Sports: ଆନ୍ତର୍ଜାତିକ କ୍ରିକେଟ୍‌ରୁ କାହିଁକି ଅଚାନକ ଅବସର ନେଲେ ଅଶ୍ୱିନ

୩୮ ବର୍ଷ ବୟସରେ ଜଣେ କ୍ରିକେଟର୍‌ଙ୍କ ଆନ୍ତର୍ଜାତିକ କ୍ରିକେଟ୍‌ରୁ ଅବସର ଘୋଷଣା ବିସ୍ମୟକର ଖବର ନୁହେଁ, କିନ୍ତୁ ଏକ ଗୁରୁତ୍ୱପୂର୍ଣ୍ଣ ସିରିଜ୍ ମଝିରେ ଏଭଳି ଅତର୍କିତ ନିଷ୍ପତ୍ତି ନିଶ୍ଚିତ ରୂପେ ଅପ୍ରତ୍ୟାଶିତ ଓ ଆଶ୍ଚର୍ଯ୍ୟଜନକ ।

ଭାରତୀୟ ଟେଷ୍ଟ ଟିମ୍‌ର ‘ମେରୁଦଣ୍ଡ’ ତଥା ଅଫ୍ ସ୍ପିନ୍ ଅଲ୍‌ରାଉଣ୍ଡର୍ ରବିଚନ୍ଦ୍ରନ ଅଶ୍ୱିନ ଡିସେମ୍ବର ୧୮ରେ ଆନ୍ତର୍ଜାତିକ କ୍ରିକେଟ୍‌ର ସବୁ ଫର୍ମାଟ୍‌ରୁ ଅବସର ନେଇଥିଲେ ।

ଏ କଥା ଠିକ୍ ଯେ ଅଶ୍ୱିନ ତାଙ୍କ ଆନ୍ତର୍ଜାତିକ କ୍ୟାରିଅର୍‌ର ଅନ୍ତିମ ସୋପାନରେ ପହଞ୍ଚିସାରିଥିଲେ, ହେଲେ ସେ ଅଚାନକ ଏଭଳି ନିଷ୍ପତ୍ତି ନେବେ ବୋଲି କେହି ଏପରିକି ତାଙ୍କ ଟିମ୍‌ମେଟ୍ ବି କଳ୍ପନା କରି ନ ଥିଲେ । କ୍ରିକେଟ୍ ଜଗତରେ ଏହା ଏବେ ଚର୍ଚ୍ଚାର ବିଷୟ ହୋଇଛି ।

ଗାବାରେ ବର୍ଡର-ଗାଭାସ୍କର ଟ୍ରଫିର ତୃତୀୟ ଟେଷ୍ଟ ଶେଷ ହେବା ପରେ ଅଶ୍ୱିନ ଏହି ଚରମ ନିଷ୍ପତ୍ତି ନେଇଥିଲେ । ସେ ଅଧିନାୟକ ରୋହିତ ଶର୍ମାଙ୍କ ସହ ସାମ୍ବାଦିକ ସମ୍ମିଳନୀରେ ପହଞ୍ଚିଥିଲେ ଏବଂ କହିଥିଲେ ଯେ ଭାରତୀୟ ଟିମ୍‌ର କ୍ରିକେଟର୍ ଭାବେ ଆଜି ତାଙ୍କର ଶେଷ ଦିନ ଥିଲା । ସେ କ୍ଲବ୍ କ୍ରିକେଟ୍ ଖେଳିବା ଜାରି ରଖିବେ ।

ଆନ୍ତର୍ଜାତିକ କ୍ରିକେଟ୍‌ରୁ କାହିଁକି ଅଚାନକ ଅବସର ନେଲେ ଅଶ୍ୱିନ

ଅବସର ସମୟକୁ ନେଇ ସମାଲୋଚନା

ଆଉ ଦୁଇ ମ୍ୟାଚ୍ ପରେ ସିରିଜ୍ ଶେଷ ହୋଇଥା’ନ୍ତା । ହୁଏତ ସେଥିମଧ୍ୟରୁ କୌଣସି ଗୋଟିଏ ମ୍ୟାଚ୍‌ରେ ଅଶ୍ୱିନଙ୍କ ଆବଶ୍ୟକତା ପଡ଼ିଥା’ନ୍ତା । ସିରିଜ୍ ଶେଷ ହେବା ପରେ ସେ ସମ୍ମାନର ସହ ବିଦାୟ ନେଇପାରିଥା’ନ୍ତେ । କିନ୍ତୁ ସେ ଅପେକ୍ଷା କରି ନ ଥିଲେ ଏବଂ ସିରିଜ୍ ମଝିରୁ ଆନ୍ତର୍ଜାତିକ କ୍ରିକେଟ୍‌ରୁ ବିଦାୟ ନେଇଥିଲେ ।

କିମ୍ବଦନ୍ତୀ କ୍ରିକେଟର୍ ସୁନୀଲ ଗାଭାସ୍କର ତାଙ୍କ ଅବସର ସମୟକୁ ନେଇ ସମାଲୋଚନା କରିଛନ୍ତି । ତାଙ୍କ କହିବାନୁଯାୟୀ ଅଶ୍ୱିନ ଅଷ୍ଟ୍ରେଲିଆ ବିପକ୍ଷ ସିରିଜ୍ ଶେଷ ହେବା ଯାଏଁ ଅପେକ୍ଷା କରିବାର ଥିଲା । ପରବର୍ତ୍ତୀ ଦୁଇ ଟେଷ୍ଟ ପାଇଁ ଭାରତର ଜଣେ ସଦସ୍ୟ ହ୍ରାସ ପାଇଛନ୍ତି । ସିଡ୍‌ନୀରେ ସ୍ପିନର୍‌ଙ୍କୁ ସହାୟତା ମିଳେ । ସେଠାରେ ଅଶ୍ୱିନ ଗୁରୁତ୍ୱପୂ୍‌ର୍ଣ୍ଣ ଭୂମିକା ତୁଲାଇପାରିଥା’ନ୍ତେ ।

ପୂର୍ବତନ କ୍ରିକେଟର୍ ହରଭଜନ ସିଂହ ମଧ୍ୟ କହିଛନ୍ତି ଯେ ଅବସର ପାଇଁ ଅଶ୍ୱିନ ସିରିଜ୍ ଶେଷ ହେବା ଯାଏଁ ଅପେକ୍ଷା କରିବା ଆବଶ୍ୟକ ଥିଲା ।

ଏବେ ପ୍ରଶ୍ନ ଉଠୁଛି ଯେ ଅଶ୍ୱିନ ଅଭିଜ୍ଞ ଖେଳାଳି ହୋଇଥିବା ସତ୍ତ୍ୱେ ଏକ ଗୁରୁତ୍ୱପୂର୍ଣ୍ଣ ଟେଷ୍ଟ ସିରିଜ୍ ଅଧାରୁ କାହିଁକି ଅବସର ନେଲେ?

ବର୍ଡର-ଗାଭାସ୍କର ଟ୍ରଫିରେ ଅଣଦେଖା ମୁଖ୍ୟ କାରଣ

ଅଶ୍ୱିନ ଏକ ଦଶନ୍ଧିରୁ ଊର୍ଦ୍ଧ୍ୱ ସମୟ ଧରି ଟେଷ୍ଟ କ୍ରିକେଟ୍‌ରେ ଭାରତୀୟ ଟିମ୍‌ର ଆଗଧାଡ଼ିର ସ୍ପିନର୍ ରହିଆସିଛନ୍ତି । ହରଭଜନଙ୍କ ଯୁଗ ପରେ ସେ ଟିମ୍‌ରେ ସ୍ପିନ୍ ଆକ୍ରମଣର ନେତୃତ୍ୱ ନେଇଥିଲେ । ସେ ରେଡ୍ ବଲ୍ ଫର୍ମାଟ୍‌ରେ ଭାରତର ଦ୍ୱିତୀୟ ସର୍ବାଧିକ ୱିକେଟ୍ ହାସଲକାରୀ ।

