ଗ୍ରହକଙ୍କଠାରୁ ଅଧିକ ଟଙ୍କା ଚାର୍ଜ କରିବା ସହ ସଠିକ୍ ସେବା ନଦେବା କାରଣରୁ ଓଲା କ୍ୟାବ୍ସକୁ ଲାଗିଲା ବଡ଼ ଝଟ୍କା । ହାଇଦ୍ରାବାଦ କଞ୍ଜୁମୋର କୋର୍ଟ ଓଲା କ୍ୟାବ୍ସକୁ ୯୫ ହଜାର ଟଙ୍କା ଜୋରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି ।
ଉକ୍ତ ଗ୍ରାହକ ଜଣକ ଅଭିଯୋଗ କରିଥିଲେ ଯେ, ମାତ୍ର ୪-୫ କିଲୋମିଟର ଯାତ୍ରା ପାଇଁ ତାଙ୍କୁ ଓଲା ପକ୍ଷରୁ ୮୬୧ ଟଙ୍କା ଦେୟ ଦେବାକୁ କୁହାଯାଇଥିଲା । କିନ୍ତୁ ବାସ୍ତବରେ ଦେଖିବାକୁ ଗଲେ ଏହାର ଦେୟ ୨୦୦ ଟଙ୍କାରୂ ଅଧିକ ହେବା କଥା ନୁହେଁ । କିନ୍ତୁ ତାଙ୍କୁ ୮୬୧ ଟଙ୍କା ଦେବାକୁ ବାଧ୍ୟ କରାଯାଇଥିଲା ।
ଜାବେଜ ସାମୁଏଲ ନାମକ ଏହି ଅଭିଯୋଗକାରୀ କରିଛନ୍ତି ଯେ, ସେ ତାଙ୍କ ପତ୍ନୀ ଏବଂ ଜଣେ ସହକାରୀ ଗତ ୧୯ ଅକ୍ଟୋବର ୨୦୨୧ରେ ଚାରି ଘଣ୍ଟା ପାଇଁ ଏକ ଓଲା କ୍ୟାବ ଭଡ଼ାରେ ନେଇଥିଲେ । ଯେଉଁ ଗାଡ଼ିକୁ ସେ ଭଡ଼ା ସୂତ୍ରରେ ନେଇଥିଲେ ତାହା ଅତ୍ୟନ୍ତ ଅପରିଷ୍କାର ରହିଥିଲା । ଖାଲି ସେତିକି ନୁହେଁ, ଗାଡ଼ିର ଡ୍ରାଇଭର ଯାତ୍ରା ବେଳେ ଏସି ଲଗାଇବାକୁ ମଧ୍ୟ ମନା କରିଥିଲା । ଏମିତିକି ଗ୍ରାହକଙ୍କ ସହ ଡ୍ରାଇଭର ଜଣକ ଅତ୍ୟନ୍ତ କଦର୍ଯ୍ୟ ବ୍ୟବହାର କରିଥିଲା । ତେଣୁ ମାତ୍ର ୪-୫ କିଲୋମିଟର ଯିବା ପରେ ସାମୁଏଲ, ତାଙ୍କ ପତ୍ନୀ ଓ ସହାୟକ ଗାଡ଼ିରୁ ଓହ୍ଲାଇପଡ଼ିଥିଲେ ।
Also Read
ଆଉ ସେତିକି ସମୟ ମଧ୍ୟରେ ୮୬୧ ଟଙ୍କାର ବିଲ୍ ଦେଇଥିଲା ଓଲା ଡ୍ରାଇଭର । କିନ୍ତୁ ସାମୁଏଲଙ୍କ ପାଖରେ ଓଲା ମନି କ୍ୟାସ୍ କ୍ରେଡିଟ୍ ସୁବିଧା ଥିବାରୁ ସେତେବେଳେ ଟଙ୍କା ଦେବାକୁ ପଡ଼ିନଥିଲା ।
ସାମୁଏଲ ଏହି ପୁରା ଘଟଣା ନେଇ ଜିଲ୍ଲା ଉପଭୋକ୍ତା ବିବାଦ ସମାଧାନ କମିଶନଙ୍କ ଦୃଷ୍ଟି ଆକର୍ଷଣ କରିଥିଲେ । ସେ କହିଥିଲେ ଯେ, ତାଙ୍କୁ ବିକଳ୍ପ ବ୍ୟବସ୍ଥା କରିବାକୁ ପଡିଲା ଏବଂ ସେହି ଦିନ ଅନେକ ଗରୁତ୍ୱପୂର୍ଣ୍ଣ କାର୍ଯ୍ୟକ୍ରମ ସେ ହାତଛଡ଼ା କରିବାକୁ ବାଧ୍ୟ ହେଲେ ।
