ଇଣ୍ଡିଆନ୍ ପ୍ରିମିଅର୍ ଲିଗ୍ (ଆଇପିଏଲ୍) ୨୦୨୫ ସିଜନ୍ରେ ମାର୍ଚ୍ଚ ୨୮ରେ ଆୟୋଜିତ ଏକ ମ୍ୟାଚ୍ରେ ଅଧିକାଂଶ ଦର୍ଶକ ଭାବୁଥିଲେ ଯେ ଲକ୍ଷ୍ନୌ ସୁପର୍ ଜାଏଣ୍ଟ୍ସ (ଏଲ୍ଏସ୍ଜି) ବିପକ୍ଷରେ ସନ୍ରାଇଜର୍ସ ହାଇଦରାବାଦ (ଏସ୍ଆର୍ଏଚ୍) ବିଶାଳ ସ୍କୋର୍ ଛିଡ଼ା କରିବ । କିନ୍ତୁ ଶାର୍ଦ୍ଦୁଳ ଠାକୁରଙ୍କ ଘାତକ ବୋଲିଂ (ଚାରି ୱିକେଟ୍) ବଳରେ ହାଇଦରାବାଦ ଟିମ୍ ୨୦୦ ସ୍କୋର୍ ଅତିକ୍ରମ କରିପାରି ନ ଥିଲା । ଆଇପିଏଲ୍ର ପୂର୍ବ ନିଲାମରେ ଯେଉଁ ପେସ୍ ବୋଲିଂ ଅଲ୍ରାଉଣ୍ଡର୍ଙ୍କୁ ନେବା ପାଇଁ କୌଣସି ଫ୍ରାଞ୍ଚାଇଜ୍ ଆଗ୍ରହ ପ୍ରକାଶ କରି ନ ଥିଲେ, ତାଙ୍କ ଯୋଗୁଁ ଲକ୍ଷ୍ନୌ ଟିମ୍ ବିଜୟୀ ହୋଇଥିଲା । ଏହା ପୂର୍ବରୁ ସେ ରଣଜୀ ଟ୍ରଫିରେ ଉଲ୍ଲେଖନୀୟ ପ୍ରଦର୍ଶନ କରିଥିଲେ । ଏବେ ପ୍ରଶ୍ନ ଉଠୁଛି ଯେ ଭାରତୀୟ ଟିମ୍ ବିଶେଷକରି ଟେଷ୍ଟ ଟିମ୍କୁ ପ୍ରତ୍ୟାବର୍ତ୍ତନ କରିବେ କି ଶାର୍ଦ୍ଦୁଳ? ଆଗାମୀ ଇଂଲଣ୍ଡ ଗସ୍ତ ପାଇଁ ତାଙ୍କ ନାମ ବିଚାରକୁ ନେବେ କି ଚୟନକାରୀ ?
