Sports: ଭାରତୀୟ ଟିମ୍‌ରେ ରବୀନ୍ଦ୍ର ଜାଡ଼େଜାଙ୍କ ସ୍ଥାନ ନେଇପାରିବେ କି ହର୍ଷ ଦୁବେ ?

ଭାରତୀୟ ଟେଷ୍ଟ ଟିମ୍ ଏବେ ସନ୍ଧିକାଳ ଦେଇ ଗତି କରୁଛି । ପୂର୍ବ ଅଷ୍ଟ୍ରେଲିଆ ଗସ୍ତରେ ପୁରୁଖା ସ୍ପିନ୍ ବୋଲିଂ ଅଲ୍‌ରାଉଣ୍ଡର୍ ରବିଚନ୍ଦ୍ରନ ଅଶ୍ୱିନ ଆନ୍ତର୍ଜାତିକ କ୍ରିକେଟ୍‌ରୁ ଅବସର ଘୋଷଣା କରିଥିଲେ । ଆଗାମୀ ଦିନରେ ଆଉ କେତେକ ସିନିଅର୍ ଖେଳାଳି କ୍ରିକେଟ୍‌ର ପାରମ୍ପରିକ ଫର୍ମାଟ୍ ଛାଡ଼ିପାରନ୍ତି ।

ଏପରି ସ୍ଥଳେ ନୂଆ ଟେଷ୍ଟ ଚକ୍ର ପୂର୍ବରୁ ଚୟନକାରୀମାନେ ସେମାନଙ୍କ ବିକଳ୍ପ ଖୋଜିବା ଆବଶ୍ୟକ । କ୍ୟାରିଅର୍‌ର ଅନ୍ତିମ ସୋପାନ ଦେଇ ଗତି କରୁଥିବା ସ୍ପିନ୍ ବୋଲିଂ ଅଲ୍‌ରାଉଣ୍ଡର୍ ରବୀନ୍ଦ୍ର ଜାଡ଼େଜାଙ୍କ ବିକଳ୍ପ ଭାବେ ଏବେ ଜଣେ ଖେଳାଳିଙ୍କ ଅଭ୍ୟୁଦୟ ହୋଇଛି । ଏହି ଖେଳାଳି ହେଲେ ବିଦର୍ଭର ହର୍ଷ ଦୁବେ ।

ବାମହାତି ଯୁବ ଖେଳାଳି ହର୍ଷ ରଣଜୀ ଟ୍ରଫି ୨୦୨୪-୨୫ରେ ଉଲ୍ଲେଖନୀୟ ବୋଲିଂ ପ୍ରଦର୍ଶନ କରି ଚର୍ଚ୍ଚାକୁ ଆସିଛନ୍ତି । ବ୍ୟାଟିଂରେ ବି ସେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଥିଲେ । ଅବଶ୍ୟ ଅକ୍ଷର ପଟେଲ୍ ଓ ୱାଶିଂଟନ୍ ସୁନ୍ଦରଙ୍କ ଭଳି ଦୁଇ ବିକଳ୍ପ ଥାଉ ଥାଉ ଆଉ ଜଣେ ଖେଳାଳି ଟେଷ୍ଟ କି ଦିନିକିଆ ଆନ୍ତର୍ଜାତିକ ଟିମ୍‌ରେ ସୁଯୋଗ ପାଇବା ସହଜ ନୁହେଁ ।

ୱିକେଟ୍ ହାସଲରେ ରଣଜୀ ରେକର୍ଡ

ବିଦର୍ଭ ରଣଜୀ ଟ୍ରଫିରେ ତୃତୀୟ ଥର ଚାମ୍ପିଅନ୍ ହୋଇଛି । ଟିମ୍‌ର ସଫଳତାରେ ହର୍ଷଙ୍କ  ପ୍ରମୁଖ ଯୋଗଦାନ ରହିଥିଲା । ସେ ୧୦ ମ୍ୟାଚ୍ ଖେଳି ୬୯ ୱିକେଟ୍ ନେବା ସହ ପାଞ୍ଚ ଅର୍ଦ୍ଧଶତକ ସମେତ ୪୭୬ ରନ୍ ସଂଗ୍ରହ କରିଥିଲେ । ଏହାଛଡ଼ା ଯଶ ରାଠୋଡ଼ (ସର୍ବାଧିକ ୯୬୦ ରନ୍‌), କରୁଣ ନାୟର (୮୬୩ ରନ୍‌) ଓ ଦାନିଶ ମାଲେୱାର (୭୮୩ ରନ୍‌) ମଧ୍ୟ ଅଗ୍ରଣୀ ଭୂମିକା ତୁଲାଇଥିଲେ ।

