Delhi Rain: ଦିଲ୍ଲୀରେ ୧୫ ବର୍ଷ ପରେ ଏପରି ବର୍ଷା, ଲୋକେ ଭୟଭୀତ.... ୟେଲୋ ଆଲର୍ଟ ଜାରି

ଏପରି ଲାଗୁଛି ଯେ ମୌସୁମୀ ଏଥର ଦିଲ୍ଲୀରୁ ଶୀଘ୍ର ବିଦାୟ ନେବା ମୁଡ଼ରେ ନାହିଁ। ସୋମବାର ଦିଲ୍ଲୀ-ଏନସିଆର ପାଇଁ ଜାରି ହୋଇଥିବା ଭାରତୀୟ ପାଣିପାଗ ବିଭାଗ (ଆଇଏମଡି)ର ଆଲର୍ଟ ସତ ହେଲା ଏବଂ ଅପରାହ୍ନରେ ପ୍ରବଳ ବର୍ଷା ହୋଇଛି । ପାଣିପାଗ ବିଭାଗ ଅନୁସାରେ ଦିଲ୍ଲୀରେ ୧୫ ବର୍ଷ ପରେ ଏପରି ବର୍ଷା ହୋଇଛି। ବର୍ତ୍ତମାନ ରାଜଧାନୀରେ ବର୍ଷା ଯୋଗୁଁ ତାପମାତ୍ରା କମ ରହିଛି, କିନ୍ତୁ ସାଧାରଣ ଜନଜୀବନ ଉପରେ ଏହାର ବଡ଼ ପ୍ରଭାବ ପଡ଼ୁଛି। ଦିଲ୍ଲୀ ବ୍ୟତୀତ ପଡ଼ୋଶୀ ରାଜ୍ୟ ପଞ୍ଜାବ ଓ ହରିୟାଣା ମଧ୍ୟ ପ୍ରବଳ ବର୍ଷା ହୋଇଛି

ଦେଶର ରାଜଧାନୀର କିଛି ଅଞ୍ଚଳରେ ସୋମବାର ଅପରାହ୍ନରେ ବର୍ଷା ହୋଇଥିଲା ଏବଂ ସହରରେ ହାଲୁକା ଓ ମଧ୍ୟମରୁ ପ୍ରବଳ ବର୍ଷା ପାଇଁ ୟେଲୋ ଆଲର୍ଟ ଜାରି କରାଯାଇଛି। ଦିଲ୍ଲୀରେ ନ୍ୟୂନତମ ତାପମାତ୍ରା ୨୩.୭ ଡିଗ୍ରୀ ସେଲସିୟସ ରେକର୍ଡ କରାଯାଇଛି, ଯାହା ମୌସୁମୀ ହିସାବରେ ହାରାହାରିରୁ ୨.୮ ଡିଗ୍ରୀ କମ।

ଆଇଏମଡି ଅନୁସାରେ ସର୍ବାଧିକ ତାପମାତ୍ରା ୩୦ ଡିଗ୍ରୀ ସେଲସିୟସ ଆଖପାଖରେ ରହିବ ବୋଲି ଆଶା କରାଯାଉଛି । ପାଣିପାଗ ବିଭାଗ ଆଗାମୀ ପାଞ୍ଚ ଦିନ ପର୍ଯ୍ୟନ୍ତ ଦିଲ୍ଲୀ ଓ ତା’ର ଆଖପାଖ ଅଞ୍ଚଳରେ ସକ୍ରିୟ ମୌସୁମୀର ପୂର୍ବାନୁମାନ କରିଛି। ପାଣିପାଗ ବିଭାଗ ଅନୁସାରେ, ରାଜଧାନୀ ଓ ଆଖପାଖ ଅଞ୍ଚଳରେ ମେଘାଚ୍ଛନ୍ନ ରହିବ ଏବଂ ହାଲୁକାରୁ ମଧ୍ୟମ ବର୍ଷାର ପର୍ଯ୍ୟାୟ ଜାରି ରହିବ। ସେହିପରି ସହରର କିଛି ସ୍ଥାନରେ, ଖାସକରି ସନ୍ଧ୍ୟା, ରାତି ସମୟରେ ପ୍ରବଳ ବର୍ଷା ମଧ୍ୟ ହୋଇପାରେ।

ଆଇଏମଡିର ତଥ୍ୟ ଅନୁସାରେ, ରାଜଧାନୀରେ ଅଗଷ୍ଟରେ ୩୯୯.୮ ମିମି ବର୍ଷା ରେକର୍ଡ ହୋଇଛି, ଯାହା ୧୫ ବର୍ଷରେ ଏହି ମାସରେ ସବୁଠାରୁ ଅଧିକ ବର୍ଷା। ଏହା ପୂର୍ବରୁ ଦିଲ୍ଲୀରେ ଏତେ ବର୍ଷା ୨୦୧୦ରେ ୪୫୫.୮ ମିମି ରେକର୍ଡ ହୋଇଥିଲା। ଏଥର ଅଗଷ୍ଟର ବର୍ଷା ଗତ ବର୍ଷ ଅର୍ଥାତ୍ ୨୦୨୪ର ୩୯୦.୩ ମିମି ତୁଳନାରେ ମଧ୍ୟ ଅଧିକ । ୨୦୨୪ରେ ବର୍ଷା ମାତ୍ର ୧୭ ଦିନ ହୋଇଥିଲା ଏବଂ ଦୀର୍ଘକାଳୀନ ହାରାହାରି ଠାରୁ ୬୭ ପ୍ରତିଶତ ଅଧିକ ଥିଲା। ଏହି ବର୍ଷ ଅଗଷ୍ଟରେ ୧୪ ଦିନ ବର୍ଷା ହୋଇଛି ଏବଂ ମୋଟାମୋଟି ମୌସୁମୀ ହାରାହାରି ଠାରୁ ଅଧିକ ବର୍ଷା ହୋଇଛି। ଏହା ବ୍ୟତୀତ, ଅଗଷ୍ଟ ୨୦୨୩ରେ ମାତ୍ର ୯୧.୮ ମିମି, ୨୦୨୨ରେ ୪୧.୬ ମିମି ଏବଂ ୨୦୨୧ରେ ୨୩୭ ମିମି ବର୍ଷା ରେକର୍ଡ ହୋଇଥିଲା।

ଆଇଏମଡି କହିଛି ଯେ ଏହି ମୌସୁମୀରେ ସେପ୍ଟେମ୍ବର ରେକର୍ଡ ବର୍ଷା ହେବ। ଆଇଏମଡିର ତଥ୍ୟ ଅନୁସାରେ, ୧ ଜୁନରୁ ୩୧ ଅଗଷ୍ଟ ମଧ୍ୟରେ ଭାରତରେ ୭୪୩.୧ ମିମି ବର୍ଷା ହୋଇଛି । ଜୁନରେ ୧୮୦ ମିମି ବର୍ଷା ହୋଇଥିଲା, ଯାହା ସାଧାରଣଠାରୁ ପ୍ରାୟ ୯ ପ୍ରତିଶତ ଅଧିକ ଥିଲା, ଏବଂ ଉତ୍ତର-ପଶ୍ଚିମ ଓ ମଧ୍ୟ ଭାରତରେ ବେଶ ଅଧିକ ବର୍ଷା ହୋଇଥିଲା। ଜୁଲାଇରେ ୨୯୪.୧ ମିମି ବର୍ଷା ହୋଇଥିଲା, ଯାହା ସାଧାରଣଠାରୁ ପ୍ରାୟ ୫ ପ୍ରତିଶତ ଅଧିକ।