ବର୍ଡର-ଗାଭାସ୍କର ଟ୍ରଫିରେ ଅଷ୍ଟ୍ରେଲିଆ ଠାରୁ ୧-୨ରେ ପଛରେ ରହିବା ଓ ବିଶ୍ୱ ଟେଷ୍ଟ ଚାମ୍ପିଅନ୍ସିପ୍ (ଡବ୍ଲ୍ୟୁଟିସି) ଫାଇନାଲ୍ ଦୌଡ଼ରୁ ଆପାତତଃ ବାଦ୍ ପଡ଼ିବା ପରେ ଭାରତୀୟ ଟିମ୍ରେ ଏବେ ଗାଦି ବଞ୍ଚାଇବା ପାଇଁ ସଂଘର୍ଷ ଆରମ୍ଭ ହୋଇଛି ।
ମୁଖ୍ୟ କୋଚ୍ ଗୌତମ ଗମ୍ଭୀର ଆସିବା ପରେ ଟିମ୍ର ପ୍ରଦର୍ଶନରେ ଅବନତି ଦେଖିବାକୁ ମିଳିଛି । କୋଚିଂ ଟିମ୍ରେ ଥିବା ସହାୟକ କୋଚ୍ ଅଭିଷେକ ନାୟର, ମୋର୍ଣ୍ଣେ ମର୍କଲ ଓ ରାୟନ୍ ଟେନ୍ ଡଶକାଟେଙ୍କୁ ବି ତାଙ୍କ ପ୍ରସ୍ତାବ ଯୋଗୁଁ ରଖାଯାଇଥିଲା । ଏବେ ଗମ୍ଭୀରଙ୍କ ସମେତ ପୂରା କୋଚିଂ ଟିମ୍ର ଭୂମିକାକୁ ନେଇ ପ୍ରଶ୍ନ ଉଠିଛି ।
ଅଧିନାୟକ ରୋହିତ ଶର୍ମାଙ୍କ ପାଇଁ ମଧ୍ୟ ଟେଷ୍ଟ ଅଧିନାୟକତ୍ୱ ବଞ୍ଚାଇବା କଷ୍ଟକର । ସେ କ୍ରିକେଟ୍ର ପାରମ୍ପରିକ ଫର୍ମାଟ୍ରେ ଉଭୟ ବ୍ୟାଟିଂ ଓ ଅଧିନାୟକତ୍ୱରେ କ୍ରମାଗତ ବିଫଳ ହେଉଛନ୍ତି ।
Also Read
ଏପରି ସ୍ଥଳେ ସିରିଜ୍ ଶେଷ ହେବା ପରେ ସେ ଟେଷ୍ଟ କ୍ରିକେଟ୍ରୁ ଅବସର ନେଇପାରନ୍ତି ବୋଲି ଚର୍ଚ୍ଚା ହେଉଛି । କେବଳ ରୋହିତ ନୁହନ୍ତି, ବିରାଟ କୋହଲିଙ୍କ ପ୍ରଦର୍ଶନ ବି ଚିନ୍ତାର ବିଷୟ ହୋଇଛି ।
ଯଶପ୍ରୀତ ବୁମ୍ରାଙ୍କ ଅଧିନାୟକତ୍ୱରେ ଟିମ୍ ଇଣ୍ଡିଆ ପର୍ଥରେ ପ୍ରଥମ ଟେଷ୍ଟ ଜିତିବା ପରେ ରୋହିତ ପୁନର୍ବାର ନେତୃତ୍ୱ ଦାୟିତ୍ୱ ସମ୍ଭାଳିଥିଲେ । ଏହାପର ଠାରୁ ଟିମ୍ର ସଙ୍କଟ ବଢ଼ିଯାଇଛି । ଭାରତୀୟ ଟିମ୍ ଆଡିଲେଡ୍ ଠାରେ ପିଙ୍କ୍ ବଲ୍ ଓ ମେଲ୍ବର୍ଣ୍ଣ ଠାରେ ବକ୍ସିଂ ଡେ’ ଟେଷ୍ଟରେ ପରାଜିତ ହୋଇଥିଲା । ବ୍ରିସ୍ବେନ୍ରେ ହୋଇଥିବା ବର୍ଷା ବାଧାପ୍ରାପ୍ତ ଟେଷ୍ଟ କୌଣସିମତେ ଡ୍ର’ ରହିଥିଲା ।
