Odisha’s Golden Secret: ଓଡ଼ିଶା ଗର୍ଭରେ ସୁନା ଲୁଚିଥିବା ସ୍ପଷ୍ଟ, ୧୧ ଜିଲ୍ଲାର ମାଟି ତଳେ ସୁନା ଥିବା ନେଇ ବିଧାନସଭାରେ ତଥ୍ୟ

ବଢୁଛି ସୁନା ଦର । ଅମୁଲ ମୂଲ ହେଉଛି ହଳଦିଆ ଧାତୁ। ସୁନା ଦରକୁ ନେଇ ଚାରିଆଡେ ଚର୍ଚ୍ଚା ଚାଲିଥିିବା ବେଳେ ବିଧାନସଭାରୁ ଆସିଲା ଆଶ୍ବସ୍ତିକର ଖବର ।  ଓଡିଶା ମାଟି ତଳେ ରହିଛି କ୍ୱିଣ୍ଟାଲ କ୍ୱିଣ୍ଟାଲ ସୁନା । ବିଧାନସଭାରେ ଖଣି ମନ୍ତ୍ରୀ ରଖିଛନ୍ତି ଲିଖିତ ଉତ୍ତର ।

ମୟୂରଭଞ୍ଜ ମଦନସାହି କାଞ୍ଜିଆ ସୁନା ଖଣିରେ ରହିଛି ୧ ହଜାର ୪୬୨ କେଜି ୭୩୦ ଗ୍ରାମ ସୁନା । ଜିଏସଆଇ ଦ୍ୱାରା ଜି-2 ସର୍ଭେ ପରେ ଏହି ତଥ୍ୟ ସାମ୍ନାକୁ ଆସିଛି । ଏହାବାଦ ଦେବଗଡ ଜିଲ୍ଲାର ଆଡାସ-ରାମପାଲି, କେନ୍ଦୁଝର ଜିଲ୍ଲାର ଗୋପୁର-ଜଳଡ଼ିହି ଅଞ୍ଚଳରେ ସୁନାପଥର ଥିବା ସନ୍ଧାନ ମିଳିଛି ।

ସେହିପରି କେନ୍ଦୁଝର ଜିଲ୍ଲାର ଗାଜିପୁର, ସଲେଇକଣା, ଡିମିରିମୁଣ୍ଡା ଏବଂ ମୟୂରଭଞ୍ଜର ଯଶିପୁର, ସୁରିଆଗୁଡା, ରୁଆଁସି, ଇଡେଲକୁଚା, ମରେଡ଼ିହି ଓ ସୁଲେଇପାଟ (ଧୂସୁରା ପାହାଡ) ଏବଂ ବାଦାମପାହାଡ, ସୁନ୍ଦରଗଡର ଦିଗଝରଣ, ମାଲଡ଼ିହି, ଘୋଗର ଓ ଗିରିଙ୍ଗିକେଳା. କୋରାପୁଟର ରୋଙ୍ଗପନ୍ତ, ଗାରିଆ ଓ ଦଶମନ୍ତପୁର, ମାଲକାନଗିରିର ସୁନାପଦର, କ୍ୟାଙ୍ଗ ଓ ଗୋବିନ୍ଦପଲ୍ଲୀ, ଅନୁଗୁଳର ମାଙ୍କଡଚୁଆଁ, ଟିକିର, ସୋମାକୋଇ, ବୌଦ୍ଧର କୁଦଗାଁ, ଜହ୍ନାପଙ୍କ ଓ ରାମଗଡ,  ସମ୍ବଲପୁରର କେନ୍ଦୁଖୁଣ୍ଟି ଓ କୁନ୍ତରବାହଲ, ଦେବଗଡ ଜିଲ୍ଲାର ସୁନାକେନି, ନିକିତାମାଲ ଓ ଗାଇଲୋ ଅଞ୍ଚଳରେ ସୁନାପଥର ବିକ୍ଷିପ୍ତ ଭାବରେ ଥିବାର ଅନୁମାନ କରାଯାଉଛି ।

ଏପଟେ ମୟୂରଭଞ୍ଜ ଜିଲ୍ଲା କୁଳିଅଣା ବ୍ଲକ କାଞ୍ଜିଆସାହି ଅଞ୍ଚଳରେ ବିଲ କ୍ଷେତ ଭିତରେ ଚାଲିଛି ଡ଼୍ରିଲିଂ । ବଡ଼ ବଡ଼ ମେସିନରେ ଶହେ ଫୁଟ ତଳକୁ ଖୋଳାଯାଇ ମାଟିର ନମୁନା ନିଆଯାଉଛି ।  ଜାତୀୟ ଭୂତତ୍ତ୍ବ ବିଭାଗର କର୍ମଚାରୀମାନେ ଏହି ସବୁ ମେସିନରେ ମାଟି ତଳୁ ନମୁନା ସଂଗ୍ରହ କରି ସେଣ୍ଟ୍ରାଲ ଲାବରୋଟରିକୁ ପଠାଉଛନ୍ତି ।

୧୫୦ ହେକ୍ଟର ଜମି ତଳେ ସୁନା

ସେହିପରି ରତ୍ନଗର୍ଭା କେନ୍ଦୁଝର ଜିଲ୍ଲାରେ ବାଂଶପାଳ ବ୍ଲକର ଜଳଡିହା ଗାଁ ନିକଟ ସୁନାଖଣି ଜଙ୍ଗଲରେ ପ୍ରାୟ ୧୫୦ ହେକ୍ଟର ଜମି ତଳେ ରହିଛି ସୁନା । ଆଉ ରାଜ୍ୟ ସରକାର ଏହି ସୁନାଖଣିକୁ ନିଲାମ ପାଇଁ  ଆସନ୍ତା ୩ ତାରିଖରେ ଏକ ଉଚ୍ଚସ୍ତରୀୟ ବୈଠକ ମଧ୍ୟ ଡାକିଥିବା ଜଣାପଡ଼ିଛି ।  ଯାହାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । 

ନିକଟରେ ରାଜ୍ୟ ସରକାର ଦୁଇ ସୁନା ଖଣି ସମେତ ୪୯ ଖଣିର ନିଲାମ ପାଇଁ ବାର୍ଷିକ ନିଲାମ କ୍ୟାଲେଣ୍ଡର ପ୍ରସ୍ତୁତି ପ୍ରକ୍ରିୟା ଆରମ୍ଭ କରିଛନ୍ତି।