଟାଲ ଆଣିଛନ୍ତି ଉର୍ମିଳା । କ୍ୟାନସର ରିପୋର୍ଟ ନଆସିବା ପର୍ଯ୍ୟନ୍ତ ଆଡ଼ିମିସନ ହୋଇପାରୁ ନଥିବାରୁ ବାଧ୍ୟ ହୋଇ ହସପିଟାଲ ବାରଣ୍ଡାରେ ପଡ଼ି ରହିଛନ୍ତି ମାଆ-ଝିଅ।

ଉର୍ମିଳାଙ୍କ ଏଭଳି ଅସମୟରେ ଦେବଦୂତ ପାଲଟିଛନ୍ତି ଅଭିମନ୍ୟୁ । କ୍ୟାନସର ହସପିଟାଲରେ ଅସହାୟ ରୋଗୀଙ୍କ ପାଇଁ କାମ କରୁଥିବା ଅଭିମନ୍ୟୁ ସହଯୋଗର ହାତ ବଢାଇଛନ୍ତି । ପ୍ରତିଦିନ ସଂକ୍ରମଣ ହାତର ଡ୍ରେସିଂ କରିବା ସହ ଖାଇବା ଓ ଭଲ ମନ୍ଦ ବୁଝିଥାନ୍ତି ଅଭିମନ୍ୟୁ।