ଅଷ୍ଟ୍ରେଲିଆ ଗସ୍ତ ପାଇଁ ତାଙ୍କୁ ଟେଷ୍ଟ ଟିମ୍‌ରେ ସାମିଲ୍ କରାଯାଇଥିଲା ସତ, ହେଲେ ଚୂଡ଼ାନ୍ତ ଏକାଦଶରେ ତାଙ୍କ ସ୍ଥାନ ସୁରକ୍ଷିତ ହୋଇପାରି ନ ଥିଲା । ୫୩୭ ଟେଷ୍ଟ ୱିକେଟ୍ ନେବା ପରେ ଏହି ଭେଟେରାନ୍ ଡ୍ରେସିଂ ରୁମ୍‌ରେ ଅତିରିକ୍ତ ଖେଳାଳିଙ୍କ ଜର୍ସି ପିନ୍ଧି ବସିବାକୁ ଚାହୁଁ ନ ଥିଲେ ।

ଆନ୍ତର୍ଜାତିକ କ୍ରିକେଟ୍‌ରୁ କାହିଁକି ଅଚାନକ ଅବସର ନେଲେ ଅଶ୍ୱିନ

ବର୍ଡର-ଗାଭାସ୍କର ଟ୍ରଫିରେ ଅଣଦେଖା ତାଙ୍କର ଅତର୍କିତ ଅବସର ଘୋଷଣା ପଛର ମୁଖ୍ୟ କାରଣ ଥିଲା । ପର୍ଥରେ ଖେଳାଯାଇଥିବା ପ୍ରଥମ ଟେଷ୍ଟରେ ଟିମ୍ ମ୍ୟାନେଜ୍‌ମେଣ୍ଟ ତାଙ୍କ ସ୍ଥାନରେ ୱାଶିଂଟନ୍ ସୁନ୍ଦରଙ୍କୁ ଅଗ୍ରାଧିକାର ଦେଇଥିଲା । ସମସ୍ୟା ଏଇଠୁ ଆରମ୍ଭ ହୋଇଥିଲା ।

ଆଡିଲେଡ୍ ଠାରେ ହୋଇଥିବା ପିଙ୍କ୍ ବଲ୍ ଟେଷ୍ଟରେ ତାଙ୍କୁ ସୁଯୋଗ ମିଳିଥିଲା, କିନ୍ତୁ ସେ ଖାସ୍ କମାଲ୍ କରିପାରି ନ ଥିଲେ ଏବଂ ମାତ୍ର ଗୋଟିଏ ୱିକେଟ୍ ନେଇଥିଲେ । ଅବଶ୍ୟ ପିଚ୍ ପେସ୍ ଅନୁକୂଳ ଥିଲା । ବ୍ୟାଟିଂରେ ବି ସେ ବିଫଳ ହୋଇଥିଲେ । ଟିମ୍ ଇଣ୍ଡିଆ ଏହି ମ୍ୟାଚ୍‌ରେ ଶୋଚନୀୟ ଭାବେ ପରାଜିତ ହୋଇଥିଲା ।

ଏହାପରେ ଗାବାରେ ଆୟୋଜିତ ତୃତୀୟ ଟେଷ୍ଟରେ ପୁଣିଥରେ ତାଙ୍କୁ ଚୂଡ଼ାନ୍ତ ଏକାଦଶରେ ସ୍ଥାନ ମିଳି ନ ଥିଲା । ତାଙ୍କ ସ୍ଥାନରେ ରବୀନ୍ଦ୍ର ଜାଡ଼େଜାଙ୍କୁ ସାମିଲ୍ କରାଯାଇଥିଲା ।

ଏପରି ସ୍ଥଳେ ଆନ୍ତର୍ଜାତିକ କ୍ରିକେଟ୍‌ର ସ୍ମାର୍ଟ କ୍ରିକେଟର୍ ଅଶ୍ୱିନ ବୁଝିପାରିଥିଲେ ଯେ ଟିମ୍ ଇଣ୍ଡିଆରେ ତାଙ୍କ ସମୟ ଶେଷ ହୋଇଯାଇଛି । ଟିମ୍ ମ୍ୟାନେଜ୍‌ମେଣ୍ଟ ସମ୍ଭବତଃ ତାଙ୍କ ଠାରୁ ଅବସର ଚାହୁଁଛି ।