ସାମୁଏଲ କହିଛନ୍ତି ଯେ, ଅତିରିକ୍ତ ବିଲ୍ ସମ୍ପର୍କରେ ସେ ଉକ୍ତ ଓଲା କ୍ୟାବ୍ସ ବିରୋଧରେ ସଂସ୍ଥାକୁ ଅଭିଯୋଗ କରିଥିଲେ । ହେଲେ ସଂସ୍ଥାର ଉଚ୍ଚ କର୍ତ୍ତୃପକ୍ଷ ଏହି ଘଟଣାରେ ହସ୍ତକ୍ଷେପ କରିବାକୁ ବିଫଳ ହେଲେ । ସାମୁଏଲ ଆହୁରି କହିଛନ୍ତି ଯେ, ଓଲା ଅଧିକାରୀମାନେ ବାରମ୍ବାର ଫୋନ୍ କରି ବିଲ୍ ପୈଠ କରିବାକୁ କହିଥିଲେ ।
ଜାନୁଆରୀ ୨୦୨୨ରେ ସେ ଏହି ବିଲ୍ ପୈଠ କରିଥିଲେ ସତ, କିନ୍ତୁ ନ୍ୟାୟ ପାଇଁ କଞ୍ଜୁମୋର କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ବାରମ୍ବାର ନୋଟିସ ଦିଆଯିବା ପରେ ମଧ୍ୟ ଓଲା କ୍ୟାବ୍ସ ପକ୍ଷରୁ କୋର୍ଟରେ ଲଢ଼େଇ ପାଇଁ କେହି ଆସିଲେ ନାହିଁ କିମ୍ବା ହାଜର ହେଲେ ନାହିଁ ।
ସାମୁଏଲଙ୍କ ଅଭିଯୋଗ ଏବଂ ତାଙ୍କୁ ହୋଇଥିବା ମାନସିକ ପିଡ଼ାକୁ ଦୃଷ୍ଟିରେ ରଖି କୋର୍ଟ ଓଲା କ୍ୟାବ୍ସକୁ ୮୮ ହଜାର ଟଙ୍କାର ଜୋରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି । ଖାଲି ସେତିକି ନୁହେଁ ଏହି ମାମଲାର ଶୁଣାଣି ସମୟରେ ସାମୁଏଲ ଖର୍ଚ୍ଚ କରିଥିବା ଅର୍ଥ ୭୦୦୦ ଟଙ୍କା ମଧ୍ୟ ସଂସ୍ଥା ତାଙ୍କୁ ଦେବ ବୋଲି କୋର୍ଟ ନିର୍ଦ୍ଦେଶ ଦେଛଛନ୍ତି ।
ଏହି ଟଙ୍କା ଫୈଠ କରିବା ପାଇଁ କୋର୍ଟ ଉକ୍ତ ସଂସ୍ଥାକୁ ୪୫ ଦିନର ସମୟ ଦେଇଛନ୍ତି । ଯଦି ଏହି ସମୟ ସୀମା ମଧ୍ୟରେ ଟଙ୍କା ପୈଠ କରାନଯାଏ, ତେବେ କମ୍ପାନୀ ଜୋରିମାନା ଅର୍ଥର ସୁଧ ମଧ୍ୟ ଦେବାକୁ ବାଧ୍ୟ ବୋଲି କୋର୍ଟ କହିଛନ୍ତି । କୋର୍ଟ ଏହା ମଧ୍ୟ ନିର୍ଦ୍ଦେଶ ଦେଲେ ଯେ, ଯେଉଁ ତାରିଖଠାରୁ ସାମୁଏଲଙ୍କଠାରୁ ସଂସ୍ଥା ୮୬୧ ଟଙ୍କା ନେଇଛି, ସେବେଠାରୁ ଏହାର ବାର୍ଷିକ ୧୨ ପ୍ରତିଶତ ସୁଧ ହିସାବରେ କମ୍ପାନୀ ଟଙ୍କା ଫେରାଇବ ।