Politics: ମର୍ଣ୍ଣିଂ ୱାକରେ ଦେଖା ହେଲା ପରେ ବଦଳିଗଲା ସମୀକରଣ, ମେଣ୍ଟ ଛାଡିଦେଲେ ପନୀରସେଲଭମ୍

ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଓ. ପନୀରସେଲଭମ୍ (ଓପିଏସ୍) ତାମିଲନାଡୁର ମୁଖ୍ୟମନ୍ତ୍ରୀ ଏମ. କେ. ଷ୍ଟାଲିନଙ୍କୁ ମର୍ଣ୍ଣିଂ ୱାକରେ ଭେଟିବା ପରେ ବିଜେପି ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (NDA) ରୁ ଓହରିଯାଇଛନ୍ତି । ତାମିଲନାଡୁରେ ଏହା ଏକ ଗୁରୁତ୍ୱପୂର୍ଣ୍ଣ ରାଜନୈତିକ ଘଟଣା । ବିଶେଷକରି ୨୦୨୬ ତାମିଲନାଡୁ ବିଧାନସଭା ନିର୍ବାଚନ ଦୃଷ୍ଟିରୁ ଏହା ବହୁତ ଗୁରୁତ୍ୱ ବହନ କରୁଛି ।

ଓ. ପନୀରସେଲଭମ୍ AIADMK ରୁ ଏକାଧିକ ଥର ତାମିଲନାଡୁର ମୁଖ୍ୟମନ୍ତ୍ରୀ ହୋଇଛନ୍ତି । AIADMK ରୁ ବହିଷ୍କୃତ ହେବା ପରେ ସେ ନିଜର ଏକ ସ୍ୱତନ୍ତ୍ର ଗୋଷ୍ଠୀ ଗଠନ କରିଥିଲେ। ସେ ବିଜେପି ନେତୃତ୍ୱାଧୀନ NDA ମେଣ୍ଟରେ ଥିଲେ । କିନ୍ତୁ ମୁଖ୍ୟମନ୍ତ୍ରୀ ତଥା DMK ସଭାପତି ଏମ. କେ. ଷ୍ଟାଲିନଙ୍କୁ ସେ ସକାଳୁଆ ବୁଲାରେ ଭେଟିବା ପରେ ଏହି ମେଣ୍ଟରୁ ଓହରିଯିବାର ନିଷ୍ପତ୍ତି ନେଇଛନ୍ତି । ଏହି ଘଟଣା ରାଜ୍ୟ ରାଜନୀତିରେ ନୂଆ ମେଣ୍ଟ ଗଠନ ଏବଂ ରାଜନୈତିକ ପୁନର୍ଗଠନର ସମ୍ଭାବନା ନେଇ ଚର୍ଚ୍ଚା ସୃଷ୍ଟି କରିଛି।

ଏନଡିଏରୁ ଓହରିବା ସଂପର୍କରେ ପନୀରସେଲଭମ୍‌ଙ୍କ ଘନିଷ୍ଠ ସହଯୋଗୀ ତଥା ପୂର୍ବତନ ମନ୍ତ୍ରୀ ପାନରୁତି ଏସ. ରାମଚନ୍ଦ୍ରନ ଘୋଷଣା କରିଛନ୍ତି । ସେ କହିଛନ୍ତି , “ଆମେ NDA ସହ ମେଣ୍ଟ ଭାଙ୍ଗୁଛୁ।” ସେ ଆହୁରି ମଧ୍ୟ କହିଥିଲେ ଯେ ପନୀରସେଲଭମ୍ ଶୀଘ୍ର ରାଜ୍ୟବ୍ୟାପୀ ଗସ୍ତ ଆରମ୍ଭ କରିବେ । ୨୦୨୬ ନିର୍ବାଚନ ପୂର୍ବରୁ ରାଜନୈତିକ ରଣନୀତିର ଏହା ଏକ ଅଂଶ ହୋଇପାରେ। ଏନଡିଏରେ ସେ ଗୁରୁତ୍ୱ ପାଉନଥିବା ସଂପର୍କରେ ଆଗରୁ ନିଜର ଅସନ୍ତୋଷ ଝାଡିଥିଲେ ।

ପନୀରସେଲଭମ୍ ନିକଟରେ କେନ୍ଦ୍ର ସରକାରଙ୍କୁ ‘ସମଗ୍ର ଶିକ୍ଷା’ କାର୍ଯ୍ୟକ୍ରମ ଅଧୀନରେ ତାମିଲନାଡୁ ପାଇଁ ଅର୍ଥ ମଞ୍ଜୁର ନ କରିବା ନେଇ ସମାଲୋଚନା କରିଥିଲେ। ଏହାକୁ ସେ “ସମବାୟ ସଙ୍ଘୀୟତା ଏବଂ ଶିକ୍ଷା ଅଧିକାର ଆଇନର ବିରୋଧୀ” ବୋଲି ବର୍ଣ୍ଣନା କରିଥିଲେ ।

ତେବେ ଏଆଇଡିଏମକେରୁ ବହିଷ୍କୃତ ହେବା ପରେ ସେ ନିଜର ସଂଗଠନ ହରାଇଥିଲେ । ଆଗ ଭଳି ତାଙ୍କ ପାଖକୁ ଏତେ ଲୋକ ଆସୁନଥିଲେ । ବିଭିନ୍ନ ମହଲରୁ କୋଣଠେସା ହେବା ପରେ ସେ ଏବେ ଏକ ନୂଆ ଚାଲ୍ ଖେଳିଥିବାର ମଧ୍ୟ ଚର୍ଚ୍ଚା ହେଉଛି । ଏବେ DMK ବା ଅନ୍ୟ ଦଳମାନଙ୍କ ସହ ତାଙ୍କ ଗୋଷ୍ଠୀର ନୂଆ ମେଣ୍ଟ ଗଠନର ସମ୍ଭାବନା ରହିଛି । ପନୀରସେଲଭମ୍ ଏପର୍ଯ୍ୟନ୍ତ କୌଣସି ଦଳ ସହ ଆନୁଷ୍ଠାନିକ ମେଣ୍ଟ ଘୋଷଣା କରିନାହାନ୍ତି। ସେ ଅଭିନେତା ବିଜୟଙ୍କ ଦଳ ତାମିଲଗା ଭେଟ୍ରି କଜ଼ଗମ (TVK) ସହ ମେଣ୍ଟ ସମ୍ପର୍କରେ ସୂଚନା ଦେଇଛନ୍ତି । କହିଛନ୍ତି, “ସମୟ ସବୁ କହିଦେବ।” ୨୦୨୬ ବିଧାନସଭା ନିର୍ବାଚନରେ DMK ଏବଂ AIADMK ମଧ୍ୟରେ ପ୍ରତିଦ୍ୱନ୍ଦ୍ୱିତା ତୀବ୍ର ହେବାକୁ ଥିବା ବେଳେ ପନୀରସେଲଭମ୍ ଡିଏମକେ ପଟକୁ ଢ଼ଳି ପାରନ୍ତି 

ଅଧିକ ପଢ଼ନ୍ତୁ: ୪୯ ବର୍ଷ ବୟସରେ ଫିଜିଓଥେରାପିଷ୍ଟ ପଢ଼ିବେ ଡାକ୍ତରୀ, ମାଆ ଓ ଝିଅ ଉଭୟ ପାଇଲେ NEET