ସତ ହୋଇଥିଲେ ସାଂଘାତିକ ! BJD ବିଧାୟକଙ୍କ ନାଁରେ ଯୌନ ଶୋଷଣ-ଭୃଣହତ୍ୟା ଅଭିଯୋଗ, ପୋଲିସ ରଖୁନି ଏତଲା

ବିଜେଡି ବିଧାୟକ ପ୍ରକାଶ ମାଝୀଙ୍କ ବିରୋଧରେ ସଂଗୀନ ଅଭିଯୋଗ । ନବରଙ୍ଗପୁର ରାଜନୀତିରେ ହଟଚମଟ, ରାଜ୍ୟ ରାଜଧାନୀରେ ହଇଚଇ । ପ୍ରକାଶ ମାଝୀ ଯୌନ ନିର୍ଯାତନା ସହ ଭୃଣହତ୍ୟା ଭଳି ଜଘନ୍ୟ ଅପରାଧରେ ସଂପୃକ୍ତ ଦର୍ଶାଇ ଗର୍ଜିଛନ୍ତି ବିରୋଧୀ । କେଉଁଠି ପୋଡ଼ାଜଳା ତ କେଉଁଠି ବିକ୍ଷୋଭ । ବିଜେପିର ଅଭିଯୋଗ, ଭୁବନେଶ୍ୱର ଜାଗମରାର ଜଣେ ଯୁବତୀଙ୍କୁ ନିଜକୁ ଅବିବାହିତ ଦର୍ଶାଇ ବିବାହର ପ୍ରଲୋଭନ ଦେଇ ଆଜିକୁ ତିନି ବର୍ଷ ହେଲା ପ୍ରକାଶ ଶାରୀରିକ ସମ୍ପର୍କ ରଖିଥିଲେ । ଏସମ୍ପର୍କରେ ଖଣ୍ଡଗିରି ଥାନାରେ ଏତଲା ବି ଦେଇଛନ୍ତି ପୀଡ଼ିତା । ଅଥଚ ଏତଲା ଗ୍ରହଣ କରାଯାଉନି କି କୌଣସି କାର୍ଯ୍ୟାନୁଷ୍ଠାନ ନିଆଯାଉନି ବୋଲି କହିବା ସହ ପ୍ରକାଶଙ୍କ କୁଶପୁତ୍ତଳିକା ଦାହ କରି ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛି ବିଜେପି । ବିଡ଼ିଓଙ୍କୁ ଆକ୍ରମଣ ଅଭିଯୋଗ ଦର୍ଶାଇ ଜଣେ ବିଜେପି ବିଧାୟକଙ୍କୁ ଗିରଫ କରିଥିବା ପୋଲିସ, ଏଭଳି ଜଘନ୍ୟ ଅପରାଧରେ ଜଡ଼ିତ ଶାସକ ଦଳ ବିଧାୟକଙ୍କ ପ୍ରତି କାହିଁକି ଏତେ ଅନୁକମ୍ପା ଦେଖାଉଛି ବୋଲି ଦଳ ପ୍ରଶ୍ନ କରିଛି ।

ନବରଙ୍ଗପୁର ଜିଲ୍ଲା କଂଗ୍ରେସର ମଧ୍ୟ ସମାନ ଅଭିଯୋଗ । ଜିଲ୍ଲା କଂଗ୍ରେସ ସଭାପତି ମୁନା ତ୍ରିପାଠୀ ଏକ ସାମ୍ବାଦିକ ସମ୍ମିଳନୀ କରି କହିଛନ୍ତି, ଯୌନ ନିର୍ଯାତନା, ଭୃଣହତ୍ୟା ଭଳି ଜଘନ୍ୟ ଅପରାଧର ଅଭିଯୋଗ ରହିଛି ପ୍ରକାଶଙ୍କ ବିରୋଧରେ । ଏସମ୍ପର୍କରେ ସଂପୃକ୍ତ ପୀଡ଼ିତା ନିଜର ଭଡ଼ାଘର ମାଲିକଙ୍କୁ ଧରି ଖଣ୍ଡଗିରି ଥାନାକୁ ଯାଇ ଏତଲା ବି ଦେଇଛନ୍ତି । ଏଭଳି ସମ୍ବେଦନଶୀଳ ଘଟଣାକୁ ଯଦି ଶାସକ ଦଳ ଘଣ୍ଟ ଘୋଡ଼ାଏ, ତାହେଲେ ଜିଲ୍ଲା ବନ୍ଦ ଡାକରା ଦିଆଯିବା ସହ ବ୍ୟାପକ ଆନ୍ଦୋଳନ କରାଯିବ ବୋଲି ଚେତାଇ ଦେଇଛି ନବରଙ୍ଗପୁର ଜିଲ୍ଲା କଂଗ୍ରେସ ।