ଟିମ୍କୁ ସବୁ ସୁବିଧା ଦିଆଯାଉଛି । ପର୍ଯ୍ୟାପ୍ତ ସପୋର୍ଟ ଷ୍ଟାଫ୍ ରହିଛନ୍ତି ଅଥଚ ପ୍ରଦର୍ଶନରେ ଅବନତି ହେଉଛି ।
ଯଦି ପ୍ରଦର୍ଶନରେ ସୁଧାର ନ ହୁଏ, ତା’ହେଲେ ଗମ୍ଭୀରଙ୍କ ସ୍ଥିତି ବି ସୁରକ୍ଷିତ ନୁହେଁ । ତାଙ୍କୁ ଫେବ୍ରୁଆରୀ-ମାର୍ଚ୍ଚରେ ଦିନିକିଆ ଫର୍ମାଟ୍ରେ ହେବାକୁ ଥିବା ଆଇସିସି ଚାମ୍ପିଅନ୍ସ ଟ୍ରଫି ଯାଏଁ ଅଲ୍ଟିମେଟମ୍ ଦିଆଯାଇଛି ବୋଲି ଚର୍ଚ୍ଚା ହେଉଛି । ଏହା ପୂର୍ବରୁ ଇଂଲଣ୍ଡ ଟିମ୍ ଭାରତ ଗସ୍ତରେ ଆସି ଟି-୨୦ ଓ ଦିନିକିଆ ସିରିଜ୍ ଖେଳିବ ।
ଖେଳାଳିଙ୍କ ସହ ଗମ୍ଭୀରଙ୍କ ଏକତରଫା ଯୋଗାଯୋଗ
ଭାରତୀୟ ଟିମ୍ର ଏକ ସୂତ୍ରରୁ ପ୍ରକାଶ ଯେ ଖେଳାଳିଙ୍କ ସହ ମୁଖ୍ୟ କୋଚ୍ ଗମ୍ଭୀରଙ୍କ ଯୋଗାଯୋଗ ପ୍ରାୟତଃ ଏକତରଫା । ରବି ଶାସ୍ତ୍ରୀ ଓ ରାହୁଲ ଦ୍ରାବିଡ଼ଙ୍କ ସମୟରେ ସେମିତି ନ ଥିଲା ।
ପର୍ଥ ଟେଷ୍ଟର ଦିନକ ପୂର୍ବରୁ ସେ ଏହି ୧୧ ଜଣ ଖେଳାଳି ଖେଳିବେ ବୋଲି ରୋକ୍ଠୋକ୍ ଜଣାଇ ଦେଇଥିଲେ । ସେହି ମ୍ୟାଚ୍ରୁ ବାଦ୍ ପଡ଼ିଥିବା ଜଣେ ଖେଳାଳି ସେଥିରେ ଅସନ୍ତୁଷ୍ଟ ଥିଲେ ।
ମେଲ୍ବର୍ଣ୍ଣରେ ଶୁଭମନ ଗିଲ୍ଙ୍କୁ ବାଦ୍ ଦିଆଯିବା ପରେ ସମସ୍ୟା ବଢ଼ିଗଲା । ସେହି ମ୍ୟାଚ୍ ପୂର୍ବରୁ ଟିମ୍ ବୈଠକରେ ଅଧିନାୟକ ରୋହିତ ଶର୍ମା କହିଥିଲେ ଯେ ସେ ମ୍ୟାଚ୍ରେ ଓପନିଂ କରିବେ ଏବଂ ଲୋକେଶ ରାହୁଲ ତିନି ନମ୍ବରରେ ଖେଳିବେ ।
ସିରିଜ୍ ଆରମ୍ଭରୁ ଭଲ ପ୍ରଦର୍ଶନ କରୁଥିବା ନୀତୀଶ କୁମାର ରେଡ୍ଡୀଙ୍କୁ କୁହାଯାଇଥିଲା ଯେ ସେ ଖେଳିବା ପାଇଁ ମାନସିକ ଭାବେ ପ୍ରସ୍ତୁତ ରହନ୍ତୁ । ଗିଲ୍ଙ୍କୁ କଢ଼ାଯିବାର ସଙ୍କେତ ଦିଆଯାଇଥିଲା । ଡିସେମ୍ବର ୨୫ରେ ଡ୍ରେସିଂ ରୁମ୍ର ଏହି ଖବର ପଦାକୁ ଆସିଥିଲା । ଏମିତି ପୂର୍ବରୁ କ୍ୱଚିତ୍ ହେଉଥିଲା।
ପ୍ରଥମ ଟେଷ୍ଟରେ ରବିଚନ୍ଦ୍ରନ ଅଶ୍ୱିନଙ୍କ ସ୍ଥାନରେ ୱାଶିଂଟନ୍ ସୁନ୍ଦରଙ୍କୁ ଅଗ୍ରାଧିକାର ହେଉ କିମ୍ବା ଗିଲ୍ଙ୍କ ଠାରୁ ରେଡ୍ଡୀଙ୍କୁ ପ୍ରାଥମିକତା - ଟିମ୍ ମ୍ୟାନେଜ୍ମେଣ୍ଟର ସମସ୍ତେ ସେଥିରେ ଏକମତ ନ ଥିଲେ ।
ସିରିଜ୍ ମଝିରୁ ଅଭିଜ୍ଞ ଅଫ୍ ସ୍ପିନ୍ ଅଲ୍ରାଉଣ୍ଡର୍ ଅଶ୍ୱିନଙ୍କ ଅଚାନକ ଅବସର ଘୋଷଣା ମଧ୍ୟ ଦର୍ଶାଉଛି ଯେ ଟିମ୍ରେ ସବୁକିଛି ଠିକ୍ଠାକ୍ ନାହିଁ । ଟିମ୍ରେ ଏଭଳି କେତେକ ଖେଳାଳି ଅଛନ୍ତି ଯେଉଁମାନେ ଗମ୍ଭୀରଙ୍କ ଚୂଡ଼ାନ୍ତ ଏକାଦଶ ସହିତ ପ୍ରୟୋଗ କରିବାର ପ୍ରବୃତ୍ତି ଯୋଗୁଁ ନିଜକୁ ଅସୁରକ୍ଷିତ ମଣୁଛନ୍ତି ।
ମୁଖ୍ୟ କୋଚ୍ ପାଇଁ ନ ଥିଲେ ପ୍ରଥମ ପସନ୍ଦ
ଟି-୨୦ ବିଶ୍ୱକପ୍ ବିଜୟ ସହ ଭାରତୀୟ କ୍ରିକେଟ୍ ଟିମ୍ର ତତ୍କାଳୀନ ମୁଖ୍ୟ କୋଚ୍ ରାହୁଲ ଦ୍ରାବିଡ଼ଙ୍କ ସମ୍ପ୍ରସାରିତ କାର୍ଯ୍ୟକାଳ ଶେଷ ହୋଇଥିଲା । ଏହାପରେ ପୂର୍ବତନ ଓପନର୍ ଗମ୍ଭୀରଙ୍କୁ ମୁଖ୍ୟ କୋଚ୍ କରାଯାଇଥିଲା ।
ଗତ ବର୍ଷ ଜୁଲାଇ-ଅଗଷ୍ଟରେ ଶ୍ରୀଲଙ୍କା ବିପକ୍ଷ ହ୍ୱାଇଟ୍ ବଲ୍ ସିରିଜ୍ରୁ ମୁଖ୍ୟ କୋଚ୍ ଭାବେ ଗମ୍ଭୀରଙ୍କ ଅଭିଯାନ ଆରମ୍ଭ ହୋଇଥିଲା । ଟିମ୍ ଇଣ୍ଡିଆ ଟି-୨୦ ସିରିଜ୍କୁ ୩-୦ରେ କ୍ଲିନ୍ ସୁଇପ୍ କରିଥିଲା, କିନ୍ତୁ ଦିନିକିଆ ସିରିଜ୍ରେ ସିନିଅର୍ ଖେଳାଳିଙ୍କ ଉପସ୍ଥିତି ସତ୍ତ୍ୱେ ୦-୨ରେ ହାରିଯାଇଥିଲା ।