ପ୍ରଥମ ଟେଷ୍ଟରେ ସ୍ଥାନ ନ ମିଳିବା ପରେ ଅଶ୍ୱିନ ପର୍ଥରେ ହିଁ ଅବସର ଘୋଷଣା କରିବାକୁ ଚାହୁଁଥିଲେ । କିନ୍ତୁ ଅଧିନାୟକ ରୋହିତ କହିବା ଯୋଗୁଁ ସେ ଅଟକି ଯାଇଥିଲେ ।

ଯଦି ତାଙ୍କର ‘ଅତର୍କିତ ଅବସର ଘୋଷଣା’ରୁ ‘ଅତର୍କିତ’ ଶବ୍ଦକୁ ବାଦ୍ ଦିଆଯାଏ, ତା’ହେଲେ ଏହା ପଛରେ ଆଉ ଦୁଇ କାରଣ ବି ସ୍ପଷ୍ଟ ହୁଏ - ଗୋଟିଏ, ଆନ୍ତର୍ଜାତିକ କ୍ରିକେଟ୍‌ରେ ସୀମିତ ସୁଯୋଗ ଓ ଅନ୍ୟଟି, ବର୍ଦ୍ଧିତ ବୟସର ଚାଲେଞ୍ଜ୍ ।

ଆନ୍ତର୍ଜାତିକ କ୍ରିକେଟ୍‌ରେ ସୀମିତ ସୁଯୋଗ

ଗୋଟିଏ ସମୟ ଥିଲା ଅଶ୍ୱିନ ସବୁ ଫର୍ମାଟ୍‌ରେ ଭାରତୀୟ ଟିମ୍‌ର ଅଂଶବିଶେଷ ଥିଲେ । କିନ୍ତୁ ସମୟକ୍ରମେ ଏହା ରେଡ୍ ବଲ୍ କ୍ରିକେଟ୍ ମଧ୍ୟରେ ସୀମିତ ହୋଇଯାଇଥିଲା ।

୨୦୧୧ ଦିନିକିଆ ବିଶ୍ୱକପ୍ ଓ ୨୦୧୩ ଚାମ୍ପିଅନ୍ସ ଟ୍ରଫି ବିଜେତା ଟିମ୍‌ର ସଦସ୍ୟ ଥିବା ଅଶ୍ୱିନ ୨୦୨୨ ନଭେମ୍ବରରେ ଶେଷ ଥର ଟି-୨୦ ଓ ୨୦୨୩ ଅକ୍ଟୋବରରେ ଶେଷ ଥର ଦିନିକିଆ ଆନ୍ତର୍ଜାତିକ ମ୍ୟାଚ୍ ଖେଳିଥିଲେ ।

ସୀମିତ ଓଭର୍ କ୍ରିକେଟ୍‌ରେ ପ୍ରତିଭାଶାଳୀ ଯୁବ ସ୍ପିନର୍‌ଙ୍କ ଅଭ୍ୟୁଦୟ ଯୋଗୁଁ ଅଶ୍ୱିନଙ୍କ ପାଇଁ ଟିମ୍‌ରେ ସ୍ଥାନ ସଂରକ୍ଷଣ କରିବା କଷ୍ଟସାଧ୍ୟ ହୋଇଯାଇଥିଲା । ଶେଷରେ ଟେଷ୍ଟରେ ବି ସେ ଅନୁରୂପ ସମସ୍ୟାର ସମ୍ମୁଖୀନ ହୋଇଥିଲେ ।

ଚଳିତ ବର୍ଷ ବାଂଲାଦେଶ ବିପକ୍ଷ ଘରୋଇ ଟେଷ୍ଟ ସିରିଜ୍‌ରେ ସେ ପ୍ରଭାବଶାଳୀ ପ୍ରଦର୍ଶନ କରିଥିଲେ ଏବଂ ‘ପ୍ଲେୟର୍ ଅଫ୍ ଦ ସିରିଜ୍‌’ ବିବେଚିତ ହୋଇଥିଲେ ।

ଏହାପରେ ଘରେ ନ୍ୟୁଜିଲାଣ୍ଡ ବିପକ୍ଷରେ ଟେଷ୍ଟ ସିରିଜ୍ ଖେଳାଯାଇଥିଲା । ଏହି ସିରିଜ୍ ତାଙ୍କ ପାଇଁ ଏସିଡ୍ ଟେଷ୍ଟ ସଦୃଶ ଥିଲା । ସେ ଟର୍ଣ୍ଣିଂ ପିଚ୍‌ରେ ବି ପ୍ରଭାବିତ କରିପାରି ନ ଥିଲେ । ଭାରତୀୟ ଟିମ୍ ୦-୩ରେ ଲଜ୍ଜାଜନକ ଭାବେ ସିରିଜ୍ ହାରିଥିଲା ।

