ICC T20 World Cup 2022: ଅଷ୍ଟ୍ରେଲିଆ ପାଇଁ ଉଡ଼ାଣ ଭରିବେ ସାମି

ଟି-ଟ୍ୱେଣ୍ଟି ବିଶ୍ୱକପ୍‌ ୨୦୨୨ ଅଷ୍ଟ୍ରେଲିଆରେ ଆୟୋଜିତ ହେଉଛି । ଟିମ୍‌ ଇଣ୍ତିଆ ୧୫ ଜଣିଆ ସ୍କ୍ୱାଡ୍‌ରେ ପ୍ରଥମେ ଟି-ଟ୍ୱେଣ୍ଟି ସ୍ପେଶାଲିଷ୍ଟ ଯଶପ୍ରିତ ବୁମ୍ରା ସ୍ଥାନ ପାଇଥିବା ବେଳେ ଆହତ ସମସ୍ୟା କାରଣରୁ ତାଙ୍କୁ ଟିମ୍‌ରୁ ବାଦ୍‌ ଦିଆଯାଇଛି । ତାଙ୍କ ବଦଳରେ ଆଜି ଦ୍ରୁତ ବୋଲର୍‌ ମହମ୍ମଦ ସାମିଙ୍କୁ ୧୫ ଜଣିଆ ସ୍କ୍ୱାଡ୍‌ରେ ସାମିଲ କରାଯାଇଛି । ଏନେଇ BCCI ପକ୍ଷରୁ ସଂପାଦକ ଜୟ ଶାହ ଗୋଟିଏ ବିବୃତି ଜାରି କରି ସୂଚନା ଦେଇଛନ୍ତି । ସେହିପରି ମହମ୍ମଦ ସିରାଜ ଓ ଶାର୍ଦ୍ଦୁଲ ଠାକୁରଙ୍କୁ ଷ୍ଟାଣ୍ତ୍‌ ବାଏ ରେ ରଖାଯାଇଛି । ଆଜି ହିଁ ଏହି ତିନିଜଣ ଖେଳାଳି ଅଷ୍ଟ୍ରେଲିଆ ଗସ୍ତରେ ଉଡ଼ାଣ ଭରିବେ ।

ସାମି ଫେବୃଆରୀ ମାସରୁ ଭାରତ ପାଇଁ ଟି-୨୦ ମ୍ୟାଚ୍‌ ଖେଳି ନାହାନ୍ତି। ଅଷ୍ଟ୍ରେଲିଆ ଓ ସାଉଥ୍‌ ଆଫ୍ରିକା ବିପକ୍ଷ ୩ ଟିକିଆ ଟି-ଟ୍ୱେଣ୍ଟି ସିରିଜ୍‌ ପାଇଁ ଚୟନ ହୋଇଥିଲେ ମଧ୍ୟ କୋଭିଡ୍‌ ପଜିଟିଭ୍‌ କାରଣରୁ ତାଙ୍କୁ ଟିମ୍‌ରୁ ବାଦ୍‌ ଦିଆଯାଇଥିଲା ।

ବର୍ତ୍ତମାନ ଟିମ୍‌ର ବୋଲିଂ ୟୁନିଟ୍‌ ସୁଦୃଢ଼ ହେବ ବୋଲି କୁହାଯାଉଛି । ଅଷ୍ଟ୍ରେଲିଆ ଓ ସାଉଥ୍‌ ଆଫ୍ରିକା ବିପକ୍ଷ ଟି-ଟ୍ୱେଣ୍ଟି ସିରିଜ୍‌ରେ ଭାରତର ବୋଲିଂ ସେପରି ଆଖିଦୃଶିଆ ନଥିଲା, ଯାହାକୁ ନେଇ ଅନେକ ପ୍ରଶ୍ନ ଉଠୁଥିଲା । ତେବେ ଦଳରେ ସାମି ଖେଳିବା ନେଇ ଚର୍ଚ୍ଚା ହେଉଥିବା ବେଳେ ଆଜି ବିସିସିଆଇ ପକ୍ଷରୁ ଏନେଇ ସ୍ପଷ୍ଟୀକରଣ କରାଯାଇଛି ।

ଭାରତୀୟ ଦଳ : ରୋହିତ ଶର୍ମା (କ୍ୟାପ୍ଟେନ୍‌), କେ.ଏଲ୍ ରାହୁଲ (ଉପ-ଅଧିନାୟକ), ବିରାଟ କୋହଲି, ସୂର୍ଯ୍ୟକୁମାର ଯାଦବ, ଦୀପକ ହୁଡ୍ଡା, ଋଷଭ ପନ୍ତ (ୱିକେଟ୍ କିପର), ଦୀନେଶ କାର୍ତ୍ତିକ (ୱିକେଟ୍ କିପର), ହାର୍ଦ୍ଦିକ ପାଣ୍ଡ୍ୟା, ଆର ଅଶ୍ୱିନ, ୟୁଜଭେନ୍ଦ୍ର ଚହଲ, ଅକ୍ଷର ପଟେଲ, ଭୂବନେଶ୍ୱର କୁମାର, ହର୍ଷଲ ପଟେଲ, ଅର୍ଶଦୀପ ସିଂହ, ମହମ୍ମଦ ସାମି