Khandadhar Waterfall : ଶୁଖିଲାଣି ଚିରସ୍ରୋତା ଖଣ୍ଡାଧାର, କେବେ ଚେତିବ ପ୍ରଶାସନ ?

ନାଁ ତା’ର ଚିରସ୍ରୋତା… ହେଲେ ସେ ସ୍ରୋତ ଆଉ ଚିର ହୋଇନାହିଁ । ଖଣି ପାଣି ଶୋଷିନେଲା ପରେ ଏବେ ଶୁଖିଲା ଚିରସ୍ରୋତା ଖଣ୍ଡାଧାର । ଯିଏ ଦିନେ ପ୍ରକୃତର ସେ ସୌନ୍ଦର୍ଯ୍ୟ ପାଇଁ ସମସ୍ତଙ୍କ ପ୍ରଥମ ପସନ୍ଦ ପାଲଟିଥିଲା । 

ତା’ ଠାରୁ ଏବେ ଧୀରେ ଧୀରେ ମୁହଁ ଫେରାଇ ନେଉଛନ୍ତି ପର୍ଯ୍ୟଟକ ।  ‌କେନ୍ଦୁଝର ଜିଲ୍ଲାର ପ୍ରମୁଖ ପର୍ଯ୍ୟଟନସ୍ଥଳ ହେଉଛି ଖଣ୍ଡାଧାର ଜଳପ୍ରପାତ । ବର୍ଷତମାମ ଖଣ୍ଡାଧାର ପାହାଡ଼ ଶିଖରରୁ ଖସି ଆସୁଥିବା ଝରଣାର ଜଳରାଶି ଶୁଖିଯିବାରୁ ଏଭଳି ଅସ୍ବାଭାବିକ ଘଟଣା ସମସ୍ତଙ୍କୁ ଚକିତ କରିଛି । ସେପଟେ ଏହାକୁ ପରିବେଶବିତ୍‌ ଓ ପର୍ଯ୍ୟଟକମାନେ ସମ୍ପୂର୍ଣ୍ଣ ଭାବେ ମନୁଷ୍ୟକୃତ ବୋଲି କହିବା ସହ ଘୋର ଉଦ୍‌ବେଗ ପ୍ରକାଶ କରିଛନ୍ତି ।

ଅନିୟନ୍ତ୍ରିତ ଖଣି ଖନନ ଯୋଗୁଁ ଖଣ୍ଡାଧାରର ଏ ଅବସ୍ଥା ବୋଲି କୁହାଯାଉଛି । ଝରଣାଠାରୁ ଦେଢ଼କିଲୋମିଟର ଦୂରରେ ସିରିକାକୁଟ ଲୁହାପଥର ଖଣି ଥିବାରୁ ପାଣି ଶୁଖିଯାଉଛି । ଖଣ୍ଡାଧାର ପାହାଡ଼ର ୩୫୦ ଫୁଟ ଉଚ୍ଚରୁ ଜଳ ଖସୁଥିବାରୁ ଏହାର ନାଁ ହୋଇଥିଲା ଖଣ୍ଡାଧାର ।

ବର୍ଷତମାମ ଅନବରତ ଏଠି ପାଣି ରୁହେ । ତେଣୁ ଚିରସ୍ରୋତା ବୋଲି କୁହାଯାଏ । ହେଲେ ଏବେ ଖରାଦିନ ଆରମ୍ଭ ନ ହେଉଣୁ ଜଳପ୍ରପାତ ଏକପ୍ରକାର ଶୁଖିଲା ପଡ଼ିଲାଣି । ତେଣୁ ପର୍ଯ୍ୟଟକଙ୍କ ସଂଖ୍ୟା ହ୍ରାସ ପାଉଥିବାରୁ ବ୍ୟବସାୟୀ ମାନେ ପ୍ରଭାବିତ ହୋଇଛନ୍ତି ।

ସେପଟେ ଏନେଇ ଆମେ କେନ୍ଦୁଝର ଡିଏଫଓଙ୍କ ସହ ଯୋଗାଯୋଗ କରିବାରୁ ସେ ଏହି କଥାରେ ପ୍ରାସଙ୍ଗିକତା ଅଛି ବୋଲି କହିବା ସହ କିନ୍ତୁ ଋତୁ ଅନୁସାରେ ଯେତିକି ପାଣି ରହିବା କଥା ସେତିକି ଅଛି ବୋଲି କହିଛନ୍ତି । 

ଚିରସ୍ରୋତା ଖଣ୍ଡାଧାରକୁ ନେଇ ଏବେ ସ୍ଥାନୀୟ ଲୋକେ ଓ ପରିବେଶବିତ୍ ଚିନ୍ତାରେ । ତେଣୁ ଖଣ୍ଡାଧାରର ସୁରକ୍ଷା ପାଇଁ ସରକାର ଓ ପ୍ରଶାସନ ପଦକ୍ଷେପ ନେବାରେ ଆବଶ୍ୟକତା ହୋଇପଡ଼ିଛି ।