ଏହାପରେ ଟିମ୍ ଇଣ୍ଡିଆ ଘରେ ବାଂଲାଦେଶ ବିପକ୍ଷ ଟେଷ୍ଟ ସିରିଜ୍କୁ ୨-୦ ଓ ଟି-୨୦ ସିରିଜ୍କୁ ୩-୦ରେ କ୍ଲିନ୍ ସୁଇପ୍ କରିଥିଲା । ତେବେ ନ୍ୟୁଜିଲାଣ୍ଡ ବିପକ୍ଷ ଘରୋଇ ଟେଷ୍ଟ ସିରିଜ୍ରେ ଟିମ୍ର ଦୁର୍ବଳତା ପଦାରେ ପଡ଼ିଥିଲା । ଟିମ୍ ୦-୩ରେ କ୍ଲିନ୍ ସୁଇପ୍ର ଶିକାର ହୋଇଥିଲା ।
ଏହି ବଡ଼ ବିପର୍ଯ୍ୟୟ ପରେ ଭାରତୀୟ ଟେଷ୍ଟ ଟିମ୍ ବର୍ଡର-ଗାଭାସ୍କର ଟ୍ରଫି ଖେଳିବା ପାଇଁ ଅଷ୍ଟ୍ରେଲିଆ ଆସିଛି । ଏଠାରେ ବି ସଙ୍କଟ ଥମିବାର ନାଁ ଧରୁନି । ଚତୁର୍ଥ ଟେଷ୍ଟ ଶେଷ ସୁଦ୍ଧା ଟିମ୍ ୧-୨ରେ ପଛରେ ଅଛି ।
ଏହା ସହିତ ଟିମ୍ ସିଧାସଳଖ ଡବ୍ଲ୍ୟୁଟିସି ଫାଇନାଲ୍କୁ ଯାଇପାରି ନାହିଁ । ଅନ୍ୟ ସମୀକରଣରୁ ବି ଫାଇନାଲ୍କୁ ଯିବାର ସମ୍ଭାବନା କମ୍ ।
ଗମ୍ଭୀରଙ୍କ କାର୍ଯ୍ୟକାଳରେ ଟିମ୍ ଦ୍ୱିପାକ୍ଷିକ ସିରିଜ୍ରେ ବିଫଳ ହେବା ଚିନ୍ତାର ବିଷୟ । ମନେ ହେଉଛି ଯେମିତି ଖେଳାଳି ଓ କୋଚ୍ଙ୍କ ମଧ୍ୟରେ ଉତ୍ତମ ତାଳମେଳ ରହୁ ନାହିଁ ।
ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡର ଜଣେ ଅଧିକାରୀଙ୍କ କହିବାନୁଯାୟୀ, “ଗମ୍ଭୀର ମୁଖ୍ୟ କୋଚ୍ ଭାବରେ କେବେ ବି ବୋର୍ଡର ପ୍ରଥମ ପସନ୍ଦ ନ ଥିଲେ (ଭିଭିଏସ୍ ଲକ୍ଷ୍ମଣ ଥିଲେ) ଏବଂ କେତେକ ଜଣାଶୁଣା ବିଦେଶୀ ନାଁ ତିନି ଫର୍ମାଟ୍ର କୋଚ୍ ହେବାକୁ ଚାହୁଁ ନ ଥିଲେ । ତେଣୁ ଏହା ଏକ ବୁଝାମଣା ଥିଲା । ଅନ୍ୟ କିଛି ବାଧ୍ୟବାଧକତା ବି ଥିଲା ।”
ଚାମ୍ପିଅନ୍ସ ଟ୍ରଫି ହୋଇପାରେ ଶେଷ ସୁଯୋଗ
କାର୍ଯ୍ୟକାଳର ଚାରି ମାସ ମଧ୍ୟରେ ଭାରତୀୟ ଟିମ୍ ଶ୍ରୀଲଙ୍କାରେ ଦିନିକିଆ ସିରିଜ୍ ଓ ଘରେ ନ୍ୟୁଜିଲାଣ୍ଡ ଠାରୁ ଟେଷ୍ଟ ସିରିଜ୍ ହାରିବା ପରେ ମୁଖ୍ୟ କୋଚ୍ ଗମ୍ଭୀର ଜାଣିଥିଲେ ଯେ ଅଷ୍ଟ୍ରେଲିଆ ଗସ୍ତ ତାଙ୍କ ପାଇଁ ଏସିଡ୍ ଟେଷ୍ଟ ହେବ । କିନ୍ତୁ ସେ ଟିମ୍କୁ ଉଚିତ ମାର୍ଗଦର୍ଶନ କରାଇବାରେ ବିଫଳ ହୋଇଛନ୍ତି ।