ହର୍ଷଙ୍କ ୬୯ ୱିକେଟ୍ ହାସଲ ଏକ ରେକର୍ଡ । ସେ ଗୋଟିଏ ରଣଜୀ ସିଜନ୍‌ରେ ସର୍ବାଧିକ ୱିକେଟ୍ ହାସଲକାରୀ ହେବାର ଗୌରବ ଅର୍ଜନ କରିଛନ୍ତି । ସେ ବିହାରର ଆଶୁତୋଷ ଅମନଙ୍କୁ ପଛରେ ପକାଇଥିଲେ, ଯିଏ ୨୦୧୮-୧୯ ସିଜନ୍‌ରେ ଗୋଟିଏ ସିଜନ୍‌ରେ ୬୮ ୱିକେଟ୍ ଅକ୍ତିଆର କରିଥିଲେ । କେରଳ ବିପକ୍ଷ ଫାଇନାଲ୍ ମ୍ୟାଚ୍‌ରେ ହର୍ଷ ୩ ୱିକେଟ୍ ପାଇଥିଲେ । ପୂରା ସିଜନ୍‌ରେ ସେ ସାତ ଥର ପାଞ୍ଚ ବା ଏହାଠାରୁ ଅଧିକ ୱିକେଟ୍ ନେଇଥିଲେ । ସେ ମଧ୍ୟ ‘ପ୍ଲେୟର୍ ଅଫ୍ ଦ ଟୁର୍ଣ୍ଣାମେଣ୍ଟ’ ବିବେଚିତ ହୋଇଥିଲେ ।

ଅକ୍ଷର ଓ ସୁନ୍ଦର ବଡ଼ ଚାଲେଞ୍ଜ୍‌

ଆନ୍ତର୍ଜାତିକ କ୍ରିକେଟ୍ ବିଶେଷକରି ଟେଷ୍ଟ କି ଦିନିକିଆ ଆନ୍ତର୍ଜାତିକରେ ହର୍ଷ ଅଭିଜ୍ଞ ସ୍ପିନ୍ ବୋଲିଂ ଅଲ୍‌ରାଉଣ୍ଡର୍ ଜାଡ଼େଜାଙ୍କ ସ୍ଥାନ ନେଇପାରିବେ ବୋଲି ଏବେଠାରୁ କହିବା ତରବରିଆ ହେବ । ଅନ୍ତତଃ ଟେଷ୍ଟ ଟିମ୍‌ରେ ସ୍ଥାନ ପାଇବା ପାଇଁ ସେ ଅଧିକ ଘରୋଇ କ୍ରିକେଟ୍ ଖେଳିବା ଦରକାର ।
ଯଦି ଫିଟ୍‌ନେସ୍‌କୁ ବିଚାରକୁ ନିଆଯାଏ, ତା’ହେଲେ ଜାଡ଼େଜା ଆଉ ବର୍ଷେ-ଦୁଇ ବର୍ଷ ଖେଳିପାରିବେ । କିନ୍ତୁ କେବଳ ଫିଟ୍‌ନେସ୍ ଯଥେଷ୍ଟ ନୁହେଁ, ପ୍ରଦର୍ଶନ ବି ଆବଶ୍ୟକ । ବର୍ଡର-ଗାଭାସ୍କର ଟ୍ରଫି ୨୦୨୪-୨୫ରେ ତାଙ୍କ ପ୍ରଦର୍ଶନ ନୈରାଶ୍ୟଜନକ ଥିଲା ।

