ଇଶାନ୍‌ ଜଣେ ପ୍ରତିଭାଶାଳୀ ଖେଳାଳି, ହେଲେ ତାଙ୍କ ପାଇଁ ୧୫ କୋଟି..

ଚଳିତ ବର୍ଷ ଆଇପିଏଲରେ ମୁମ୍ବାଇ ଇଣ୍ଡିଆନ୍ସର କୌଣସି ରଣନୀତି ଏଯାଏ କାମ ଦେଉନି। ଅଧିନାୟକ ରୋହିତ ଶର୍ମା ଓ ଟିମ୍‌ ମ୍ୟାନେଜମେଣ୍ଟ ଦଳର କମ୍ବିନେସନ ବାରମ୍ବାର ବଦଳାଉଛନ୍ତି ସତ, ହେଲେ ମୁମ୍ବାଇ ଇଣ୍ଡିଆନ୍ସର ପଏଣ୍ଟ ଟେବୁଲରେ ଖାତା ଫିଟୁ ପାରୁନାହିଁ । ଚଳିତ ସିଜିନରେ ମୁମ୍ବାଇ କ୍ରମାଗତ ୫ମ ପରାଜୟ ପରେ ପଏଣ୍ଟ ଟେବୁଲର ୧୦ ନଂ ସ୍ଥାନରେ ରହିଛି ।

୫ ଥର ଚାମ୍ପିୟନ୍‌ ମୁମ୍ବାଇ ଇଣ୍ତିଆନ୍ସ ରୋହିତ ଶର୍ମା, ଜସପ୍ରିତ ବୁମ୍ରା, ସୂର୍ଯ୍ୟକୁମାର ଯାଦବ ଓ କାଇରନ୍‌ ପୋଲାର୍ଡଙ୍କୁ ଟିମ୍‌ରେ ରିଟେନ୍‌ କରିଥିଲା । ତେବେ ଅକ୍ସନରେ ମୁମ୍ବାଇ ଇଣ୍ତିଆନ୍ସର ଟିମ୍‌ ଚୟନକୁ ନେଇ ସମାଲୋଚନା ହୋଇଥିବା ବେଳେ ବର୍ତ୍ତମାନ ଟିମ୍‌ର ଖରାପ ସ୍ଥିତିକୁ ନେଇ ପ୍ରଶ୍ନ ଉଠିବାରେ ଲାଗିଛି ।

ଅକ୍ସନରେ ଟିମ୍‌ ଇଶାନ୍‌ କିଶାନକୁ ୧୫.୨୫ କୋଟିରେ କିଣିଥିଲା, ଯାହାକୁ ନେଇ ବେଶ୍‌ ଆଲେଚନା ହୋଇଥିଲା । ତେବେ ନିକଟରେ ଅଷ୍ଟ୍ରେଲିଆର ପୂର୍ବତନ ଅଲରାଉଣ୍ଡର ତଥା ଦିଲ୍ଲୀ କ୍ୟାପିଟାଲ୍ସର ଆସିଷ୍ଟାଣ୍ଟ କୋଚ୍‌ ସେନ୍‌ ୱାଟସନ ଆଇପିଏଲ ୨୦୨୨ ନିଲାମରେ ଇଶାନ କିଶନଙ୍କ ପାଇଁ ମୁମ୍ବାଇ ଇଣ୍ତିଆନ୍ସ ୧୫ କୋଟି ଟଙ୍କା ଖର୍ଚ୍ଚ କରିଥିବା ନେଇ ସମାଲୋଚନା କରିଛନ୍ତି।

ମୁମ୍ବାଇ ଇଶାନ୍‌ଙ୍କୁ ଓ ଜୋଫ୍ରା ଆର୍ଚରଙ୍କୁ ଏତେ ଟଙ୍କା ଦେଇ କିଣିଥିବା ନେଇ ୱାଟସନ୍‌ ସମାଲୋଚନା କରିଛନ୍ତି । ସେ କହିଛନ୍ତି ଯେ, ଇଶାନ୍‌ଙ୍କ ଭଳି ଜଣେ ପ୍ରତିଭାଶାଳୀ ଓପନରଙ୍କୁ ଏତେ ଟଙ୍କାରେ କିଣିବା କଦାପି ଯୁକ୍ତିଯୁକ୍ତ ନୁହେଁ । ମୁମ୍ବାଇ ବର୍ତ୍ତମାନ ଯାଏଁ ଗୋଟିଏ ବି ମ୍ୟାଚ୍‌ରେ ବିଜୟ ହାସଲ କରିନଥିବା ବେଳେ ଇଶାନଙ୍କୁ ୧୫.୨୫ କୋଟି ଓ ଜୋଫ୍ରା ଆର୍ଚରକୁ ୮ କୋଟି ଦେଇ କିଣିଥିବା ନେଇ ଟିମ୍‌ ମ୍ୟାନେଜମେଣ୍ଟକୁ ସମାଲୋଚନା କରିଛନ୍ତି । ଆର୍ଚର ଏବେ ଯାଏଁ ମଧ୍ୟ ନିଜ କହୁଣୀ ଆଘାତରୁ ସୁସ୍ଥ ହୋଇନଥିବା ବେଳେ ଆସନ୍ତା ସିଜିନ୍‌ରେ ଖେଳିବା ନେଇ ମଧ୍ୟ ଆଶଙ୍କାରେ ରହିଛନ୍ତି ।

ସେ ଗ୍ରେଡ୍‌ କ୍ରିକେଟ୍‌ ପୋଡକାଷ୍ଟର ବାର୍ତ୍ତାଳାପରେ କହିଛନ୍ତି ଯେ, ମୁମ୍ବାଇ ଇଣ୍ତିଆନ୍ସ ପଏଣ୍ଟ ଟେବୁଲର ତଳେ ରହିବା ଦେଖି ମତେ କିଛି ଆଶ୍ଚର୍ଯ୍ୟ ଲାଗୁନାହିଁ । କାରଣ ସେ ଅକ୍ସନରେ ହିଁ ଆଶ୍ଚର୍ଯ୍ୟଜନକ ନିଷ୍ପତ୍ତି ନେଇସାରିଛନ୍ତି । ପ୍ରଥମତଃ ସେ ଇଶାନ୍‌ କିଶାନଙ୍କୁ ୧୫ କୋଟି ଦେଇ କିଣିଲେ, ଇଶାନ ଜଣେ ପ୍ରତିଭାଶାଳୀ ଖେଳାଳି ସତ କିନ୍ତୁ ତାଙ୍କ ପାଇଁ ଟିମ୍‌ ଏତେ ଟଙ୍କା ଖର୍ଚ୍ଚ କରିବା ଠିକ୍‌ ନୁହେଁ ।