IICଙ୍କ ଘରୁ ୩୭ ଲକ୍ଷ ଜବତ ହେବା ଘଟଣା: ବିଜେଡି ନେତା, ମନ୍ତ୍ରୀଙ୍କୁ ଟାର୍ଗେଟ୍‌ କଲା ବିଜେପି

ଥାନା ବାବୁ ସୁଶାନ୍ତ ଶପତଥୀଙ୍କ ଗୋଟିଏ ପରେ ଗୋଟିଏ ଗୁମର ଖୋଲିବା ସହ ଅସଲ ଚେହେରା ସାମ୍ନାକୁ ଆସୁଥିବା ବେଳେ ଅନ୍ୟପଟେ ଏନେଇ ରାଜ୍ୟ ସରକାରଙ୍କୁ ବିଜେପି ଟାର୍ଗେଟ୍ କରିଛି । ଓଡ଼ିଶା ପୋଲିସ ଆଜି ଏତେ ତଳସ୍ତରକୁ ଖସି ଯାଇଛି ଯେ ଜଣେ ପୋଲିସ କର୍ମୀଙ୍କ ଗିରଫ ହେବା ପରେ ସାଧାରଣ ଲୋକେ ବାଣ ଫୁଟାଉଛନ୍ତି ବୋଲି ବିଜେପି କହିଛି । 

ଗିରଫ IIC ସୁଶାନ୍ତ ଶପତଥୀଙ୍କ ନବୀନ ନିବାସ ଲିଙ୍କ୍ ମଧ୍ୟ ସାମ୍ନାକୁ ଆସିଥିବା ବିଜେପି ଅଭିଯୋଗ କରିଛି । ଖାଲି ସେତିକି ନୁହେଁ, ନୟାଗଡ଼ର ଜଣେ ରାଜନେତା ତଥା ସୁଶାନ୍ତଙ୍କ ସୁରକ୍ଷାରେ ଥିବା ବିଜେପି ଅଭିଯୋଗ କରିଛି । ଏହାସହ ଏହାର ତଦନ୍ତ ଲାଗି ବିଜେପି ଦାବି କରିଛି । 

IIC ସୁଶାନ୍ତ ଶତପଥୀଙ୍କ ଘରୁ ନଗଦ ୩୭ ଲକ୍ଷ ଜବତ ହେବା ଘଟଣାକୁ ନେଇ ବିଜେଡି ନେତା ଓ ମନ୍ତ୍ରୀଙ୍କୁ ବିଜେପି ମୁଖପାତ୍ର ଅନୀଲ ବିଶ୍ୱାଳ ଟାର୍ଗେଟ କରିଛନ୍ତି । ସେ କହିଛନ୍ତି, ‘କାହା ସୁପାରିସ୍‌ରେ ନବୀନ ନିବାସରେ ସୁଶାନ୍ତ ଡ୍ୟୁଟି ପାଇଥିଲେ ? ଲୋକଙ୍କ ବିରୋଧ ବେଳେ କଟକର ସମ୍ପୃକ୍ତ ମନ୍ତ୍ରୀ ହସ୍ତକ୍ଷେପ କରିଥିଲେ । ସେହିପରି କୋରାପୁଟରୁ ଗଞ୍ଜେଇ ନୟାଗଡ଼କୁ ଆସି ଗଚ୍ଛିତ ହୁଏ । ନୟାଗଡ଼ର ଜଣେ ବିଜେଡି ନେତା ତଥା ପୂର୍ବତନ ମନ୍ତ୍ରୀଙ୍କ ଜାଣତରେ ହୁଏ’ । 

ସୁଶାନ୍ତଙ୍କ ଓଲିଉଡ ଲିଙ୍କ୍‌ ନେଇ ମଧ୍ୟ ଅନୀଲ ସାଂଘାତିକ ଅଭିଯୋଗ କରିଛନ୍ତି । ସେ କହିଛନ୍ତି, ‘ଜଣେ ବିଜେଡି ସାଂସଦଙ୍କ ସହ କିପରି ଅଭିନୟ କଲେ ସୁଶାନ୍ତ ? ଫିଲ୍ମରେ ସୁଶାନ୍ତଙ୍କ କଳା ଟଙ୍କା ଲାଗି ନାହିଁ ତ ? ତେଣୁ ବିଜେଡି ନେତା, ମନ୍ତ୍ରୀଙ୍କୁ ତଦନ୍ତ ପରିସରଭୁକ୍ତ କରାଯାଉ ।’

ଅନୀଲ ଆହୁରି ଅଭିଯୋଗ ଆଣିଛନ୍ତି ଯେ, ‘୩ ଜଣ ଏସ୍‌ପିଙ୍କ ପ୍ରୋସିଡିଂ ସତ୍ତ୍ୱେ ସୁଶାନ୍ତ କେମିତି ପ୍ରମୋସନ ପାଇଲେ ? ଜବ୍‌ ସ୍କାମ୍‌ ମୁଖ୍ୟ ବିରଞ୍ଚି ସାହୁ ସହ ତାଙ୍କର ଲିଙ୍କ୍ ସୂଚନା ଅଛି । ରାଜନୈତିକ ଛତ୍ର ଛାୟା ତଳେ ରହି କଳା ଟଙ୍କା ଗୋଟାଉଥିଲେ ।’