ନୂଆ ଟେଷ୍ଟ ଚକ୍ରରେ ଜାଡ଼େଜା ଟିମ୍‌ରେ ସ୍ଥାନ ପାଇବାର ସମ୍ଭାବନା କମ୍ । ଏପରି ସ୍ଥଳେ ଟେଷ୍ଟ ଟିମ୍‌ରେ ଜାଡ଼େଜାଙ୍କ ସ୍ଥାନ ନେବା ପାଇଁ ଅକ୍ଷର ପଟେଲ୍ ଓ ୱାଶିଂଟନ୍ ସୁନ୍ଦର ଅଛନ୍ତି । ହର୍ଷଙ୍କ ପଥରେ ଏହି ଦୁଇ ଖେଳାଳି ବଡ଼ ଚାଲେଞ୍ଜ୍ । ଅକ୍ଷର ଓ ସୁନ୍ଦରଙ୍କ ଯଥାକ୍ରମେ ୧୪ ଓ ୯ ଟେଷ୍ଟ ମ୍ୟାଚ୍ ଖେଳିବାର ଅଭିଜ୍ଞତା ରହିଛି ।

ଉଭୟଙ୍କୁ ଅତିକ୍ରମ କରି ଆଗକୁ ଯିବା ହର୍ଷଙ୍କ ପାଇଁ ଆଦୌ ସହଜ ନୁହେଁ, ଯିଏ ଏ ଯାବତ ମାତ୍ର ୧୮ ରଣଜୀ ମ୍ୟାଚ୍ ଖେଳିଛନ୍ତି । ଯଦି ତାଙ୍କୁ ଭାରତୀୟ ଟିମ୍‌ରେ କିଛି ମ୍ୟାଚ୍ ଖେଳିବାର ସୁଯୋଗ ମିଳେ, ତା’ହେଲେ ସେହି ସୁଯୋଗରେ ତାଙ୍କୁ ନିଜ ପ୍ରତିଭାର ପରାକାଷ୍ଠା ଦେଖାଇବାକୁ ହେବ । ଦିନିକିଆ ଓ ଟି-୨୦ ଆନ୍ତର୍ଜାତିକରେ ଅକ୍ଷର ଟିମ୍‌ର ସ୍ଥାୟୀ ଖେଳାଳି ହୋଇଗଲେଣି । ଏବେ ଚାଲିଥିବା ଚାମ୍ପିଅନ୍ସ ଟ୍ରଫିରେ ସେ ଓ ଜାଡ଼େଜା ଉଭୟ ଖେଳୁଛନ୍ତି ।

ଯଦି ଜାଡ଼େଜାଙ୍କୁ କୌଣସି କାରଣରୁ ଦିନିକିଆ ଟିମ୍‌ରେ ନିଆ ନ ଯାଏ ଏବଂ ଚୂଡ଼ାନ୍ତ ଏକାଦଶରେ ଦୁଇ ସ୍ପିନ୍ ବୋଲିଂ ଅଲ୍‌ରାଉଣ୍ଡର୍‌ଙ୍କୁ ରଖାଯାଏ, ତା’ହେଲେ ଅକ୍ଷରଙ୍କ ସହିତ ସୁନ୍ଦର ସ୍ଥାନ ପାଇବେ । ଏ ଯାବତ ଅକ୍ଷର ୬୬ ଓ ସୁନ୍ଦର ୨୩ ଦିନିକିଆ ମ୍ୟାଚ୍ ଖେଳିଛନ୍ତି । ଟେଷ୍ଟ ଭଳି ଦିନିକିଆରେ ବି ଉଭୟ ହର୍ଷଙ୍କ ପାଇଁ ଚାଲେଞ୍ଜ୍ ହେବେ ।

ବାକି ରହିଲା ଟି-୨୦ ଆନ୍ତର୍ଜାତିକ । ଟି-୨୦ ଟିମ୍‌ରେ ଏବେ ଦୁଇ ସ୍ପିନ୍ ବୋଲିଂ ଅଲ୍‌ରାଉଣ୍ଡର୍‌ଙ୍କ ଆବଶ୍ୟକ ପଡ଼ୁ ନାହିଁ, ଜଣେ ଅକ୍ଷର ଯଥେଷ୍ଟ । ତାଙ୍କ ଅନୁପସ୍ଥିତିରେ ସୁନ୍ଦରଙ୍କୁ ସୁଯୋଗ ମିଳିବ । ସେଠାରେ ହର୍ଷଙ୍କ ସ୍ଥାନ ନାହିଁ ।

