ଓଡ଼ିଶାର ୩ କୋଟି ୨୪ ଲକ୍ଷ ଲୋକଙ୍କୁ ମିଳିବ, ୫ କେଜି ଚାଉଳ-ଗହମ

ଭୁବନେଶ୍ୱର: ରାଜ୍ୟରେ ଆରମ୍ଭ ହୋଇଛି ପ୍ରଧାନମନ୍ତ୍ରୀ ଗରୀବ କଲ୍ୟାଣ ଅନ୍ନ ଯୋଜନାର ଚତୁର୍ଥ ପର୍ଯ୍ୟାୟ । କୋଭିଡ୍‌ ମହାମାରୀ ସମୟରେ ଏହି ଖାଦ୍ୟ ସୁରକ୍ଷା ଯୋଜନା ଅଧିନରେ ପ୍ରତ୍ୟେକ ହିତାଧିକାରୀଙ୍କୁ ମାସିକ ମୁଣ୍ଡ ପିଛା ୫ କେଜି ଲେଖାଏଁ ଚାଉଳ କିମ୍ବା ଗହମ ଦିଆଯିବ । ଯୋଜନାର ଚତୁର୍ଥ ପର୍ଯ୍ୟାୟ ସମ୍ପ୍ରସାରଣ ଦ୍ୱାରା ଉପକୃତ ହେବେ ଓଡ଼ିଶାର ୩ କୋଟି ୨୪ ଲକ୍ଷ ହିତାଧିକାରୀ ।

ସ୍କିମ ଅଧିନରେ କେନ୍ଦ୍ର ସରକାର ଜୁଲାଇରୁ ନଭେମ୍ବର ଯାଏ ହିତାଧିକାରୀଙ୍କୁ ସମ୍ପୂର୍ଣ୍ଣ ମାଗଣାରେ ଯୋଗାଇବେ ଖାଦ୍ୟ ଶସ୍ୟ। ଏଥିପାଇଁ ରାଜ୍ୟକୁ ୧.୦୮ ଲକ୍ଷ ମେଟ୍ରିକ ଟନ୍‌ ଗହମ ଓ ୭.୦୩ ଲକ୍ଷ ମେଟ୍ରିକ ଟନ୍‌ ଚାଉଳ ଆବଣ୍ଟନ କରିଛନ୍ତି କେନ୍ଦ୍ର ସରକାର । ଚତୁର୍ଥ ପର୍ଯ୍ୟାୟ ସମ୍ପ୍ରସାରଣ କାରଣରୁ କେନ୍ଦ୍ର ସରକାର ମୋଟ ୩ ହଜାର ୪୪ କୋଟି ଟଙ୍କା ବହନ କରିବେ । ହିତାଧିକାରୀଙ୍କୁ ଚାଉଳ ଓ ଗହମ ଆବଣ୍ଟନ ଲାଗି FCI ଚାଉଳ କିଲୋ ୩୯ ଟଙ୍କା ଓ ଗହମ ୨୮ ଟଙ୍କାରେ କ୍ରୟ କରିଛି ।

ଏହାପୂର୍ବରୁ ତୃତୀୟ ପର୍ଯ୍ୟାୟରେ ମେ’ ଓ ଜୁନ୍‌ ଦୁଇ ମାସ ପାଇଁ ୨.୮୨ ଲକ୍ଷ ମେଟ୍ରିକ ଟନ୍‌ ଚାଉଳ ଏବଂ ୪୩ ହଜାର ମେଟ୍ରିକ ଟନ୍‌ ଗହମ ହିତାଧିକାରୀଙ୍କୁ ଦିଆଯାଇଛି । ତୃତୀୟ ପର୍ଯ୍ୟାୟରେ ଓଡ଼ିଶା ହିତାଧିକାରୀଙ୍କୁ ଖାଦ୍ୟଶସ୍ୟ ଆବଣ୍ଟନ ପାଇଁ ୧୨୨୦ କୋଟି ଖର୍ଚ୍ଚ କରିଥିଲେ କେନ୍ଦ୍ର ସରକାର । ଏନେଇ ଏଫସିଆଇ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ତଥ୍ୟ ରଖିଛନ୍ତି ଏହାର ଓଡ଼ିଶା ମହାପ୍ରବନ୍ଧକ ନିଶିଥ କୁମାର ପ୍ରଧାନ ।