Minor Girl Dies: ଉକୁଣୀ ନେଇଗଲା ଝିଅ ଜୀବନ, ରକ୍ତବାନ୍ତି ପରେ ନାବାଳିକାର ମୃତ୍ୟୁ

ଉକୁଣୀ ନେଇଗଲା ଝିଅ ଜୀବନ । ରକ୍ତବାନ୍ତି ପରେ ନାବାଳିକାର ମୃତ୍ୟୁ । ଅନେକ ଦିନ କଷ୍ଟ ପାଇ ପାଇ ଆଖିବୁଜିଲା ନାବାଳିକା । ପରିବାରର ଦାୟିତ୍ବହୀନତା ସାରିଦେଲା ସବୁକିଛି ! ଏମିତି ଏକ ଅଭାବନୀୟ ଘଟଣା ଅନ୍ୟ କେଉଁ ସ୍ଥାନରୁ ନୁହେଁ, ଖୋଦ୍ ପୁରୀ ଜିଲ୍ଲରୁ ସାମ୍ନାକୁ ଆସିଛି ।

ବଳଙ୍ଗା ଥାନା ଅନ୍ତର୍ଗତ ଚମ୍ପାଗଡ଼ ସାହିରେ ଏହି ଘଟଣା ଘଟିଛି । ଲିଙ୍ଗରାଜ ସାହୁଙ୍କ ଝିଅ ଲକ୍ଷ୍ମୀପ୍ରିୟା ସାହୁଙ୍କ ମୁଣ୍ଡରେ ମାତ୍ରାଧିକ ଉକୁଣୀ ହେବାରୁ ତାଙ୍କର ମୃତ୍ୟୁ ହୋଇଛି । ଘଟଣାଟି ଅଜବ ଲାଗୁଥିଲେ ବି ସତ । ପରିବାର ଲୋକଙ୍କ ଦାୟିତ୍ବହୀନତା ଓ ଚିକିତ୍ସା ଅବହେଳାରୁ ଝିଅଟିର ମୁଣ୍ଡରେ ମାତ୍ରଧିକ ଉକୁଣୀ ବଢ଼ିଯାଇଥିଲା । ଆଉ ଏବେ ସେ ଆଖି ବୁଜିଛି । 

ଲକ୍ଷ୍ମୀପ୍ରିୟା ୬ଷ୍ଠ ଶ୍ରେଣୀର ଛାତ୍ରୀ ଥିଲେ । କିଛି ମାସ ତଳେ ତାଙ୍କ ମୁଣ୍ଡରେ ପ୍ରବଳ ଉକୁଣୀ ହୋଇଥିଲା । ଅନେକ ପ୍ରତିକାର କରିବା ସତ୍ତ୍ୱେ ଭଲ ହୋଇନଥିଲା । ମା’ ସତ୍ୟଭାମା ସାହୁ ଝିଅକୁ ଲଣ୍ଡା ହେବାକୁ କହିଥିଲେ । ହେଲେ ଲକ୍ଷ୍ମୀପ୍ରିୟା ରାଜି ହୋଇନଥିଲେ । ତା’ ଭିତରେ ଉକୁଣୀଗୁଡ଼ିକ ଖପୁରୀକୁ ଆକ୍ରାନ୍ତ କରିଥିଲେ ।

ତେଣୁ ମୁଣ୍ଡ ସାରା ସଂକ୍ରମଣ ହୋଇଥିଲା । ମୁଣ୍ଡରୁ ଦୁର୍ଗନ୍ଧ ବାହାରିବାରୁ ଲକ୍ଷ୍ମୀପ୍ରିୟା ଘରୁ ବାହାରିବା ବନ୍ଦ କରିଦେଇଥିଲେ । ହେଲେ ହଠାତ୍ ୩ ଦିନ ତଳେ ତାଙ୍କର ରକ୍ତବାନ୍ତି ହେବା ପରେ ପରିବାର ଲୋକେ ତାଙ୍କୁ ପୁରୀ ମେଡିକାଲକୁ ନେଇଥିଲେ । କିନ୍ତୁ ସେଠାରେ ଚିକିତ୍ସାଧୀନ ଅବସ୍ଥାରେ ଶନିବାର ରାତିରେ ଲକ୍ଷ୍ମୀପ୍ରିୟାଙ୍କ ମୃତ୍ୟୁ ଘଟିଛି ।

ଉକୁଣୀ ଯୋଗୁ ନାବାଳିକାର ମୃତ୍ୟୁ ହୋଇଥିବା କୁହାଯାଉଥିବା ବେଳେ ସ୍ବାସ୍ଥ୍ୟ ବିଶେଷଜ୍ଞଙ୍କ ମତ କିଛି ଅଲଗା ରହିଛି । ଅନ୍ୟପକ୍ଷରେ ପରିବାର ଲୋକ ଉଚିତ ଚିକିତ୍ସା କରାଇଥିଲେ ହୁଏତ ଝିଅଟିର ଜୀବନ ବଞ୍ଚିଯାଇଥାନ୍ତା ବୋଲି ଆଲୋଚନା ହେଉଛି ।