ନିକଟରେ ବିହାରର ରାଜଗିର ଠାରେ ଆୟୋଜିତ ମହିଳା ଏସୀୟ ଚାମ୍ପିଅନ୍ସ ଟ୍ରଫି (ଏସିଟି) ହକି ୨୦୨୪ରେ ଭାରତ ଚାମ୍ପିଅନ୍ ହୋଇ କ୍ରମାଗତ ଦ୍ୱିତୀୟ ଥର ମୁକୁଟ ହାସଲ କରିଛି ।
ସଲୀମା ଟେଟେଙ୍କ ନେତୃତ୍ୱାଧୀନ ଟିମ୍ ଫାଇନାଲ୍ରେ ପ୍ୟାରିସ୍ ଅଲିମ୍ପିକ୍ସର ରୌପ୍ୟ ପଦକ ବିଜେତା ଚୀନ୍କୁ ୧-୦ରେ ହରାଇଥିଲା । ଏହା ସହିତ ଚୀନ୍ର ଚାମ୍ପିଅନ୍ ହେବାର ସ୍ୱପ୍ନ ପୁଣି ଥରେ ଅଧୁରା ରହିଯାଇଛି ।
Also Read
ଟୁର୍ଣ୍ଣାମେଣ୍ଟରେ ଭାରତୀୟ ଟିମ୍ର ଯୁବ ଷ୍ଟ୍ରାଇକର୍ ଦୀପିକା ସେହରାୱତଙ୍କ ପ୍ରଦର୍ଶନକୁ ନେଇ ଏବେ କ୍ରୀଡ଼ା ମହଲରେ ଖୁବ୍ ଚର୍ଚ୍ଚା ହେଉଛି । ସେ ଫାଇନାଲ୍ରେ ଏକମାତ୍ର ତଥା ବିଜୟସୂଚକ ଗୋଲ୍ କରି ଭାରତର ମୁକୁଟ ବିଜୟର ସୂତ୍ରଧର ସାଜିଥିଲେ ।
ହରିୟାଣାର ଝିଅ ଦୀପିକା ପୂରା ଟୁର୍ଣ୍ଣାମେଣ୍ଟରେ ଚାମ୍ପିଅନ୍ ଭଳି ଖେଳିଥିଲେ । ସେ ମୋଟ୍ ୧୧ ଗୋଲ୍ ଦେଇ ଟୁର୍ଣ୍ଣାମେଣ୍ଟର ଟପ୍ ସ୍କୋରର୍ ହୋଇପାରିଥିଲେ । ଭାରତର ଏହି ଉଲ୍ଲେଖନୀୟ ବିଜୟ ପରେ ହକି ଇଣ୍ଡିଆ ତାଙ୍କୁ ‘ଗୋଲ୍ଡେନ୍ ଗାର୍ଲ’ ଭାବେ ଅଭିହିତ କରିଥିଲା ।
ଅଲିମ୍ପିକ୍ କ୍ଷତରେ ମଲମ ଲଗାଇଲା ଏସିଟି ବିଜୟ
ଟୋକିଓ ଅଲିମ୍ପିକ୍ସ ୨୦୨୦ରେ ଚତୁର୍ଥ ସ୍ଥାନରେ ରହିଥିବା ଭାରତୀୟ ମହିଳା ହକି ଟିମ୍ ପ୍ୟାରିସ୍ କ୍ରୀଡ଼ା ୨୦୨୪ ପାଇଁ ଯୋଗ୍ୟତା ଅର୍ଜନ କରି ନ ପାରିବା ବିଡ଼ମ୍ବନାର ବିଷୟ ଥିଲା । ଏବେ ଏହି କ୍ଷତ ଉପରେ ଅନେକାଂଶରେ ମଲମ ଲଗାଇଛି ଏସିଟି ବିଜୟ । ଏହା ସହିତ ଭାରତୀୟ ଖେଳାଳିଙ୍କ ମନୋବଳ ବଢ଼ିଛି ।
ଏସିଟିରେ ଭାରତ ତୃତୀୟ ଥର ମୁକୁଟ ଜିତିଛି । ଏହା ପୂର୍ବରୁ ୨୦୧୬ ଓ ୨୦୨୩ରେ ମଧ୍ୟ ଟିମ୍ ଚାମ୍ପିଅନ୍ ହୋଇଥିଲା ।
କୋରିଆ ସହିତ ଭାରତ ଟୁର୍ଣ୍ଣାମେଣ୍ଟର ସବୁଠାରୁ ସଫଳ ଟିମ୍ ହେବାର ଗୌରବ ଅର୍ଜନ କରିଛି । ତେବେ ଭାରତ ପାଞ୍ଚ ଥର ଓ କୋରିଆ ତିନି ଥର ଫାଇନାଲ୍ରେ ସ୍ଥାନ ପାଇଛି ।
