୪ ମାସ ହେଲା ପାକିସ୍ତାନ କ୍ରିକେଟରଙ୍କୁ ମିଳିନି ଦରମା, ବିଶ୍ୱକପ ଖେଳିବେ କେମିତି ?

ପାକିସ୍ତାନ କ୍ରିକେଟ ଓ ସମସ୍ୟା । ସବୁବେଳେ କିଛି ନା କିଛି ସମସ୍ୟା ଦେଇ ଗତି କରୁଥାଏ ପାକିସ୍ତାନ କ୍ରିକେଟ ବୋର୍ଡ । ଦିନିକିଆ ବିଶ୍ୱକପ ତାରିଖ ଯେତିକି ପାଖେଇ ଆସୁଛି ପାକିସ୍ତାନ କ୍ରିକେଟ ଟିମର ସମସ୍ୟା ସେତିକି ବଢ଼ିବାରେ ଲାଗୁଛି । ଗୋଟିଏ ପଟେ ଭାରତ ଆସିବାକୁ ଭିସା ମିଳିନଥିବାବେଳେ ଏବେ ଆଉ ଏକ ବିବାଦରେ ଛନ୍ଦି ହୋଇଛି ପିସିବି । ବିଗତ ୪ ମାସ ହେଲାଣି ପାକିସ୍ତାନ କ୍ରିକେଟରଙ୍କୁ ମିଳିନି ଦରମା । ଯାହାକୁ ନେଇ ବିଦ୍ରୋହ ମୁଡରେ ଅଛନ୍ତି ପାକ୍ କ୍ରିକେଟର । ଏଭଳି ସ୍ଥିତିରେ ବିଶ୍ୱକପ୍ କେମିତି ଖେଳିବ ପାକିସ୍ତାନ ତାହା ଏବେ ଆଶଙ୍କା ଘେରରେ ରହିଛି ।

କ୍ରିକେଟ ପାକିସ୍ତାନର ରିପୋର୍ଟ ଅନୁସାରେ, ଗତ ଚାରି ମାସ ମଧ୍ୟରେ ପାକିସ୍ତାନ କ୍ରିକେଟ ବୋର୍ଡ ଖେଳାଳିଙ୍କୁ ନା ମ୍ୟାଚ୍ ଫି’ ଦେଇଛି ନା ମାସିକ ଦରମା ପ୍ରଦାନ କରିଛି । ଏଭଳି ପରିସ୍ଥିତିରେ ଯୁବ ଖେଳାଳିଙ୍କ ଆଗରେ ଆର୍ଥିକ ସମସ୍ୟା ଉପୁଜିଛି । ବର୍ତ୍ତମାନ ପର୍ଯ୍ୟନ୍ତ ଖେଳାଳିମାନେ ନୀରବ ଥିଲେ କିନ୍ତୁ ଏବେ ସେମାନେ ନିଜର ଅସନ୍ତୋଷ ଜାହିର କରିଛନ୍ତି । ଏପରି ସ୍ଥିତିରେ ଖେଳାଳି ସେମାନଙ୍କ ଜର୍ସିରେ ପ୍ରାୟୋଜକଙ୍କ ଲୋଗ ରଖିବାକୁ ମନା କରିପାରନ୍ତି । 

ଏହି ଘଟଣାରେ ଜଣେ ପାକିସ୍ତାନ କ୍ରିକେଟର ନାଁ ଗୋପନ ରଖି କହିଛନ୍ତି କି “ ଆମେ ମାଗଣାରେ ପାକିସ୍ତାନକୁ ପ୍ରତିନିଧିତ୍ୱ କରିବାକୁ ପ୍ରସ୍ତୁତ, କିନ୍ତୁ ବୋର୍ଡ ସହିତ ଜଡିତ ଥିବା ପ୍ରାୟୋଜକ ଲୋକଙ୍କୁ ଆମେ କାହିଁକି ପ୍ରୋତ୍ସାହିତ କରିବୁ ? ସେହିଭଳି, ଆମେ ପ୍ରୋତ୍ସାହନମୂଳକ କାର୍ଯ୍ୟକଳାପ ଏବଂ ଅନ୍ୟାନ୍ୟ କାର୍ଯ୍ୟକ୍ରମରେ ଅଂଶଗ୍ରହଣ କରିବାକୁ ମନା ମଧ୍ୟ କରିପାରିବୁ । ବିଶ୍ୱକପ ସମୟରେ ଆମେ ଆଇସିସି ବ୍ୟବସାୟିକ ଓ ଅନ୍ୟାନ କାର୍ଯ୍ୟକ୍ରମରେ ସାମିଲ ହେବୁ ନାହୁଁ” ବୋଲି ଖେଳାଳି ଜଣଙ୍କ କହିଛନ୍ତି । 

ସେହିପରି କେନ୍ଦ୍ରୀୟ ଚୁକ୍ତି ସମ୍ପର୍କରେ ପାକିସ୍ତାନ କ୍ରିକେଟ ବୋର୍ଡ ଓ କ୍ରିକେଟରଙ୍କ ମଧ୍ୟରେ ଏପର୍ଯ୍ୟନ୍ତ କୗଣସି ଚୁକ୍ତି ହୋଇନାହିଁ । ଏଭଳି ପରିସ୍ଥିତିରେ ବିନା ଚୁକ୍ତିରେ ବିଶ୍ୱକପରେ ପାକ୍ କ୍ରିକେଟର ଖେଳିବାର ସମ୍ଭାବନା ରହିଛି । କ୍ରିକେଟର ତିନୋଟି ଫର୍ମାଟ ଖେଳୁଥିବା ଶ୍ରେଷ୍ଠ କ୍ରିକେଟରମାନଙ୍କୁ ପ୍ରତି ମାସରେ ୪୫ ଲକ୍ଷ ଟଙ୍କା ଦେବାକୁ ପିସିବି ପ୍ରସ୍ତାବ ଦେଇଛି । କିନ୍ତୁ ଖେଳାଳିମାନେ କହିଛନ୍ତି ଯେ ଟିକସ ଏବଂ ଅନ୍ୟାନ୍ୟ ରିହାତି ପରେ ସେମାନଙ୍କୁ ମାତ୍ର ୨୨ ରୁ ୨୩ ଲକ୍ଷ ଟଙ୍କା ମିଳିବ । ଏଭଳି ପରିସ୍ଥିତିରେ ସେମାନେ ପରିମାଣ ବୃଦ୍ଧି କରିବାକୁ ଦାବି କରୁଛନ୍ତି।
ସୂଚନା ଅନୁସାରେ ଅକ୍ଟୋବର ୫ରୁ ଭାରତରେ ଆରମ୍ଭ ହେବାକୁ ଯାଉଛି ଦିନିକିଆ ବିଶ୍ୱକପ। ଏହି ମେଗା ଟୁର୍ଣ୍ଣାମେଣ୍ଟରେ ପାକିସ୍ତାନ ତା’ର ପ୍ରଥମ ମ୍ୟାଚ ଅକ୍ଟୋବର ୬ରେ ନେଦରଲ୍ୟାଣ୍ଡ ବିପକ୍ଷରେ ଖେଳିବ।