ତାମିଲନାଡୁରେ ମୁଣ୍ଡ ଟେକିଲା ଆଉ ଏକ ରାଜନୈତିକ ଦଳ, ନୂଆ ପାର୍ଟି ଗଢିଲେ ତାମିଲ ସୁପରଷ୍ଟାର ବିଜୟ

ତାମିଲନାଡୁରେ ମୁଣ୍ଡ ଟେକିଲା ଆଉ ଏକ ରାଜନୈତିକ ଦଳ । ଆଉ ଏହି ଦଳ ଗଢିଛନ୍ତି ତାମିଲ ସୁପରଷ୍ଟାର ବିଜୟ । ତାମିଲଗା ଭେଟ୍ରି କଝଗମ୍ ତଥା ଟିଭିକେ ନାଁରେ ଗଢା ହୋଇଥିବା ଏହି ଦଳର ସଭାପତି ହେଉଛନ୍ତି ବିଜୟ । ଆଜି ଅନୁଷ୍ଠିତ ହୋଇଛି ଦଳର ପ୍ରଥମ ବୈଠକ । ଭିଲୁପୁରମ୍ ଜିଲ୍ଲାର ଭିକ୍ରବନ୍ଦୀରେ ଆୟୋଜିତ ଏହି ବୈଠକରେ ଲକ୍ଷାଧିକ ପ୍ରଶଂସକ ଓ ତାମିଲନାଡୁ ବାସିନ୍ଦା ଏକାଠି ହୋଇଥିଲେ ।

ଏହି ଅବସରରେ ବିଜୟ କହିଛନ୍ତି, ରାଜନୀତି ସିନେମା ମୈଦାନ ନୁହେଁ ଏହା ଯୁଦ୍ଧକ୍ଷେତ୍ର । ଗ୍ରାଉଣ୍ଡରେ ଆମକୁ ଅଧିକ ସଜାଗ ଓ ସତର୍କ ରହିବାକୁ ପଡିବ । ବିଷାକ୍ତ ସାପ ଭଳି ବିରୋଧୀଙ୍କୁ ସାମ୍ନା କରିବାକୁ ପଡିବ । ଦ୍ରାବିଡିଆନ୍ ପଲିଟିକ୍ସକୁ ନିଶାନା କରି କହିଛନ୍ତି, ତମେ ଲୋକଙ୍କୁ ବୋକା ବନାଇପାରିବ, ହେଲେ ଆଉ ନୁହେଁ । ତାମିଲନାଡୁରେ ଟିଭିକେ ନୂଆ ଶକ୍ତି ହୋଇ ଉଭା ହେବ ।

ଫିଲ୍ମ କ୍ୟାରିୟରର ପିକରେ ଥିବା ତାମିଲ ଆଇକନ୍ ବିଜୟ କିଛି ଦିନ ତଳେ ରାଜନୀତିରେ ଏଣ୍ଟ୍ରି ନେଇ ଘୋଷଣା କରିଥିଲେ । ଏହା ପୂର୍ବରୁ ତାମିଲ ସୁପରଷ୍ଟାର ରଜନୀକାନ୍ତ ମଧ୍ୟ ରାଜନୈତିକ ଦଳ ଗଢିଥିଲେ । ତେବେ ଅସୁସ୍ଥତା କାରଣରୁ ତାହା ଆଗକୁ ବଢିପାରିନଥିଲା ।