ଏଲ୍ଏସ୍ଜିରୁ ଆସିଥିଲା ଅପ୍ରତ୍ୟାଶିତ ଫୋନ୍ କଲ୍
ଆଇପିଏଲ୍ ୨୦୨୫ ମେଗା ନିଲାମରେ ଶାର୍ଦ୍ଦୁଳ ବିକ୍ରି ହୋଇ ନ ଥିଲେ । ଏହାପରେ ତାଙ୍କ ଆଇପିଏଲ୍ ଭବିଷ୍ୟତ ଉପରେ ପ୍ରଶ୍ନଚିହ୍ନ ଲାଗିଯାଇଥିଲା । ସେ ରଣଜୀ ଟ୍ରଫି ପରେ ଆଗାମୀ ଇଂଲଣ୍ଡ ଗସ୍ତରେ ଭାରତୀୟ ଟେଷ୍ଟ ଟିମ୍କୁ ଫେରିବା ଲକ୍ଷ୍ୟରେ କାଉଣ୍ଟି ଚାମ୍ପିଅନ୍ସିପ୍ରେ ଏସେକ୍ସ ପକ୍ଷରୁ ଖେଳିବା ପାଇଁ ପ୍ରସ୍ତୁତି କରୁଥିଲେ ।
Also Read
ଇତ୍ୟବସରରେ ଲକ୍ଷ୍ନୌ ସୁପର୍ ଜାଏଣ୍ଟ୍ସର ଜଣେ ପେସର୍ ଆହତ ହୋଇଥିଲେ । ଶାର୍ଦ୍ଦୁଳଙ୍କୁ ଫ୍ରାଞ୍ଚାଇଜ୍ର ମେଣ୍ଟର ଜାହିର ଖାନ୍ ଫୋନ୍ କରିଥିଲେ । ସେହି ଅପ୍ରତ୍ୟାଶିତ କଲ୍ ତାଙ୍କ ଆଇପିଏଲ୍ କ୍ୟାରିଅର୍ରେ ପ୍ରାଣ ସଞ୍ଚାର କରିଥିଲା । ପୂର୍ବତନ ଭାରତୀୟ ପେସର୍ ଜାହିର କହିଥିଲେ ଯେ ରିଷଭ ପନ୍ତଙ୍କ ନେତୃତ୍ୱାଧୀନ ଟିମ୍ ତାଙ୍କୁ (ଶାର୍ଦ୍ଦୂଳ) ସମ୍ଭାବ୍ୟ ବିକଳ୍ପ ଦୃଷ୍ଟିରୁ ଦେଖୁଛି । ଯଦି ତାଙ୍କର ଚୟନ ହୁଏ, ତା’ହେଲେ ତାଙ୍କୁ ଚୂଡ଼ାନ୍ତ ଏକାଦଶରେ ସୁଯୋଗ ମିଳିପାରେ । ହାଇଦରାବାଦ ବିପକ୍ଷରେ ‘ପ୍ଲେୟର୍ ଅଫ୍ ଦ ମ୍ୟାଚ୍’ ବିବେଚିତ ହେବା ପରେ ଶାର୍ଦ୍ଦୁଳ ଏ କଥା କହିଥିଲେ । ଚଳିତ ଆଇପିଏଲ୍ରେ ମାର୍ଚ୍ଚ ଶେଷ ସୁଦ୍ଧା ସେ ଦୁଇ ମ୍ୟାଚ୍ରେ ଛଅ ୱିକେଟ୍ ନେଇଛନ୍ତି ।
ରଣଜୀ ଟ୍ରଫିରେ ଅଲ୍ରାଉଣ୍ଡ ପ୍ରଦର୍ଶନ