ଟିମ୍ ଇଣ୍ଡିଆ ଏହାପରେ ବର୍ଡର-ଗାଭାସ୍କର ଟ୍ରଫି ଖେଳିବା ପାଇଁ ଅଷ୍ଟ୍ରେଲିଆ ଗସ୍ତରେ ଯାଇଥିଲା । ଏଥିରେ ଅଶ୍ୱିନ ଫର୍ମକୁ ଫେରିବେ ବୋଲି ଆଶା କରାଯାଉଥିଲା ।

ପୂର୍ବରୁ ଚର୍ଚ୍ଚା ହେଉଥିଲା ଯେ ଅଷ୍ଟ୍ରେଲିଆ ଗସ୍ତ ଟେଷ୍ଟ କ୍ରିକେଟ୍‌ରେ ରୋହିତ, ବିରାଟ, ଅଶ୍ୱିନ, ଜାଡ଼େଜାଙ୍କ ଭଳି ବରିଷ୍ଠ ଖେଳାଳିଙ୍କ ଭବିଷ୍ୟତ ନିର୍ଦ୍ଧାରଣ କରିପାରେ । ଇତିମଧ୍ୟରେ ଅଶ୍ୱିନ ଗସ୍ତ ଅଧାରୁ ହିଁ ନିଜ ଆନ୍ତର୍ଜାତିକ କ୍ୟାରିଅର୍‌ର ଅନ୍ତ ଘଟାଇଛନ୍ତି ।

ଆନ୍ତର୍ଜାତିକ କ୍ରିକେଟ୍‌ରୁ କାହିଁକି ଅଚାନକ ଅବସର ନେଲେ ଅଶ୍ୱିନ

ବର୍ଦ୍ଧିତ ବୟସର ଚାଲେଞ୍ଜ୍‌

ଆନ୍ତର୍ଜାତିକ କ୍ରିକେଟ୍‌ରେ ଅଶ୍ୱିନ ଟେଷ୍ଟରେ ୫୩୭, ଦିନିକିଆରେ ୧୫୬ ଓ ଟି-୨୦ରେ ୭୨ ୱିକେଟ୍ ନେଇଛନ୍ତି । ଏହାଛଡ଼ା ସେ ତିନି ଫର୍ମାଟ୍‌ରେ ଯଥାକ୍ରମେ ୩୫୦୩, ୭୦୭ ଓ ୧୮୪ ରନ୍ ସଂଗ୍ରହ କରିଛନ୍ତି ।

ତେବେ ବର୍ଦ୍ଧିତ ବୟସ ତାଙ୍କ ଉଲ୍ଲେଖନୀୟ କ୍ୟାରିଅର୍ ପାଇଁ ଏକ ଚାଲେଞ୍ଜ୍ ହୋଇଥିଲା । ଯଦି ତାଙ୍କୁ ସବୁ ଫର୍ମାଟ୍ ପାଇଁ ଟିମ୍‌ରେ ନିଆଯାଉଥା’ନ୍ତା, ତା’ହେଲେ ସେ କ’ଣ ୩୮ ବର୍ଷ ବୟସରେ ଉଚ୍ଚ ସ୍ତରର ପ୍ରଦର୍ଶନ କରିବା ସହ ଫିଟ୍‌ନେସ୍ ବଜାୟ ରଖିପାରିଥା’ନ୍ତେ? ଏହା ବି ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନ ।

ଅଶ୍ୱିନ ଏ କଥା ବୁଝିଥିବେ ନିଶ୍ଚୟ । ଏହାଛଡ଼ା ସେ ଇଣ୍ଡିଆନ୍ ପ୍ରିମିଅର୍ ଲିଗ୍ ଓ ତାମିଲନାଡ଼ୁ ପ୍ରିମିଅର୍ ଲିଗ୍‌ରେ ମଧ୍ୟ ଖେଳୁଛନ୍ତି ।