୨୦୨୨ରେ ପ୍ରଥମ-ଶ୍ରେଣୀ ପଦାର୍ପଣ

ଜଣେ ସିନିଅର୍ କ୍ରିକେଟର୍ ଭାବେ ହର୍ଷଙ୍କ ଘରୋଇ କ୍ୟାରିଅର୍ ସେତେ ଦୀର୍ଘ ନୁହେଁ । ସେ ୨୦୨୨ରେ ବିଦର୍ଭ ପକ୍ଷରୁ ଖେଳି ନିଜର ପ୍ରଥମ-ଶ୍ରେଣୀ କ୍ୟାରିଅର୍ ଆରମ୍ଭ କରିଥିଲେ । ଏଥିପାଇଁ ଗୋଟିଏ ରଣଜୀ ସିଜନ୍‌ରେ ସର୍ବାଧିକ ୱିକେଟ୍ ହାସଲ ଉପଲବ୍‌ଧି  ତାଙ୍କ ପାଇଁ ବେଶ୍ ଗୁରୁତ୍ୱ ରଖେ । ଏହା ପୂର୍ବରୁ ସେ ୨୦୨୧ରେ ଲିଷ୍ଟ-ଏ କ୍ରିକେଟ୍‌ରେ ପଦାର୍ପଣ କରିଥିଲେ ।

ହର୍ଷ ପ୍ର୍ରଥମ-ଶ୍ରେଣୀ କ୍ରିକେଟ୍‌ରେ ଏ ଯାବତ ୧୮ ମ୍ୟାଚ୍ ଖେଳି ୯୭ ୱିକେଟ୍ ଅକ୍ତିଆର କରିଛନ୍ତି । ସେଥିମଧ୍ୟରୁ ୬୯ ୱିକେଟ୍ ସେ ୨୦୨୪-୨୫ ସିଜନ୍‌ରେ ନେଇଛନ୍ତି । ଏହାଛଡ଼ା ସେ ବ୍ୟାଟିଂରେ ଅଦ୍ୟାବଧି ୭୦୯ ରନ୍ ସଂଗ୍ରହ କରିଛନ୍ତି, ଯେଉଁଥିରେ ସାତ ଅର୍ଦ୍ଧଶତକ ରହିଛି ।
ଭବିଷ୍ୟତର ତାରକା ହର୍ଷଙ୍କୁ ଏବେ ମାତ୍ର ୨୨ ବର୍ଷ ବୟସ । ତାଙ୍କ ଆଗରେ ବିରାଟ ଭବିଷ୍ୟତ ରହିଛି ।

ଜଣେ ପ୍ରତିଭାଶାଳୀ ଅଲ୍‌ରାଉଣ୍ଡର୍ ହୋଇଥିବା ଦୃଷ୍ଟିରୁ ନୂଆ ଟେଷ୍ଟ ଚକ୍ରରେ ତାଙ୍କୁ ହୁଏତ ଭାରତୀୟ ଟିମ୍‌ରେ ସ୍ଥାନ ମିଳିଯିବ, କିନ୍ତୁ ଚୂଡ଼ାନ୍ତ ଏକାଦଶରେ ସୁଯୋଗ ମିଳିବା କଷ୍ଟ । ଏବେ ହର୍ଷଙ୍କ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ତାଙ୍କୁ ନିଜ ପ୍ରଦର୍ଶନରେ ନିରନ୍ତରତା ରଖିବାକୁ ହେବ । ନିରନ୍ତରତା ହିଁ ତାଙ୍କ କ୍ରିକେଟ୍ ଭବିଷ୍ୟତକୁ ମଜଭୁତ ଓ ଦୀର୍ଘସ୍ଥାୟୀ କରିପାରିବ ।