ଜଟଣୀ ବିଧାୟକ ତଥା ସୋସିଆଲ ମିଡିଆ ସେନସେସନ୍ ସୁର ରାଉତରାୟଙ୍କ ଆଜି ଜନ୍ମଦିନ । ୭୯ ବର୍ଷରେ ପାଦ ଥାପିଛନ୍ତି କଂଗ୍ରେସର ବରିଷ୍ଠ ବିଧାୟକ ସୁର ରାଉତରାୟ । ସୁରଙ୍କ ଜନ୍ମଦିନରେ ତାଙ୍କ ବାସଭବନ ପହଞ୍ଚି ଅଭିନନ୍ଦନ ଜଣାଇଛନ୍ତି ହଜାର ହଜାର ପ୍ରଂଶସକ ଓ କଂଗ୍ରେସ କର୍ମୀ । ନିଜ ବିନ୍ଦାସ ଅନ୍ଦାଜ ଓ କୌତୁକିଆ କଥାବାର୍ତ୍ତା ପାଇଁ ଲୋକ ସୁରଙ୍କୁ ବେଶ ପ୍ରଶଂସା କରନ୍ତି ।
୧୯୪୫ ମସିହା ସେପ୍ଟେମ୍ବର ୧୧ରେ ଜନ୍ମଗ୍ରହଣ କରିଥିଲେ ସୁର । ୧୯୭୭ରେ ପ୍ରଥମ ଥର ପାଇଁ ସେ ଜନତା ଦଳ ଟିକଟରୁ ବିଧାନସଭାକୁ ନିର୍ବାଚିତ ହୋଇଥିଲେ । ପରେ କଂଗ୍ରେସ ଟିକଟରୁ ୧୯୮୦, ୧୯୮୫, ୧୯୯୫ , ୨୦୦୦ ଏବଂ ୨୦୧୯ରେ ସେ କଂଗ୍ରେସ ଟିକେଟରେ ନିର୍ବାଚିତ ହୋଇଛନ୍ତି । କଂଗ୍ରେସ ସରକାରରେ ସେ ମନ୍ତ୍ରୀ ଭାବେ ମଧ୍ୟ କାମ କରିସାରିଛନ୍ତି ।
Also Read
ମାଡ଼ି ଚାଲ କହି କର୍ମୀ ଓ ସମର୍ଥକଙ୍କୁ ଉତ୍ସାହିତ କରନ୍ତି ସୁର। ମିଡିଆ ଡାର୍ଲିଂ ଭାବେ ପରିଚିତ ସୁରଙ୍କୁ ଆପଣ ସର୍ବଦା ଟିଭିରେ ଦେଖିଥିବେ। ଯାହା କୁହନ୍ତି ଏକଦମ ସିଧା ଓ ରୋକଠୋକ। ସେ ଭାରି ମନମତାଣିଆ ମଧ୍ୟ । ବୟସାଧିକ୍ୟ ସତ୍ତ୍ୱେ ରାଜନୀତିରେ ସେ ଯେମିତି ଚଳଚଞ୍ଚଳ ନିଜ ସ୍ୱାସ୍ଥ୍ୟକୁ ନେଇ ମଧ୍ୟ ସେ ଫିଟ୍। ବାର୍ଦ୍ଧକ୍ୟ ତାଙ୍କୁ ଛୁଇଁଥିଲେ ବି ସେ ନିଜକୁ ଯୁବକ ଭଳି ସୁସ୍ଥ ରଖିଛନ୍ତି।
ସୁରଙ୍କ ପ୍ରିୟ ଖାଦ୍ୟ ହେଉଛି ପଖାଳ । ସେ ପଖାଳ ସାଙ୍ଗକୁ ମାଛ ଭଜା, କଖାରୁ ଫୁଲ ଭଜା, ଚୁନା ମାଛ, ଛତୁ ଭଜା, ଶାଗ ଭଜା, ଭେଣ୍ତି ଭଜା, ବାଇଗଣ ଭରତା ଆଦି ଖାଇବାକୁ ବେଶ୍ ଭଲ ପାଆନ୍ତି । ସେ ନିଜ ସମର୍ଥକଙ୍କୁ ମଧ୍ୟ ତେଲ ମସଲା ଖାଦ୍ୟ ନଖାଇ ଏହି ଦେଶୀ ଖାଦ୍ୟ ଖାଇବାକୁ ପରାମର୍ଶ ଦିଅନ୍ତି ।
ସୁରଙ୍କ ଦୁଇ ପୁଅ ଓ ଦୁଇ ଝିଅ ଅଛନ୍ତି। ତାଙ୍କର ବଡ଼ ପୁଅ ସିଦ୍ଧାର୍ଥ ରାଉତରାୟ ଆମେରିକାର ଏକ ବଡ଼ ଫାର୍ମ ଡାଇରେକ୍ଟର ଅଛନ୍ତି। ତାଙ୍କର ସାନପୁଅ ମନ୍ମଥ ରାଉତରାୟ ଏୟାର ଇଣ୍ଡିଆର କ୍ୟାପଟେନ ଅଛନ୍ତି।