OAS Officer: ଝିଅ ପାଇଲା ଓଏଏସ୍, ବାଣ ରୋଷଣୀରେ ସ୍ବାଗତ କଲେ ଗାଁର ବୁଢାଠୁ ପିଲା

ରୋଷଣୀ କରି ଗାଁକୁ ଫେରୁଛି ଝିଅ । ବାଜା ବାଜୁଛି… ବାଣ ଫୁଟୁଛି । ଆଉ ଡିଜେର ତାଳେତାଳେ ନାଚୁଛନ୍ତି ଗାଁର ବୁଢ଼ାଠୁ ପିଲା । କାରଣ ଗରିବ ଘରର ଝିଅଟି ଆଜି ଗାଁକୁ ଗୌରବ ଆଣିଛି । OCS ପରୀକ୍ଷାରେ ୪୬ ନମ୍ବର ରାଙ୍କ ରଖି OAS ଅଫିସର ହୋଇଛି । ଦିନେ ଯେଉଁ ପରିବାର ଆର୍ଥିକ ଅନଟନ ଭିତରେ ଯୁଝିଯୁଝି ଝିଅକୁ ପାଠ ପଢ଼ାଉଥିଲା । ସେଇ ବାପା-ମା’ଙ୍କ ଛାତି ଆଜି କୁଣ୍ଢେମୋଟ ହୋଇଯାଇଛି । ତାଙ୍କ ଝିଅ ଗାଁର ନାଁ ରଖିଛି । ଆଉ ଆଗକୁ ଜିଲ୍ଳାପାଳ ହେବାକୁ ଯାଉଛି ।
ବାପା-ମା’ଙ୍କ ଢେର ଭଲପାଇବା । ବଡ଼ ମାନଙ୍କ ଅଜସ୍ର ଆଶୀର୍ବାଦ । ଆଉ ନିଜର ପରିଶ୍ରମ ତାଙ୍କୁ ଆଜି ସ୍ବତନ୍ତ୍ର ପରିଚୟ ଦେଇଛି । ଫଳରେ ଭଦ୍ରକ ବ୍ଲକ ବଲଭଦ୍ର ପୁର ଗାଁର ପ୍ରଥମ OAS ହୋଇଛନ୍ତି ସୁନା ଝିଅ ସ୍ଵାତୀଦୀପା । ଅର୍ଥ ଅଭାବରୁ କୋଚିଂ ନେବା ତାଙ୍କ ପକ୍ଷେ ସମ୍ଭବ ନଥିଲା । କେବଳ ସେ ଅନଲାଇନରେ କ୍ଲାସ କରୁଥିଲେ । ପରେ ଶିକ୍ଷକଙ୍କ ସହଯୋଗ ତାଙ୍କ ସ୍ବପ୍ନକୁ ସାକାର କରିଥିବା କହିଛନ୍ତି ସ୍ଵାତୀଦିପାଙ୍କ ମା’ । ଆଉ ସେ ତାଙ୍କ ଗେହ୍ଲା ଝିଅ ପାଇଁ ଆଜି ଖୁବ୍ ଗର୍ବ କରୁଛନ୍ତି ।
ଏଠି ଗରିବୀ ଭାଙ୍ଗିପାରିନି ମନୋବଳ । ଅର୍ଥର ଅଭାବ ଚାପି ପାରିନି ଆଖିର ସ୍ବପ୍ନକୁ । ଦୃଢ଼ ଇଚ୍ଛାକ୍ତି ଆଜି ସବୁ ସ୍ବପ୍ନକୁ ସାକାର କରିଛି । ପରିବାରର ନାଁ ରଖିଛି, ତା’ ଛୋଟ ଗାଁକୁ ସାରା ଓଡ଼ିଶାକୁ ଚିହ୍ନାଇଛି । ଆଉ ନିଜ ପାଇଁ ସମ୍ମାନର ପହାଡ଼ ତିଆରି କରି ଅନ୍ୟ ମାନଙ୍କ ପାଇଁ ସ୍ବାତୀଦୀପା ପାଲଟିଛନ୍ତି ଉଦାହରଣ ।

ଅଧିକ ଦେଖନ୍ତୁ: