ଜମ୍ମୁ କାଶ୍ମୀରରେ ପ୍ରବଳ ବର୍ଷା, ଭାସିଗଲେ ଦୁଇ ଯବାନ

ଜାମ୍ମୁ କାଶ୍ମୀର ପୁଞ୍ଚରେ ବର୍ଷା ବିପାତ। ପ୍ରବଳ ବର୍ଷା ଯୋଗୁ ପୋଷାନା ନଦୀରେ ଅଚାନକ ବନ୍ୟା ଆସିବାରୁ ଭାସି ଯାଇଛନ୍ତି ସ୍ଥଳସେନାର ଦୁଇ ଯବାନ। ସେମାନଙ୍କୁ ଉଦ୍ଧାର କରିବା ପାଇଁ ଲାଗି ପଡିଛନ୍ତି ସେନା, ପୋଲିସ ଓ ଏସଡିଆରଏଫ ଟିମ୍। ସର୍ଚ୍ଚ ଅପରେସନ୍ ଜାରି ରହିଥିବା ବେଳେ ଏ ପର୍ଯ୍ୟନ୍ତ ନିଖୋଜ ଯବାନଙ୍କ ପତ୍ତା ମିଳିନାହିଁ। ସେପଟେ ଉଦ୍ଧାମପୁରରେ ପ୍ରବଳ ବର୍ଷାରୁ ଭୂସ୍ଖଳନ ହୋଇଛି। ଫଳରେ ଜାମ୍ମୁ-ଶ୍ରୀନଗର ଜାତୀୟ ରାଜପଥ ବନ୍ଦ ହୋଇଯାଇଛି। ଏହି ଜାତୀୟ ରାଜପଥରେ ଅଟକି ରହିଛି ହଜାର ହଜରା ସଂଖ୍ୟା ଗାଡ଼ି। ଉଦ୍ଧମପୁରଠାରେ ମାଲ ବୋଝେଇ ଟ୍ରକଗୁଡିକର ଲମ୍ବା ଲାଇନ୍ ଦେଖିବାକୁ ମିଳିଛି।

ସେହିଭଳି ରାଜସ୍ଥାନର ଶିଖର ଅଂଚଳରେ ଗତ କିଛି ଦିନ ହେଲାଣି ଲଗାତର ବର୍ଷା ହେଉଛି। ଏଥିଯୋଗୁଁ ଅନେକ ଅଂଚଳ ପାଣି ଘେରରେ ରହିଛି। ରାସ୍ତା ଉପରେ ରହିଛି ୪ଫୁଟ ଉଚ୍ଚର ପାଣି। ଏଥିଯୋଗୁଁ ଲୋକମାନେ ଅତ୍ୟନ୍ତ ବିପଜ୍ଜନକଭାବେ ଯାତ୍ରା କରୁଛନ୍ତି । ଟ୍ରାକ୍ଟର ସେମାନଙ୍କ ପାଇଁ ସାହାରା ପାଲଟିଛି । ଫସିରହିଥିବା ଏକ କାରକୁ ବାହାରକୁ ନେବା ପାଇଁ ଲୋକମାନେ ଠେଲି ଠେଲି ନେଉଥିବା ଦେଖିବାକୁ ମିଳିଛି ।