ଏକ ରିପୋର୍ଟ ଅନୁଯାୟୀ, ୨୦୨୩ରେ ଭାରତରେ ହୋଇଥିବା ବର୍ଡର-ଗାଭାସ୍କର ଟ୍ରଫି ସମୟରୁ ହିଁ ଅଶ୍ୱିନ ଅବସର ନେବା କଥା ବିଚାର କରୁଥିଲେ । ସେ ଆଣ୍ଠୁ ଯନ୍ତ୍ରଣା ଭୋଗୁଥିଲେ ।

ଅଷ୍ଟ୍ରେଲିଆ ଗସ୍ତରେ ସେ ନିଜକୁ ଶେଷ ସୁଯୋଗ ଦେବାକୁ ଚାହୁଁଥିଲେ, କାରଣ ଏହି ଗସ୍ତ ପରେ ଆସନ୍ତା ବର୍ଷ ଜୁନ୍ ପୂର୍ବ ଯାଏଁ ଭାରତର କୌଣସି ଟେଷ୍ଟ ସିରିଜ୍ ନାହିଁ ।

କିଏ ହେବେ ଅଶ୍ୱିନଙ୍କ ଉତ୍ତରାଧିକାରୀ

ଅଶ୍ୱିନଙ୍କୁ ଆଉ ଭାରତୀୟ କ୍ରିକେଟ୍‌ର ଡ୍ରେସିଂ ରୁମ୍‌ରେ ଦେଖିବାକୁ ମିଳିବନି । ତାଙ୍କ ବୋଲିଂରେ ବିବିଧତା ଥିଲା । ଅଫ୍ ବ୍ରେକ୍‌, ଆର୍ମ ବଲ୍ ଓ କ୍ୟାରମ୍ ବଲ୍ - ସବୁଥିରେ ସେ ପାରଙ୍ଗମ ଥିଲେ । ବିଭିନ୍ନ ସମୟରେ ବିଶେଷକରି ଟେଷ୍ଟ କ୍ରିକେଟ୍‌ରେ ସେ ବ୍ୟାଟିଂରେ ମଧ୍ୟ ଉପଯୋଗୀ ଯୋଗଦାନ ଦେଉଥିଲେ । ତାଙ୍କ ନାମରେ ଛଅ ଟେଷ୍ଟ ଶତକ ରହିଛି ।

ଅଶ୍ୱିନଙ୍କ ସ୍ଥାନ ପୂରଣ କରିବା ଯେକୌଣସି କ୍ରିକେଟର୍‌ଙ୍କ ପାଇଁ ଚାଲେଞ୍ଜ୍‌ପୂର୍ଣ୍ଣ ହେବ । ଏବେ ଟେଷ୍ଟ ଟିମ୍ ପାଇଁ ଅଫ୍ ସ୍ପିନ୍ ଅଲ୍‌ରାଉଣ୍ଡର୍‌ଙ୍କ ମଧ୍ୟରେ ସୁନ୍ଦର ସର୍ବାଗ୍ରେ ଅଛନ୍ତି ।

ସୁନ୍ଦର ନ୍ୟୁଜିଲାଣ୍ଡ ବିପକ୍ଷ ଘରୋଇ ସିରିଜ୍‌ରେ ଦୁଇ ମ୍ୟାଚ୍ ଖେଳି ୧୬ ୱିକେଟ୍ ନେଇଥିଲେ । ସେ ଏ ଯାବତ ସାତ ମ୍ୟାଚ୍‌ରେ ୨୪ ୱିକେଟ୍ ନେବା ସହ ୩୮୭ ରନ୍ ସଂଗ୍ରହ କରିଛନ୍ତି ।

ଅଶ୍ୱିନଙ୍କ ଅବସର ପରେ ଟେଷ୍ଟରେ ଭାରତର ସ୍ପିନ୍ ବିଭାଗ ଏବେ ସନ୍ଧିକାଳ ଦେଇ ଗତି କରିବ । ଏହି ସମୟରେ ଚୟନ କମିଟି ନୂଆ ନୂଆ ପ୍ରୟୋଗ କରିବାକୁ ଚାହିଁବ ।

ଇମେଲ୍: biswasports@gmail.com

(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)