Hospital or Death Trap: ଚିକିତ୍ସାଳୟ ନା ଯମାଳୟ ! ପ୍ରସୂତି ମହିଳାଙ୍କ ମୃତ୍ୟୁକୁ ନେଇ ଯାଜପୁରରେ ଚାଞ୍ଚଲ୍ୟ

ଚିକିତ୍ସାଳୟ ନା ଯମାଳୟ  !  ମେଡିକାଲକୁ ଗଲେ ଆଉ ଜୀବନ ନେଇ ଫେରୁନାହାନ୍ତି ପ୍ରସୂତି । ପ୍ରସୂତି ମହିଳାଙ୍କ ମୃତ୍ୟୁକୁ ନେଇ ଯାଜପୁରରେ ଚାଞ୍ଚଲ୍ୟ । ତାତିଲେ ମୃତକଙ୍କ ପରିବାର ଓ ସଂପର୍କୀୟ ।  ହସ୍ପିଟାଲରେ ଭଙ୍ଗାରୁଜା ।  ପରିସ୍ଥିତି ଅଣାୟତ ଦେଖି ତାଲା ପକାଇ ଛୁ ମାରିଲେ ମେଡିକାଲ କର୍ତ୍ତୃପକ୍ଷ । ପରିବାର ଲୋକଙ୍କ ଅଭିଯୋଗ- ମାରିଦେଲେ ବୋହୂକୁ ! ନବଜନ୍ମିତ ଶିଶୁ ହୋଇଗଲା ମା’ ଛେଉଣ୍ଡ । ନ୍ୟାୟ ଦାବିରେ ଘରୋଇ ଚିକିତ୍ସାଳୟ ଆଗରେ ଧାରଣା ଦେଲେ ମୃତକଙ୍କ ପରିବାର ଲୋକ ।

ଯାଜପୁର ମେଡିକାଲ ଛକ ପାଖରେ ଥିବା ଗୋଟେ ଘରୋଇ ହସ୍ପିଟାଲ ଆଗରେ ଏଭଳି କିଛି ଦେଖିବାକୁ ମିଳିଛି । ମୃତ ପ୍ରସୂତି ମା’ଙ୍କ ଡେଡବଡି ରଖି ପରିବାର ଲୋକ ନ୍ୟାୟ ମାଗୁଛନ୍ତି । କହୁଛନ୍ତି କୁନିପୁଅକୁ ଫେରାଇଦିଅ ତା ମା’, ଆମକୁ ଫେରାଇ ଦିଅ ଆମ ଝିଅ । 

ଯାଜପୁର ଖଣ୍ଡର ଅଞ୍ଚଳର ସସ୍ମିତା ଗେଡି ଗତ ୨୪ ତାରିଖରେ ସନ୍ତାନ ପ୍ରସବ ଲାଗି ଅପରେସନ ହୋଇଥିଲେ । ଏଇ ହସ୍ପିଟାଲରେ ଡାକ୍ତର ତାଙ୍କ ଅପରେସନ କରିଥିଲେ ।  ହେଲେ ଅପରେସନ ପରେ ଅଧିକ ବ୍ଲିଡିଂ ହେବାରୁ ସେ ଗୁରୁତର ହୋଇପଡ଼ିଥିଲେ ।  ତେଣୁ ତାଙ୍କୁ ବୁଧବାର ସକାଳେ କଟକ ବଡ଼ ମେଡିକାଲ ସ୍ଥାନାନ୍ତର କରିଥିଲେ ଘରୋଇ ମେଡିକାଲ କର୍ତ୍ତୃପକ୍ଷ । ଏସସିବିରେ ତାଙ୍କର ସୋମବାର ରାତିରେ ମୃତ୍ୟୁ ହୋଇଯାଇଥିଲା ।  ପରିବାର ଲୋକଙ୍କ ଅଭିଯୋଗ ଅପରେସନ ତ୍ରୁଟି କାରଣରୁ ଏପରି ହୋଇଛି । ସୂଚନା ଅନୁସାରେ ଉକ୍ତ ଘରୋଇ ମେଡିକାଲରେ ସେଇ ୨୪ ତାରିଖରେ ବରି ରତ୍ନଗିରି ଅଞ୍ଚଳରୁ ଆସିଥିବା ଆଉଜଣେ ମହିଳାଙ୍କର ମଧ୍ୟ ପ୍ରସବ ପରେ ମୃତ୍ୟୁ ହୋଇଥିଲା । 

ଗୋଟିଏ ଦିନରେ ଦୁଇଟି ଅଘଟଣ ଘଟିବା ପରେ ସମସ୍ତଙ୍କର ପ୍ରଶ୍ନ ଏହା ଚିକିତ୍ସାଳୟ ନା ଯମାଳୟ ? ବାରମ୍ବାର ଏପରି ହେଉଥିବାରୁ ତୁରନ୍ତ ସଂପୃକ୍ତ ଘରୋଇ ମେଡିକାଲକୁ ବନ୍ଦ କରାଯିବା ସହ ମୃତକଙ୍କ ପରିବାରକୁ କ୍ଷତିପୂରଣ ଦେବାକୁ ଦାବି ହୋଇଛି । 

ଏତେ କଥା ଘଟି ଯାଇଥିଲେ ବି ମେଡିକାଲ କର୍ତ୍ତୃପକ୍ଷ ନାହିରେ ଯେମିତି ତେଲ ପକାଇ ଶୋଇପଡ଼ିଛନ୍ତି । ପରିସ୍ଥିତି ଅଣାୟତ ହେଉଥିବା ଦେଖି ମେଡିକାଲରେ ଚାବି ପକାଇ କର୍ତ୍ତୃପକ୍ଷ ଫେରାର ହୋଇଯାଇଥିବା ଦେଖିବାକୁ ମିଳିଛି । ଅଭିଯୋଗ ହେଉଛି ସରକାରୀ ଡାକ୍ତର ଏଠାକୁ ଆସି ତରବର ହୋଇ ବେଆଇନ ଭାବେ ଲୁଚାଛପାରେ ଚିକିତ୍ସା କରୁଛନ୍ତି । ସେପଟେ ଏନେଇ ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଧିକାରୀ କହିଛନ୍ତି ତଦନ୍ତ କରାଯିବ ।