ଚନ୍ଦ୍ରୟାନ-୩ ପାଇଁ ଆଜି ସବୁଠୁ ବଡ଼ ଦିନ: ଚେଇଁବେ କି ପ୍ରଜ୍ଞାନ ଓ ବିକ୍ରମ ? ନା ଶୋଇଯିବେ ଚିରନିଦ୍ରାରେ ?

ସୂର୍ଯ୍ୟାଲୋକରେ ଜାଗିବ କି ଆଶାର କିରଣ ? ଚେଇଁବେ କି ପ୍ରଜ୍ଞାନ ଓ ବିକ୍ରମ ? ନା ଶୋଇଯିବେ ଚିରନିଦ୍ରାରେ ? ଚନ୍ଦ୍ରୟାନ-୩ ପାଇଁ ଆଜି ସବୁଠୁ ବଡ଼ ଦିନ। ଜହ୍ନରେ ରାତି କଟାଇବା ପରେ ଲ୍ୟାଣ୍ଡର ଓ ରୋଭରକୁ ପୁନଃ ସକ୍ରିୟ କରିବା ପାଇଁ ଚେଷ୍ଟା କରିବ ଇସ୍ରୋ।

ପୃଥିବୀ ସମୟ ଅନୁସାରେ, ଗତ ୧୪ ଦିନ ଧରି ଚନ୍ଦ୍ରର ଦକ୍ଷିଣ ମେରୁରେ ରାତି ହୋଇଥିଲା। ଚନ୍ଦ୍ରୟାନ ଅବତରଣ ସ୍ଥଳ ପଏଣ୍ଟ ଶିବଶକ୍ତିରେ ସୂର୍ଯ୍ୟାସ୍ତ ପୂର୍ବରୁ ରୋଭର ପ୍ରଜ୍ଞାନକୁ ଗତ ୨ ତାରିଖରେ ଏବଂ ଲ୍ୟାଣ୍ଡର୍ ବିକ୍ରମକୁ ଗତ ୪ ତାରିଖରେ ସ୍ଲିପ୍‌ ମୋଡ୍‌ରେ ରଖିଥିଲା ଇସ୍ରୋ ।

କେବଳ ରିସିଭରକୁ ଅନ୍ ରଖି ବାକିସବୁ ଯନ୍ତ୍ରପାତିକୁ ବନ୍ଦ କରି ଦିଆଯାଇଥିଲା। ଇତି ମଧ୍ୟରେ ବିତିଯାଇଛି ୨ ସପ୍ତାହରୁ ଅଧିକ ସମୟ। ପଏଣ୍ଟ ଶିବଶକ୍ତିରେ ସୂର୍ଯ୍ୟୋଦୟ ହେବା ପରେ ଲ୍ୟାଣ୍ଡର ଓ ରୋଭର୍ କାର୍ଯ୍ୟକ୍ଷମ ହେବା ଲାଗି ଉପଯୁକ୍ତ ଉତ୍ତାପ ଓ ସୌରଶକ୍ତି ସଂଗ୍ରହ କରୁଛନ୍ତି।

ଏହାପରେ ଆଜି ସେମାନଙ୍କୁ ସକ୍ରିୟ କରିବା ଲାଗି ଇସ୍ରୋରୁ କମାଣ୍ଡ ପଠାଯିବ। ଯଦି ଏହା ସଫଳ ହୁଏ, ତେବେ ପୁଣି ଆଗାମୀ ୧୪ ଦିନ ଲାଗି ଚନ୍ଦ୍ରୟାନ-୩ ଜହ୍ନରେ ବୈଜ୍ଞାନିକ ତଥ୍ୟ ସଂଗ୍ରହ କରିବ ବୋଲି ଆଶା କରାଯାଉଛି।