ଶାର୍ଦ୍ଦୁଳ ଠାକୁର ଶେଷ ଥର ୨୦୨୩ ଡିସେମ୍ବରରେ ଦକ୍ଷିଣ ଆଫ୍ରିକା ଗସ୍ତରେ ଭାରତୀୟ ଟେଷ୍ଟ ଟିମ୍ ପକ୍ଷରୁ ଖେଳିଥିଲେ । ୨୦୨୪ରେ ଇଂଲଣ୍ଡ, ବାଂଲାଦେଶ ଓ ନ୍ୟୁଜିଲାଣ୍ଡ ବିପକ୍ଷ ଘରୋଇ ଟେଷ୍ଟ ସିରିଜ୍ ଏବଂ ଅଷ୍ଟ୍ରେଲିଆ ଗସ୍ତରେ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜ୍ ପାଇଁ ତାଙ୍କୁ ଟିମ୍ରେ ସୁଯୋଗ ମିଳି ନ ଥିଲା । ଏହାଛଡ଼ା ସୀମିତ ଓଭର୍ ପାଇଁ ମଧ୍ୟ ତାଙ୍କୁ ଟିମ୍ରେ ନିଆଯାଉ ନାହିଁ । ଏହା ଫଳରେ ତାଙ୍କ ଆନ୍ତର୍ଜାତିକ କ୍ୟାରିଅର୍ ସଙ୍କଟଜନକ ସ୍ଥିତିରେ ପହଞ୍ଚିଛି ।
ରଣଜୀ ଟ୍ରଫି ୨୦୨୪-୨୫ ସମୟରେ ଶାର୍ଦ୍ଦୂଳ ଟେଷ୍ଟ ଟିମ୍କୁ୍ ପ୍ରତ୍ୟାବର୍ତ୍ତନ ପାଇଁ ନିଜ ଦାବିଦାରୀ ଉପସ୍ଥାପନ କରିଥିଲେ । ସେ ମୁମ୍ବାଇ ପକ୍ଷରୁ ଉଭୟ ବଲ୍ ଓ ବ୍ୟାଟ୍ରେ ଚମକପ୍ରଦ ପ୍ରଦର୍ଶନ କରିଥିଲେ । ସେ ନଅ ମ୍ୟାଚ୍ର ୧୮ ଇନିଂସ୍ରେ ୨୪.୯୭ ଆଭରେଜ୍ ଓ ୩.୫୧ ଇକୋନମୀ ରେଟ୍ରେ ୩୫ ୱିକେଟ୍ ନେଇଥିଲେ । ଏହାଛଡ଼ା ସେ ୧୨ ଇନିଂସ୍ରେ ୪୨.୦୮ ଆଭରେଜ୍ରେ ବ୍ୟାଟିଂ କରି ୫୦୫ ରନ୍ ସଂଗ୍ରହ କରିଥିଲେ । ଏଥିରେ ଗୋଟିଏ ଶତକ ଓ ଚାରି ଅର୍ଦ୍ଧଶତକ ରହିଥିଲା ।
ଇଂଲଣ୍ଡ ଗସ୍ତରେ ମିଳିପାରେ ସୁଯୋଗ
ଶାର୍ଦ୍ଦୁଳ ଠାକୁରଙ୍କୁ ଗତ କିଛି ବର୍ଷ ଧରି ‘ସେନା ଦେଶସମୂହ’କୁ ଟେଷ୍ଟ ଗସ୍ତ ପାଇଁ ଭାରତୀୟ ଟିମ୍ରେ ଚୟନ କରାଯାଉଥିଲା । ତାଙ୍କ ଉପସ୍ଥିତି ଦ୍ୱାରା ବୋଲିଂ ସହିତ ବ୍ୟାଟିଂ ଲାଇନ୍-ଅପ୍ ବି ମଜଭୁତ ହେଉଥିଲା । କିନ୍ତୁ ଅଷ୍ଟ୍ରେଲିଆ ଗସ୍ତ ପାଇଁ ତାଙ୍କୁ ମନୋନୀତ କରାଯାଇ ନ ଥିଲା । ନବାଗତ ନୀତୀଶ ରେଡ୍ଡୀଙ୍କୁ ସୁଯୋଗ ମିଳିଥିଲା । ସେହି ଗସ୍ତ ପୂର୍ବରୁ ଶାର୍ଦ୍ଦୁଳଙ୍କୁ ନିଆ ନ ଯିବା ନେଇ ମୁଖ୍ୟ କୋଚ୍ ଗୌତମ ଗମ୍ଭୀରଙ୍କୁ ପ୍ରଶ୍ନ କରାଯାଇଥିଲା । ସେ ଶାର୍ଦ୍ଦୁଳଙ୍କ ଠାରୁ ଆଗକୁ ବଢ଼ିବାର ସଙ୍କେତ ଦେଇଥିଲେ । ନୀତୀଶ ଅଷ୍ଟ୍ରେଲିଆ ଗସ୍ତରେ ଭଲ ବ୍ୟାଟିଂ ପ୍ରଦର୍ଶନ କରିଥିଲେ, ହେଲେ ବୋଲିଂରେ ପ୍ରଭାବିତ କରିପାରି ନ ଥିଲେ । ଏପରି ସ୍ଥଳେ ଶାର୍ଦ୍ଦୁଳଙ୍କ ଭଳି ଜଣେ ଦକ୍ଷ ପେସ୍ ବୋଲିଂ ଅଲ୍ରାଉଣ୍ଡର୍ଙ୍କ ଅଭାବ ଅନୁଭୂତ ହୋଇଥିଲା ।
ଚର୍ଚ୍ଚା ହେଉଛି ଯେ ବିଶ୍ୱ ଟେଷ୍ଟ ଚାମ୍ପିଅନ୍ସିପ୍ (ଡବ୍ଲ୍ୟୁଟିସି)ର ନୂଆ ଚକ୍ରରେ ଜୁନ୍-ଅଗଷ୍ଟରେ ହେବାକୁ ଥିବା ଇଂଲଣ୍ଡ ଗସ୍ତ ପାଇଁ ଶାର୍ଦ୍ଦୁଳଙ୍କୁ ଟିମ୍ରେ ସାମିଲ୍ କରାଯାଇପାରେ । ଯଦି ତାଙ୍କୁ ଟିମ୍ରେ ନିଆଯାଏ, ତା’ହେଲେ ଭାରତ ପାଖରେ ଚାରି ପେସର୍ ବିକଳ୍ପ ରହିବ । ଆଠ ନମ୍ବର ଯାଏଁ ବ୍ୟାଟର୍ ରହିବେ । ସେ ଇଂଲଣ୍ଡରେ ଏ ଯାବତ ତିନି ଟେଷ୍ଟ ମ୍ୟାଚ୍ ଖେଳି ଛଅ ଇନିଂସ୍ରେ ୮ ୱିକେଟ୍ ନେଇଛନ୍ତି । ସେହିପରି ବ୍ୟାଟିଂରେ ସେ ପାଞ୍ଚ ଇନିଂସ୍ରେ ଦୁଇ ଅର୍ଦ୍ଧଶତକ ସହାୟତାରେ ୧୨୨ ରନ୍ କରିଛନ୍ତି ।
ଡବ୍ଲ୍ୟୁଟିସି ୨୦୨୩ ଫାଇନାଲ୍ରେ ସେ ଅଷ୍ଟ୍ରେଲିଆ ବିପକ୍ଷରେ ଦୃଢ଼ ପ୍ରଦର୍ଶନ କରିଥିଲେ । ଭାରତର ପ୍ରଥମ ଇନିଂସ୍ରେ ସେ ଅଜିଙ୍କ୍ୟ ରାହାଣେଙ୍କ ସହ ମିଶି ଟିମ୍କୁ ଦୁର୍ବଳ ସ୍ଥିତିରୁ ମୁକୁଳାଇଥିଲେ । ଅବଶ୍ୟ ଟିମ୍ ସେହି ମ୍ୟାଚ୍ ହାରିଯାଇଥିଲା । ଯଦି ଇଂଲଣ୍ଡ ଗସ୍ତ ପାଇଁ ୩୩ବର୍ଷୀୟ ଶାର୍ଦ୍ଦୁଳଙ୍କୁ ଟେଷ୍ଟ ଟିମ୍ରେ ସାମିଲ୍ କରାଯାଏ, ତା’ହେଲେ ଟିମ୍ରେ ସ୍ଥାନ ସୁରକ୍ଷିତ ରଖିବା ତାଙ୍କ ପାଇଁ ବଡ଼ ଚାଲେଞ୍ଜ୍ ହୋଇପାରେ । ତାଙ୍କୁ ଫର୍ମ ବଜାୟ ରଖିବାକୁ ହେବ । ଏହା ସହିତ ଫିଟ୍ନେସ୍ ଉପରେ ବି ଧ୍ୟାନ ଦେବା ଜରୁରୀ ।