ଆନ୍ଧ୍ର ମୁହାଁ ବାତ୍ୟା ‘ଅସାନି’; ରେଡ୍ ୱାର୍ଣ୍ଣିଂ ଜାରି

ଆନ୍ଧ୍ରପ୍ରଦେଶ ମୁହାଁ ବାତ୍ୟା ଅସାନି । ସ୍ଥଳ ଭାଗ ଆଡ଼କୁ ମାଡ଼ି ଆସୁଛି ବାତ୍ୟା । ତେଣୁ ବାତ୍ୟା ପାଇଁ ଆନ୍ଧ୍ରପ୍ରଦେଶକୁ ରେଡ୍ ୱାର୍ଣ୍ଣିଂ ଜାରି ହୋଇଛି । ଆନ୍ଧ୍ରର କାକିନାଡ଼ା ଓ ବିଶାଖାପାଟଣା ମଧ୍ୟରେ ଏହା ସ୍ଥଳ ଭାଗକୁ ଛୁଇଁପାରେ ।

ସୁଦ୍ଧା, ଘଣ୍ଟାକୁ ୧୨ କିଲୋମିଟର ବେଗରେ ବାତ୍ୟା ଉପକୂଳ ଆଡ଼କୁ ଆସୁଛି । ମଚ୍ଚିଳିପଟ୍ଟନମ୍ଠୁ ଦକ୍ଷିଣ, ଦକ୍ଷିଣ ପୂର୍ବ ଦିଗ ୯୦ କିଲୋମିଟର ଦୂରରେ ଗତି କରୁଛି । ସ୍ଥଳ ଭାଗ ଛୁଇଁବା ପରେ ଏହା ପୁଣି ସମୁଦ୍ରକୁ ରିକର୍ଭ କରିପାରେ ତେବେ ସମୁଦ୍ରକୁ ପୁନର୍ବାର ପ୍ରବେଶ ପରେ ଏହା ଦୁର୍ବଳ ହୋଇ ଡିପ୍ ଡିପ୍ରେସନ୍‌ରେ ପରିଣତ ହେବାର ସମ୍ଭାବନା ରହିଛି ।

ବର୍ତ୍ତମାନର ଆକଳନ ଅନୁସାରେ ବାତ୍ୟା ଓ଼ଡିଶା ଉପକୂଳ ଛୁଇଁ ନପାରେ ତେବେ ଆସନ୍ତା ୧୩ ତାରିଖ ସକାଳ ବେଳକୁ ବାତ୍ୟା ପୂରା ଦୁର୍ବଳ ହୋଇଯାଇଥିବା ନେଇ ଆଶା କରାଯାଉଥିବା ଏସ୍ଆର୍‌ସି ପକ୍ଷରୁ ସୂଚନା ଦିଆଯାଇଛି । ଏହାର ପ୍ରଭାବରେ ଆଜି ଗଞ୍ଜାମ, ଗଜପତି, ରାୟଗଡ଼ା, ନୟାଗଡ଼, ଖୋର୍ଦ୍ଧା, ପୁରୀ, କଟକ ଏବଂ କେନ୍ଦ୍ରାପଡ଼ା ଜିଲ୍ଲାକୁ ଘଡ଼ଘଡ଼ି ସହ ବର୍ଷା ପାଇଁ ୱାର୍ଣ୍ଣିଂ ଜାରି ହୋଇଛି ।

ବାତ୍ୟା ପ୍ରଭାବରେ ସମୁଦ୍ର ଅଶାନ୍ତ ରହୁଥିବାରୁ ଆସନ୍ତା ୧୨ ତାରିଖ ପର୍ଯ୍ୟନ୍ତ ମତ୍ସ୍ୟଜୀବୀଙ୍କୁ ସମୁଦ୍ର ପ୍ରବେଶ ବାରଣ କରାଯାଇଛି । ଏଥିପାଇଁ ଗୋପାଳପୁର ବନ୍ଦର ଲାଗି ୩ ନମ୍ବର ବିପଦ ସଙ୍କେତ ଜାରି ହୋଇଥିଲା ବେଳେ ପୁରୀ, ଚାନ୍ଦବାଲି ଓ ପାରାଦୀପ ବନ୍ଦର ପାଇଁ ୨ ନମ୍ବର ବିପଦ ସଙ୍କେତ ଜାରି କରାଯାଇଛି । ଏହା ସତ୍ତ୍ୱେ ନିର୍ଦ୍ଦେଶକୁ ନମାନି ଯଦି କେହି ସମୁଦ୍ର ଭିତରକୁ ଯାଆନ୍ତି, ତାହେଲେ ସେମାନଙ୍କ ବିରୋଧରେ ବିପର୍ଯ୍ୟୟ ଆଇନ ବଳରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦେଇଛନ୍ତି ଏସ୍ଆର୍‌ସି ।