ପ୍ୟାରିସ୍ ଅଲିମ୍ପିକ୍ସ ପାଇଁ ଭାରତ ଯୋଗ୍ୟତା ଅର୍ଜନ କରିବାରେ ବିଫଳ ହେବା ପରେ ହରେନ୍ଦ୍ର ସିଂହଙ୍କୁ ଟିମ୍ର କୋଚ୍ ଦାୟିତ୍ୱ ଦିଆଯାଇଥିଲା । ସେ ଭାରତକୁ ଏସିଟି ଟ୍ରଫି ଜିତାଇ ଦେଖାଇ ଦେଇଛନ୍ତି ଯେ ଟିମ୍ ମିଶନ୍ ୨୦୨୮ ଆଡ଼କୁ ସଫଳତାପୂର୍ବକ ଅଗ୍ରସର ହେଉଛି ।
ହରେନ୍ଦ୍ର ଯୁବ ଖେଳାଳିଙ୍କ ଉପରେ ଭରସା ରଖିଥିଲେ । ତାଙ୍କ ଯୁବ ବ୍ରିଗେଡ୍ରେ ଦୀପିକାଙ୍କ ଛଡ଼ା ସଙ୍ଗୀତା କୁମାରୀ, ବ୍ୟୁଟୀ ଡୁଙ୍ଗ ଡୁଙ୍ଗ, ଶର୍ମିଲାଙ୍କ ଭଳି ଖେଳାଳି ଥିଲେ । ଏହି ପରିବର୍ତ୍ତନ ଏସିଟିରେ ଫଳପ୍ରଦ ହୋଇଛି ।
ଏସିଟିରେ ପିସିରୁ ଛଅ ଗୋଲ୍ ଦେଇଥିଲେ ଦୀପିକା
ଏସିଟିରେ ଦୀପିକା ସାତ ମ୍ୟାଚ୍ରୁ ୧୧ ଗୋଲ୍ ସ୍କୋର୍ କରିଥିଲେ । ସେଥିମଧ୍ୟରୁ ଛଅ ଗୋଲ୍ ପେନାଲ୍ଟି କର୍ଣ୍ଣରରୁ ହୋଇଥିବା ବେଳେ ଚାରି ଫିଲ୍ଡ ଗୋଲ୍ ଥିଲା । ସେ ଅନ୍ୟ ଏକ ଗୋଲ୍ ପେନାଲ୍ଟି ଷ୍ଟ୍ରୋକ୍ରୁ ଦେଇଥିଲେ ।
ଟୁର୍ଣ୍ଣାମେଣ୍ଟରେ ଭାରତ ମୋଟ୍ ୨୯ ଗୋଲ୍ ଦେଇଥିଲା, ଯେଉଁଥିରେ ୧୨ ଗୋଲ୍ ପେନାଲ୍ଟି କର୍ଣ୍ଣରରୁ ଆସିଥିଲା । ଥାଇଲାଣ୍ଡ ବିପକ୍ଷରେ ଭାରତ ତା’ର ସର୍ବଶ୍ରେଷ୍ଠ ପ୍ରଦର୍ଶନ କରି ୧୩-୦ରେ ବିଜୟୀ ହୋଇଥିଲା । ସେଥିମଧ୍ୟରୁ ପାଞ୍ଚ ଗୋଲ୍ ଦୀପିକାଙ୍କ ଖାତାକୁ ଯାଇଥିଲା ।
ଏହାଛଡ଼ା ଦକ୍ଷିଣ କୋରିଆ ବିପକ୍ଷ ମ୍ୟାଚ୍ରେ ଭାରତର ୩-୨ ବିଜୟରେ ମଧ୍ୟ ସେ ଦୁଇ ଗୋଲ୍ ଦେଇଥିଲେ । ସେ ସେମିଫାଇନାଲ୍ରେ ଗୋଲ୍ କରିପାରି ନ ଥିଲେ, ହେଲେ ଫାଇନାଲ୍ରେ ଗୁରୁତ୍ୱପୂର୍ଣ୍ଣ ଗୋଲ୍ ଦେଇ ଟିମ୍କୁ ଚାମ୍ପିଅନ୍ କରାଇଥିଲେ ।
ରୋମାଞ୍ଚକ ଫାଇନାଲ୍ ଲଢ଼େଇ
ଏସିଟି ୨୦୨୪ର ଫାଇନାଲ୍ ମ୍ୟାଚ୍ ଖୁବ୍ ରୋମାଞ୍ଚକ ଥିଲା । ପ୍ରଥମାର୍ଦ୍ଧ ଗୋଲ୍ଶୂନ୍ୟ ରହିବା ପରେ ଦ୍ୱିତୀୟାର୍ଦ୍ଧର ପ୍ରଥମ ମିନିଟ୍ରେ ହିଁ ଭାରତକୁ ପେନାଲ୍ଟି କର୍ଣ୍ଣର ମିଳିଥିଲା । ମ୍ୟାଚ୍ରେ ଏହା ଟିମ୍ର ପଞ୍ଚମ ପେନାଲ୍ଟି କର୍ଣ୍ଣର ଥିଲା ।
