ମ୍ୟାଚ ଜିତିବା ଖୁସିରେ ମନାଉଥିଲେ ବିଜୟ ଉତ୍ସବ, ହଠାତ ଛାତିରେ ହେଲା ଯନ୍ତ୍ରଣା; ଆଉ ତା’ପରେ ..

ହୃଦଘାତରେ କ୍ରିକେଟର ମୃତ । ସାମ୍ନାକୁ ଆସିଥିବା ଏକ ଦୁର୍ଭାଗ୍ୟଜନକ ଘଟଣା କ୍ରମରେ କର୍ଣ୍ଣାଟକର ପୂର୍ବତନ କ୍ରିକେଟର କେ ହୋଏସାଲାଙ୍କର ହୃଦଘାତରେ ପରଲୋକ ଘଟିଛି । ମୃତ୍ୟୁ ବେଳକୁ ତାଙ୍କୁ ମାତ୍ର ୩୪ ବର୍ଷ ବୟସ ହୋଇଥିଲା । ସେ ଏଗିସ୍ ସାଉଥ ଜୋନ୍ ଟୁର୍ନାମେଣ୍ଟର ଏକ ମ୍ୟାଚ୍ ପରେ ହୃଦଘାତରେ ଆକ୍ରାନ୍ତ ହୋଇଥିଲେ ।

ଉକ୍ତ ମ୍ୟାଚଟି ବେଙ୍ଗାଲୁରୁର ଆର.ଏସ.ଆଇ. କ୍ରିକେଟ୍ ଗ୍ରାଉଣ୍ଡରେ ତାମିଲନାଡୁ ବିପକ୍ଷରେ ଖେଳାଯାଉଥିଲା । ମ୍ୟାଚ୍ ପରେ ପରେ ହିଁ ଏହି ଘଟଣା ଘଟିଛି । କର୍ଣ୍ଣାଟକ ବିଜୟ ଉତ୍ସବ ପାଳନ କରୁଥିବା ବେଳେ ଉକ୍ତ କ୍ରିକେଟର ଜଣକ ଛାତିରେ ଯନ୍ତ୍ରଣା ଅନୁଭବ କରିଥିଲେ । ପରେ ପଡ଼ିଆରେ ଚେତାଶୂନ୍ୟ ହୋଇ ପଡ଼ି ଯାଇଥିଲେ ।

ତାଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ ବେଙ୍ଗାଲୁରୁର ଏକ ଘରୋଇ ହସ୍ପିଟାଲକୁ ନିଆଯାଇଥିଲା । କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଗତ ଫେବୃଆରୀ ୨୨ରେ ଏହି ଘଟଣା ଘଟିଥିଲା ।

ହୋଏସାଲା ଜଣେ ମଧ୍ୟମ ଅର୍ଡର ବ୍ୟାଟର ତଥା ବୋଲର ଥିଲେ । ସେ ୨୫ ବର୍ଷରୁ କମ୍ ବର୍ଗରେ କର୍ଣ୍ଣାଟକ ଦଳ ତରଫରୁ ପ୍ରତିନିଧିତ୍ୱ ମଧ୍ୟ କରିଥିଲେ । ଅନ୍ୟପଟେ ସେ କର୍ଣ୍ଣାଟକ ପ୍ରିମିୟର ଲିଗରେ ମଧ୍ୟ ଖେଳିଥିଲେ । ସେପଟେ କ୍ରିକେଟରଙ୍କୁ ମୃତ ଅବସ୍ଥାରେ ହସ୍ପିଟାଲ ଅଣାଯାଇ ଥିଲା ବୋଲି କହିଛନ୍ତି ମେଡ଼ିକାଲ କର୍ତ୍ତୃପକ୍ଷ ।