ଆଇପିଏଲ୍ ୨୦୨୨ ର ୫୦ ତମ ମ୍ୟାଚ୍ରେ ମୁହାଁମୁହିଁ ହେବାକୁ ଯାଉଛନ୍ତି ଦିଲ୍ଲୀ କ୍ୟାପିଟାଲ୍ସ ଓ ସନରାଇଜର୍ସ ହାଇଦ୍ରାବାଦ । ପଏଣ୍ଟ ଟେବୁଲ୍ର ହାଇଦ୍ରାବାଦ ୯ଟି ମ୍ୟାଚ୍ରୁ ୫ଟି ରେ ବିଜୟ ହାସଲ କରି ୫ନଂ ସ୍ଥାନରେ ରହିଥିବା ବେଳେ ୯ଟି ମ୍ୟାଚ୍ରେ ୪ଟି ମ୍ୟାଚ୍ରେ ବିଜୟ ହାସଲ କରି ୭ନଂ ସ୍ଥାନରେ ରହିଛି ଦିଲ୍ଲୀ କ୍ୟାପିଟାଲ୍ସ । ଆଜିର ମ୍ୟାଚ୍ଟି ମୁମ୍ବାଇର ବ୍ରେବନ୍ ଷ୍ଟାଡିୟମରେ ହେବାକୁ ଯାଉଛି । ଟସ୍ ଜିତି ହାଇଦ୍ରାବାଦ ଦିଲ୍ଲୀ ବିପକ୍ଷରେ ବୋଲିଂ କରିବାର ନିଷ୍ପତ୍ତି ନେଇଛି ।
ଦିଲ୍ଲୀ କ୍ୟାପିଟାଲ୍ସ ପୂର୍ବ ମ୍ୟାଚ୍ଟି ଲକ୍ଷ୍ନୌ ଠାରୁ ୬ ରନ୍ରେ ପରାସ୍ତ ହୋଇଥିଲା । ଦିଲ୍ଲୀକୁ ଶେଷ ଓଭରରେ ୨୧ରନ ଆବଶ୍ୟକ ଥିଲା। କିନ୍ତୁ ଏହି ଓଭରେ କୁଲଦୀପ ଯାଦବ ଓ ଅକ୍ଷର ପଟେଲ କ୍ରିଜରେ ଥିଲେ। ଦୁଇଟି ଛକା ମଧ୍ୟ ଦେଖିବାକୁ ମିଳିଥିଲା। ହେଲେ ତାଙ୍କ ଟିମ ବିଜୟ ହାସଲ କରିପାରି ନଥିଲା।
Also Read
ସେହିପରି ହାଇଦ୍ରାବାଦ ମଧ୍ୟ ପୂର୍ବ ମ୍ୟାଚ୍ଟି ଚେନ୍ନାଇ ସୁପର କିଙ୍ଗ୍ସ ଠାରୁ ୧୩ ରନ୍ରେ ହାରି ଯାଇଥିଲା । ତେବେ ଦୁଇଟି ଟିମ୍ ନିଜର ବିଜୟ ଟ୍ରାକ୍କୁ ଫେରିବା ପାଇଁ ଜୋର୍ ଲଗାଇବେ ବୋଲି ଆଶା କରାଯାଉଛି । ଏହି ମ୍ୟାଚ୍ଟି ପ୍ଲେ ଅଫ ଦୃଷ୍ଟିରୁ ଉଭୟ ଦଳ ପାଇଁ ବେଶ ଗୁରୁତ୍ୱପୂର୍ଣ୍ଣ।
ତେଣୁ ହାଇଦ୍ରାବାଦ ଆଜିର ମ୍ୟାଚ୍ରେ ୩ଟି ପରିବର୍ତ୍ତନ କରିଛି। ଦଳ ପାଇଁ ସେନ ଆବଟ୍ଟ, ଶ୍ରେୟସ ଗୋପାଲ ଓ କାର୍ତ୍ତିକ ତ୍ୟାଗୀ ଡେବ୍ୟୁ କରୁଛନ୍ତି। ମାର୍କୋ ଜାନେସନ, ୱାଶିଂଟନ ସୁନ୍ଦର ଓ ଟି ନଟରାଜନ ଆଜିର ମ୍ୟାଚ୍ ଖେଳୁ ନାହାନ୍ତି।
ସେହିପରି ଦିଲ୍ଲୀ ତା’ର ଚୂଡ଼ାନ୍ତ ଏକାଦଶରେ ୪ଟି ପରିବର୍ତ୍ତନ କରିଛି। ପୃଥ୍ୱୀ ଶ’, ଅକ୍ଷର ପଟେଲ, ଚେତନ ସକାରିୟା ଓ ମୁସ୍ତାଫିଜୁର ରହମାନ ଆଜିର ମ୍ୟାଚ୍ ଖେଳୁ ନାହାନ୍ତି। ଏମାନଙ୍କ ବଦଳରେ ମନଦୀପ ସିଂହ, ଖଲୀଲ ଅହମଦ, ରିପାଲ ପଟେଲ ଓ ଅନରିଚ ନୋର୍ଖିୟା ସ୍ଥାନ ପାଇଛନ୍ତି।