କିନ୍ତୁ ଲାଲରେମସିଆମୀଙ୍କ ପୁଶ୍କୁ ଠିକ୍ରେ ଅଟକା ଯାଇପାରି ନ ଥିଲା । ନବନୀତ କୌର ସର୍କଲ ବାହାରେ ବଲ୍କୁ ଅଟକାଇ ଦୀପିକାଙ୍କୁ ପାସ୍ ଦେଇଥିଲେ । ଏହାପରେ ଦୀପିକା ଦୁଇ ଡିଫେଣ୍ଡର୍ଙ୍କୁ ଚକମା ଦେଇ ରିଭର୍ସ ହିଟ୍ରୁ ଗୋଲ୍ କରିଥିଲେ । ଭାରତ ଅଗ୍ରଣୀ ହାସଲ କରିଥିଲା ।
ଅବଶ୍ୟ ୪୨ତମ ମିନିଟ୍ରେ ଟିମ୍କୁ ମିଳିଥିବା ଏକ ପେନାଲ୍ଟି ଷ୍ଟ୍ରୋକ୍କୁ ଦୀପିକା ଗୋଲ୍ରେ ପରିଣତ କରିପାରି ନ ଥିଲେ । ପ୍ରତିପକ୍ଷ ଗୋଲ୍କିପର୍ ତାଙ୍କ ପୁଶ୍କୁ ଡାହାଣ ଗୋଡ଼ ବଢ଼ାଇ ଅଟକାଇ ଦେଇଥିଲେ ।
ଶେଷ ଯାଏଁ ଚୀନ୍ ଗୋଲ୍ ପରିଶୋଧ କରିପାରି ନ ଥିଲା ଏବଂ ଭାରତର ପ୍ରଥମ ଗୋଲ୍ ନିର୍ଣ୍ଣାୟକ ହୋଇଥିଲା ।
କୁସ୍ତିରେ ଲାଗିଲାନି ମନ, ଧରିଲେ ହକି ଷ୍ଟିକ୍
ଯେତେବେଳେ ଦୀପିକା ଛୋଟ ଥିଲେ, ସେତେବେଳେ ତାଙ୍କ ବାପା ତାଙ୍କୁ ହିସାରସ୍ଥିତ କୁସ୍ତି କେନ୍ଦ୍ରକୁ ନେଇକି ଯାଉଥିଲେ । ସେଠାରେ ତାଙ୍କ ବଡ଼ ଭାଇ ପ୍ରଶିକ୍ଷଣ ନେଉଥିଲେ ।
ରୋହତକ ନିକଟସ୍ଥ ଏକ ଗାଁରେ ରହୁଥିବା ଦୀପିକା କୁସ୍ତିଯୋଦ୍ଧାଙ୍କ ପରିବାରରୁ ଆସିଥିଲେ, କିନ୍ତୁ କୁସ୍ତିରେ ତାଙ୍କ ମନ ଲାଗି ନ ଥିଲା । ତାଙ୍କୁ ଲାଗୁଥିଲା ଯେ ତାଙ୍କ ପକ୍ଷେ କୁସ୍ତିଯୋଦ୍ଧା ହେବା ସମ୍ଭବ ନୁହେଁ ।
ଦିନେ ସେ କୁସ୍ତି କେନ୍ଦ୍ରରୁ ଚାଲିଆସି ହକି ଖେଳ ଦେଖିଥିଲେ । ସେଠାକାର କୋଚ୍ ଆଜାଦ ସିଂହଙ୍କ ଦୃଷ୍ଟି ତାଙ୍କ ଉପରେ ପଡ଼ିଥିଲା । ସେ ଦୀପିକାଙ୍କୁ ପଚାରିଥିଲେ ଯେ ତୁମେ ହକି ଖେଳିବାକୁ ଚାହୁଁଛ । ଦୀପିକା ‘ହଁ’ କରିଥିଲେ ।
ଏହାପରେ କୋଚ୍ ତାଙ୍କୁ ହକି ଷ୍ଟିକ୍ ଦେଇଥିଲେ । ସେହି ଦିନ ଠାରୁ ଦୀପିକା ହକିକୁ ନିଜ କ୍ୟାରିଅର୍ କରିଥିଲେ । ପ୍ରାୟ ଏକ ଦଶନ୍ଧି ମଧ୍ୟରେ ସେ ଦେଶର ତାରକା ହୋଇପାରିଛନ୍ତି ।
