୨୦ ବର୍ଷ ପରେ ମତଦାନ: ଲୋକଙ୍କ ମଧ୍ୟରେ ପ୍ରବଳ ଉତ୍ସାହ, ସାରା ରାଜ୍ୟରେ ରେକର୍ଡ

ଓଡିଶାର ଅପପୁଷ୍ଟିର ଇଲାକା ଭାବେ ପରିଚିତ ନଗଡା ଗାଁରେ ଆଜି ପଡିଛି ଭୋଟ୍ । ୨୦ବର୍ଷ ପରେ ଏଠାରେ ଭୋଟ୍ ଗ୍ରହଣ ହୋଇଛି । ତ୍ରିସ୍ତରୀୟ ପଞ୍ଚାୟତ ର୍ନିବାଚନର ଚତୁର୍ଥ ପର୍ଯ୍ୟାୟ ମତଦାନରେ ଆଜି ଯାଜପୁର ଜିଲ୍ଲାର ସୁକିନ୍ଦା ଓ ଦାନଗଦୀ ବ୍ଲକରେ ଭୋଟଗ୍ରହଣ ହୋଇଥିଲା । ଏହି ମତଦାନ ପ୍ରକ୍ରିୟାରେ ସାମିଲ ହୋଇଥିଲେ ନଗଡ଼ା ବାସୀ । ଅପହଞ୍ଚ ଇଲାକା ଭାବେ ଦିନେ ଚର୍ଚ୍ଚାରେ ଥିବା ସୁକିନ୍ଦା ବ୍ଲକ ନଗଡ଼ାର ଜୁଆଙ୍ଗ ଆଦିବାସୀମାନେ ଆଜି ସେମାନଙ୍କ ମତାଧିକାର ସାବ୍ୟସ୍ତ କରିଛନ୍ତି । ନଗଡ଼ା ପାହାଡ଼ ତଳେ ଥିବା ଦେଓଗାଁ ପ୍ରାଥମିକ ବିଦ୍ୟାଳୟରେ ହୋଇଥିବା ବୁଥ୍‌ରେ ସ୍ଥାନୀୟ ଲୋକେ ପହଞ୍ଚି ଭୋଟ ଦେଇଥିଲେ ।

ଯାଜପୁର ଜିଲ୍ଲା ନଗଡ଼ାରେ ୨୦ ବର୍ଷ ପରେ ହେଲା ଭୋଟ। ନଗଡ଼ାରେ ୮୩% ମତଦାନ ହୋଇଛି ବୋଲି ରାଜ୍ୟ ନିର୍ବାଚନ କମିଶନର ଆଦିତ୍ୟ ପ୍ରସାଦ ପାଢ଼ୀଙ୍କ ସୂଚନା ଦେଇଛନ୍ତି। ମାଓ ପ୍ରବଣ ନିୟମଗିରି ତ୍ରିଲୋଚନପୁରରେ ମଧ୍ୟ ୮୦% ମତଦାନ ହୋଇଥିବାର ସୂଚନା ମିଳିଛି। ଯୋଗାଯୋଗ ସମସ୍ୟା ଯୋଗୁଁ ଉଭୟ ସ୍ଥାନରେ ଭୋଟ ହୋଇପାରୁନଥିଲା।

ଚତୁର୍ଥ ପର୍ଯ୍ୟାୟ ଭୋଟ ଗ୍ରହଣ ନେଇ ନିର୍ବାଚନ କମିଶନର କହିଛନ୍ତି-“ପ୍ରାରମ୍ଭିକ ସୂଚନା ଅନୁସାରେ ୭୩ ପ୍ରତିଶତ ମତଦାନ ହୋଇଛି। ଚୂଡ଼ାନ୍ତ ସଂଖ୍ୟା ଆସିଲେ ଭୋଟ୍‌ ପ୍ରତିଶତ ବଢ଼ିପାରେ। ୪/୫ଟି ଜାଗାରେ ବିଭିନ୍ନ କାରଣରୁ ଭୋଟଦାନରେ ବାଧା ଉପୁଜିଛି। ଜିଲ୍ଲାପାଳମାନଙ୍କଠାରୁ ରିପୋର୍ଟ ମିଳିଲା ପରେ ପଦକ୍ଷେପ ନିଆଯିବ।”

ଆଜି ଚତୁର୍ଥ ପର୍ଯ୍ୟାୟ ମତଦାନ ଶେଷ ହୋଇଛି। କାଁଭାଁ ସ୍ଥାନକୁ ଛାଡ଼ି ଦେଲେ ଦ୍ୱିତୀୟ ଓ ତୃତୀୟ ପର୍ଯ୍ୟାୟ ପରି ହିଂସା ଘଟିନାହିଁ। ତେବେ ପାରାଦୀପରେ ଉତ୍ତେଜନା ପ୍ରକାଶ ପାଇଥିଲା। ଭୋଟ୍‌ ଦେଇଥିବା ସତ୍ତ୍ୱେ ବୁଥ୍‌ ଭିତରେ ଜିଲ୍ଲା ପରିଷଦ ପ୍ରାର୍ଥୀ ସହକର୍ମୀଙ୍କୁ ଧରି ପଶିଥିଲେ। ଯେଉଁଥିପାଇଁ ସ୍ଥାନୀୟ ଲୋକେ ପୋଲିଂ କର୍ମଚାରୀଙ୍କୁ ଛାଡ଼ି ନଥିଲେ।