ଯଦି ସିଡ୍ନୀ ଠାରେ ପଞ୍ଚମ ତଥା ଶେଷ ଟେଷ୍ଟରେ ଭାରତ ହାରିବ କିମ୍ବା ମ୍ୟାଚ୍ ଡ୍ର’ ରହିବ, ତା’ହେଲେ ସିରିଜ୍ ହାତଛଡ଼ା ହେବ । ଯଦି ଜିତିବ, ତା’ହେଲେ ସିରିଜ୍ ବରାବର ରହିବ ଏବଂ ଡବ୍ଲ୍ୟୁଟିସି ଫାଇନାଲ୍ରେ ପହଞ୍ଚିବାର ସାମାନ୍ୟ ଆଶା ସଞ୍ଚାର ହେବ । ଅନ୍ତତଃ ଟିମ୍ର ସମ୍ମାନ ବଞ୍ଚିଯିବ ।
ତେବେ ଟିମ୍ର ମୁଖ୍ୟ ଲକ୍ଷ୍ୟ ଡବ୍ଲ୍ୟୁଟିସି ଫାଇନାଲ୍, ସିରିଜ୍ ବଞ୍ଚାଇବା ନୁହେଁ । ତେଣୁ ସିରିଜ୍ ବରାବର ରହିଲେ ବି ଚାମ୍ପିଅନ୍ସ ଟ୍ରଫି ଗମ୍ଭୀରଙ୍କ ପାଇଁ ଶେଷ ସୁଯୋଗ ହୋଇପାରେ । ଏଥିରେ ବିଫଳ ହେବା ସ୍ଥଳେ ଗମ୍ଭୀରଙ୍କ ସମେତ ପୂରା କୋଚିଂ ଷ୍ଟାଫ୍ ବଦଳିପାରନ୍ତି ।
ଟିମ୍ ଇଣ୍ଡିଆ ଚାମ୍ପିଅନ୍ସ ଟ୍ରଫି ଜିତିଲେ ବି ଗମ୍ଭୀରଙ୍କ ମୁଣ୍ଡ ଉପରେ ଝୁଲୁଥିବା ଖଣ୍ଡା ସମ୍ପୂର୍ଣ୍ଣ ରୂପେ ଅପସରି ଯିବ ନାହିଁ । ଡବ୍ଲ୍ୟୁଟିସିର ନୂଆ ଚକ୍ରରେ ସେ ଟେଷ୍ଟ ଟିମ୍ର ମୁଖ୍ୟ କୋଚ୍ ରହିବେ ବୋଲି କୌଣସି ଗ୍ୟାରେଣ୍ଟି ନାହିଁ ।
ଭାରତୀୟ ବୋର୍ଡ ରେଡ୍ ଓ ହ୍ୱାଇଟ୍ ବଲ୍ ପାଇଁ ଅଲଗା ଅଲଗା କୋଚ୍ ରଖିବା ଉପରେ ବିଚାର କରିପାରେ । ଅତଏବ, ଟେଷ୍ଟ ପାଇଁ ନୂଆ ମୁଖ୍ୟ କୋଚ୍ ନିଯୁକ୍ତ କରାଯାଇ ଗମ୍ଭୀରଙ୍କୁ ଦୁଇ ସୀମିତ ଓଭର୍ (ଦିନିକିଆ ଓ ଟି-୨୦ ଆନ୍ତର୍ଜାତିକ) ଟିମ୍ର ଦାୟିତ୍ୱ ଦିଆଯାଇପାରେ ।
ଇମେଲ୍: biswasports@gmail.com
(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)