ପ୍ରକାଶ ମାଝୀ ହେଉଛନ୍ତି ନବରଙ୍ଗପୁର ସାଂସଦ ରମେଶ ମାଝୀଙ୍କ ସାନ ଭାଇ । ରାଜନୀତିକୁ ଆସିବା ଆଗରୁ ପଞ୍ଚାୟତରାଜ ବିଭାଗରେ ଇଂଜିନିୟର ଭାବେ କାମ କରୁଥିଲେ ପ୍ରକାଶ । ଗତ ନିର୍ବାଚନ ପୂର୍ବରୁ ଅର୍ଥାତ ୨୦୧୭ରେ ବିଜେଡିରେ ଯୋଗଦେଇ ନବରଙ୍ଗପୁର ଜିଲ୍ଲା ଯୁବ ବିଜେଡି ଉପସଭାପତି ହୋଇଥିଲେ । ଏହାପରେ ୨୦୧୯ ନିର୍ବାଚନରେ ତତ୍କାଳୀନ କଂଗ୍ରେସ ନେତା ପ୍ରଦୀପ ମାଝୀଙ୍କୁ ଚେକ୍ ଦେବାକୁ ଗତ ୨୦୧୯ରେ ନିଜେ ସାଂସଦ ଭାବେ ଛିଡ଼ା ହେବା ସହ ଭାଇ ପ୍ରକାଶ ମାଝୀଙ୍କୁ ଝରିଗାଁ ଆସନ ଛାଡ଼ିଥିଲେ ରମେଶ ମାଝୀ ।

ରାଜନୀତିରେ ନୂଆ ନୂଆ ପାଦ ଥାପିଥିବା ପ୍ରକାଶ ମାଝୀ ଏବେ ଛନ୍ଦି ହୋଇଛନ୍ତି ଯୌନ କେଳେଙ୍କାରୀ ଅଭିଯୋଗରେ । ବିରୋଧୀଙ୍କ ଅଭିଯୋଗ ଯଦି ସତ, ତାହେଲେ କିଏ ସେହି ଅଭିଯୋଗକାରିଣୀ ? ସଂପୃକ୍ତ ଯୁବତୀଙ୍କ ସହ କେମିତି ସଂସ୍ପର୍ଶରେ ଆସିଥିଲେ ବିବାହିତ ପ୍ରକାଶ ? ରାଜନୈତିକ ତମ୍ବିତୋଫାନ ପରେ ବି କାହିଁକି ପକ୍ଷ ରଖୁନାହାଁନ୍ତି ପ୍ରକାଶ ? ଏ ସମ୍ପର୍କରେ ନା ବିଧାୟକ ପ୍ରକାଶ ମାଝୀଙ୍କ ପ୍ରତିକ୍ରିୟା ମିଳିପାରୁଛି ନା ସାଂସଦ ରମେଶ ମାଝୀଙ୍କର । ତେବେ ମହିଳାଙ୍କୁ ଯୌନ ନିର୍ଯାତନା ଓ ଭୃଣହତ୍ୟା ଭଳି ସଂଗୀନ ଅଭିଯୋଗ ସତ୍ତ୍ୱେ କାହିଁକି ଏତଲା ଗ୍ରହଣ କରୁନି ଖଣ୍ଡଗିରି ପୋଲିସ ? ଏସମ୍ପର୍କରେ କମିଶନରେଟ୍ ପୋଲିସକୁ ଯୋଗାଯୋଗ କରାଯାଇଥିଲେ ବି କୌଣସି ପ୍ରତିକ୍ରିୟା ମିଳିପାରିନି ।