ଫର୍ୱାର୍ଡ ହେବା ସତ୍ତ୍ୱେ ଡ୍ରାଗ୍ଫ୍ଲିକର୍ ଭୂମିକାରେ
ଦୀପିକାଙ୍କ ଭଳି ଖେଳାଳି କମ୍ ଦେଖିବାକୁ ମିଳନ୍ତି । ସେ ଟିମ୍ର ଫର୍ୱାର୍ଡ ଖେଳାଳି ହେବା ସହିତ ଡ୍ରାଗ୍ଫ୍ଲିକର୍ ମଧ୍ୟ ।
ସାଧାରଣତଃ ଡ୍ରାଗ୍ଫ୍ଲିକର୍ ଡିଫେଣ୍ଡର୍ ହୋଇଥା’ନ୍ତି । ଏହି କାରଣରୁ ଡିଫେଣ୍ଡର୍ ମଜଭୁତ ଖେଳାଳି ହୋଇଥା’ନ୍ତି ଏବଂ ତାଙ୍କ ଶକ୍ତି ତାଙ୍କ ସଟ୍ରୁ ଦେଖିବାକୁ ମିଳେ । କିନ୍ତୁ ଦୀପିକା ଏ ଦିଗରେ ଭିନ୍ନ ।
ବାସ୍ତବରେ ତାଙ୍କ ମଧ୍ୟରେ ଡିଫେଣ୍ଡର୍ଙ୍କ ଭଳି ଶକ୍ତି ରହିଛି । କୁସ୍ତିଯୋଦ୍ଧାଙ୍କ ପରିବାରରୁ ଆସୁଥିବାରୁ ତାଙ୍କୁ ଉତ୍ତରାଧିକାର ସୂତ୍ରରେ ଶକ୍ତି ମିଳିଛି ବୋଲି ଖୋଦ୍ ଦୀପିକା କହନ୍ତି ।
ଏଫ୍ଆଇଏଚ୍ ପ୍ରୋ ଲିଗ୍ ୨୦୨୧-୨୨ରେ ଦୀପିକା ସିନିଅର୍ ଟିମ୍ରେ ପଦାର୍ପଣ କରିଥିଲେ । ଏସିଆଡ୍ ୨୦୨୨ ଓ ଏସିଆ କପ୍ ୨୦୨୨ରେ କାଂସ୍ୟ ପଦକ ବିଜେତା ଟିମ୍ର ସେ ସଦସ୍ୟା ଥିଲେ । ଏହାଛଡ଼ା ଏସିଟି ୨୦୨୩ରେ ସ୍ୱର୍ଣ୍ଣ ଜିତିଥିବା ଟିମ୍ ପକ୍ଷରୁ ବି ସେ ପ୍ରତିନିଧିତ୍ୱ କରିଥିଲେ ।
ଦୀପିକାଙ୍କୁ ଏବେ ୨୦ ବର୍ଷ ବୟସ । ଆଗକୁ ତାଙ୍କର ଲମ୍ବା କ୍ୟାରିଅର୍ ରହିଛି । ତାଙ୍କ ଭିତରେ ପ୍ରତିଭା ଅଛି, ଫର୍ୱାର୍ଡ ହୋଇ ଡିଫେଣ୍ଡର୍ ଭଳି ଶକ୍ତି ରହିଛି । ଡ୍ରାଗ୍ଫ୍ଲିକର୍ ଭାବରେ ମଧ୍ୟ ସେ ପ୍ରସିଦ୍ଧି ଅର୍ଜନ କଲେଣି ।
ଏଫ୍ଆଇଏଚ୍ ବିଶ୍ୱକପ୍ ୨୦୨୬ ଓ ଲସ୍ ଆଞ୍ଜଲସ୍ ଅଲିମ୍ପିକ୍ସ ୨୦୨୮ ତାଙ୍କର ପରବର୍ତ୍ତୀ ବଡ଼ ଲକ୍ଷ୍ୟ ହେବ । ୨୦୨୬ରେ ଏସିଆଡ୍ ବି ଅଛି । ଆଗକୁ ଏସିଟି ଭଳି ଅନ୍ୟ ବଡ଼ ଟୁର୍ଣ୍ଣାମେଣ୍ଟଗୁଡ଼ିକରେ ମଧ୍ୟ ସେ ଟିମ୍ ପାଇଁ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇବେ ବୋଲି ଆଶା କରାଯାଉଛି ।
ଇମେଲ୍: biswasports@gmail.com
(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)